MITHUMO 19

1Gikhati Apolo a nga bani ari Korinto, Pawulo a di vbindra tigoni nya gigomo a gu relela Efeso. A di ya mana iyo vapizane nya gukari, 2a va wudzisa khuye: "Mu hakhide Liphuvbo nya gu Age gikhati mu nga khodwa, gani?" Avo va di hakha khavo: 3"Gima hi si gupwi gu pwani lomo Liphuvbo nya Age." Uye a di engedza khuye: "Gasi gubhapatisa muni mu nga bhapatiswa khugo?" Avo va di hakha khavo: "Khu gubhapatisa ga Johane." 4Khavbo avbo, Pawulo a di ganela khuye: "Johane a di bhapatisa khu gubhapatisa nya gudzisodzise ni gu dzi laya, a embela vathu gu khodwa ga oyu a na tago khu hwane gwaye, a gu Jesu." 5Na va pwide esi va di bhapatiswa khu lina la Pfhumu Jesu. 6Gikhati Pawulo a nga va handzega mandza, Liphuvbo nya gu Age li di tshiga vbatshani gwawe, avo va gu ganela malimi ni gu profeta. 7Vatshavbo va diri tengo nya likhumi na vavili vama. 8Pawulo a di bela nyumbani nya nombelo, a vbedza migima miraru na gu ganela khu gu tiyisa, nyamba thava gilo, na gu vbweta gu khuye va khodwe vale va nga bani va gu mu yingisa, khu mahungu nya Mufumu wa Nungungulu. 9Ambari ulo, vambe va nya gubanga mihungo ni gumba khodwa va di phela gu dzuwungela Ndzila ya Pfhumu vbakari nya mwandra. Pawulo a di va diga a dzega vapizane khu phuvbo. Matshigu yatshavbo a di gu tshangana a bhula navo nyumbani nya guhevbule ya Tiranu. 10Girile kharalo gipimo nya myaga mivili, vathu vatshavbo va tigoni ga Asiya, Vajudha ni Vagreki va mane gu yingisa mahungu ya Pfhumu. 11Nungungulu a di gu gira siliwugiso nya sikhongolo khu mandza ya Pawulo, 12gu di vboha avbo vathu va nga dzega sikhongelo va gu khuha khiso mili waye, va gu si yisa ga vadwali va gu hawuluga, ni maphuvbo nya guvivbe ma gu duga ma hongola. 13Vambe Vajudha va nga bani va gu legalega va gu tutumisa maphuvbo nya guvivbe, va di lingedzela navo gu thumisa lina la Jesu gasi gu vbanyisa vale va nga bani va mbakidwe khu maphuvbo nya guvivbe, va di ganela khavo: "Eni nyi ngu mi ruma khu lina la Jesu, oyu Pawulo a ganelago khu Uye." 14Ava va nga bani va gu gira esi a diri livbandre na sivili sanana sa Eskeva, moyo nya khongolo nya vaphasi nya mbamba nya Vajudha. 15Aholu liphuvbo nya guvivbe li di hakha khilo: "Jesu nyi ngu muti, Pawulo nuye nyi ngu muti. Ahati enu, khenu va mani?" 16Muthu wule nya mandriki a di va ndragela, a va pferulela dzingadzu, va duga khu nyumbani mule wumbwiri na va tade khu silondra. 17Vathu vatshavbo va Efeso Vajudha ni Vagreki va dipwa mahungu yaya, va gu tala khu hwanga va gu rungudza lina la Pfhumu Jesu. 18Vatshavbo avo va nga khodwago ga Kristo va di ta va ta dzi sodzisa ni gu dawulela mithumo yawe. 19Vathu nya vangi va nga bani va gu thumisa wun'yanga nya wutumbe, va di resa dzisolo dzawe va ta dzi vbisa na va gu wonwa khu vathu vatshavbo. Ga satshavbo esi si nga vbiswago, si di gu ningana tengo nya livbandre mazana nya mazana dzitsapawu nya prata. 20Khu magirelo yoyo Mahungu ya Nungungulu ma di andra ma gu tiya khu tshivba. 21Khu hwane nya satshavbo sesi, Pawulo a di hunga gikungu nya guvbindre khu Makedhoniya ni Akaya a hongola Jerusalema, a ganela khuye: "Hwane nya gu bani nyi vbohile Jerusalema, nyi fanede gu hongola nyi ya wona gambe Roma." 22Khavbo avbo, a di rumela Makedhoniya vaphasedzeli vaye vavili, a gu Thimoti ni Erasto; uye a di simama gu khala gikhati nya gukari Asiya. 23Khu gikhati gyogyo, gu di manega litunga nya likhongolo dhoropani ga Efeso khu kota nya Ndzila yeyi nya yiphya. 24Mwama moyo nya gupwani khu Dhemetriyo, mupfhuli nya prata, a di gu thuma gu gira sifananiso nya ndrumba ya Artemisa khu prata. A di gira wugwewo nya bhinzu nya yikhongolo ngudzu, a fuma uye ni vatshavbo a nga bani a gu thuma navo. 25Khavbo avbo, a di tshanganisa vatshavbo, gumogo ni vambe vameseri nya thumo wa moyo, a va embela khuye: "Vama vakhwathu, mu ngu dzitini gwadi gu khenu satshavbo hi gu naso ha gu si mana khu thumo yoyu. 26Aholu mu ngu si wona ni gu sipwa khu dzindzeve dzanu esi mwama yoyu nya gupwani khu Pawulo a gimbilago a gira. A gu hevbudza khuye vanungungulu nya guvatwe khu mandza nya vathu khandri vanungungulu nya lisine. Khu kharato a dzi kodzile gu ndreyisa vathu nya vangi, nasiri basi tigoni momu ga Efeso, aholu ni Asiya gwatshavbo. 27Esi si na gira mhango nya yikhongolo, kholu khandri basi thumo wathu wu na tshiswago vbavbatshi, ni nyumba ya nungungulu nya khongolo, Artemisa kha yi na wonwa gambe nga gilo, nungungulu a khozedwago Asiya gwatshavbo ni hwindzo kha guya, kha na thedwa gambe kota." 28Na va pwide magana yaya va di swireka ngudzu, va phela gu gulumela khavo: "Khongolo khu Artemisa, nungungulu wa Vaefeso!" 29Pfilupfilu yi di phalalega ni lidhoropa latshavbo. Vathu nya vangi va di tutumela guya nyumbani nya mihagano, na va mode Gayo ni Aristarko va Makedhoniya, vabangaladzi va Pawulo. 30Pawulo a di vbweta gu dzi wonegisa vbakari nya vathu, aholu makhodwa kha ma mu dzumedzisa. 31Vathangeli nya gukari va Asiya nya dzipari dza Pawulo, va di mu rumela mwango, va lomba gu khavo a si beli nyumbani nya mihagano. 32Pfilupfilu yi di engedzelana vbakari nya tshangano, muthu ni muthu a di ganela dzaye. Nya vangi vawe va di si giti igyo gi nga va tshanganisago. 33Vajudha va di embedzela Alexandre mahungu a nga vbweta gu ganela, va mu gurumedza gu ema vbakari nya tshangano. Alexandre a di khusedza mandza a lomba gurula gasi afela gu ganela. 34Aholu, na va dzitide nya gukhavo Mujudha, va di engedzela gu gulumela khu lito limwedo, gipimo nya dziwora dzimbili, khavo: "Khongolo khu Artemisa, nungungulu wa Vaefeso!" 35Khavbo avbo, mabhalane wa dhoropani mule a di kodza gu degudza vathu, a ganela khuye: "Madhota ya Efeso, vathu vatshavbo va ngu dziti nya gukhavo lidhoropa lathu la Efeso khilo li sayisago nyumba ya nungungulu nya khongolo Artemisa gumogo ni gifananiso gyaye gi nga thega khu ndzadzini. 36Kha nga ulo hi dzitigo gu khethu mwalo muthu a dzi kodzago gu ganedza silo sesi, rulani myonyo, mu nga giri silo khu mavbingi. 37Mu reside avba vama vava, aholu va mwalo nandru wa gilo, kha va phanga nyumba ya nungungulu, gambe kha va hembulula nungungulu wathu. 38Uye Dhemetriyo ni ava a thumago navo, va gu bani vari ni ketso ni muthuyo, momo matshigu nya gulamule mahungu, vomo gambe valamuli, va na hongole va ya thela iyo dziketso dzawe. 39Aholu ma gu bani maromo mambe mahungu nya guganele, ma na lamudwa tshanganoni nya nayo. 40Khu esi si giregidego muhuno, hi ngu dzi kodza gu ningwa nandru nya gupwani hi vawusi nya pfilupfilu vbakari nya vathu, hi na hamuga ni magana nya guhakhe." 41Na ganede kharato, a di phalalegisa vathu.

will be added

X\