MITHUMO 18

1Hwane nya esi, Pawulo a di khuga khu Atena a gu hongola Korinto. 2Iyo a di ya mana mwama moyo nya Mujudha nya gupwani khu Akila, givelegwa gya Pontu. A di ngari gu vboha khu Italiya ni mwangadzi waye nya gupwane khu Prisila khu kota nya nayo wa Klaudiyo, a nga rumago Vajudha vatshavbo gu duga Roma. A di ya patana navo, 3Kholu va diri va thumo moyo ni uye. A di khala ndrangani gwawe, a gu thumela avbo. Va diri ni thumo nyaguluge malawu. 4Khu sabhado ni sabhado va di hongola nyumbani nya nombelo nya Vajudha. A di dzi garadza khu guvbweta gu khuye Vajudha ni Vagreki va khodwe. 5Aholu, gikhati Silasi ni Thimoti va nga vbohago khu Makedhoniya, Pawulo a di dzi ningela khu tshivba thumoni nya guhevbudze mahungu basi, nyamba thuma mumbe thumo; a tivisa ga Vajudha khuye Jesu khuye Kristo. 6Na wone gubomba gwawe ni gupwa magana nya guvale, a di khuga a phuphutha dzingandzu dzaye a va embela khuye: "Novba wanu wu na vbalagele mihungoni gwanu, eni kha mu nyi woni, nyi agile, gu khugela muhuno nyi na hongola ga va nya mayigo." 7Na hambane navo, a di ya khala ndrangani ga mwama moyo nya gu pwani khu Justo. Mwama a nga bani a gu khozela Nungungulu, ndranga yaye yi diri vbafuvbi ni nyumba nya nombelo. 8Kristo, muthangeli nya nyumba nya nombelo, a di khodwa ga Pfhumu, gumogo ni ndranga yaye yatshavbo. Vakorinto nya vangi va nga pwa Pawulo va di khodwa, va gu bhapatiswa. 9Ni wutshigu, Pfhumu a di embela Pawulo khu umo nya giwoniso, khuye: "U nga thavi gilo, simama gu ganela, u nga deguli, 10kholu eni nyi nago. Mwalo a na handzegago mandza vbatshani gwago. Kholu nyi na ni vathu nya vangi dhoropani momu." 11A di khala iyo mwaga ni gipandre, a va hevbudza mahungu ya Nungungulu. 12Galiyo, nari mwamangulu wa Akaya, Vajudha va di pwanana va wugela Pawulo va mu yisa phathani, 13va ya khavo: "Muthu yoyu a gu kutsedzela vathu gukhozela Nungungulu khu magirelo nya guhambane ni nayo." 14Pawulo, na nga guvbweta gutula likana a hakha, Galiyo a di embela Vajudha khuye: "Upwani Vajudha, nari gu pwani a diri nandru nya wughevenga na nyi gu hakha mahungu yanu. 15Aholu, a gu bani ari mahungu nya guganedzisaneni khu kota nya lina ni nayo wanu, si woneni enu vamune. Eni nyi ngu bomba gu khala mulamuli nya silo sesi." 16A di va tutumisa phathani. 17Khavbo avbo, vatshavbo va di wugela Sostene, muthangeli nya nyumba nya nombelo, va mu veta vbafuvbi ni phathani Aholu, Galiyo kha nga si thela kota. 18Pawulo khade gikhati nya gulaphe Korinto, khavbo avbo a di vbangana vandruye a khilela ngalava a gu hongola Siriya. Prisila ni Akila va di mu bangaladza. A di dzi vila ndzudzu dhoropani ga Senkreya khu kota nya gisambanyo a nga bani a girile. 19Va di vboha Efeso, avbo a nga ya hambana ni vangana vaye. Uye a gu hongola nyumbani nya nombelo a ya ganedzisana ni Vajudha. 20Va di mu lomba gu khala naye gikhati nya gulaphe; Uye a di bomba. 21Aholu na gu va vbangana a di va embela khuye: "Nyi na wuya nyi ta mi holelani, Nungungulu a gu phasa," a phara ndzila a hongola 22a ya tshigela dhoropani ga Sezareya, a gwela Jerusalema a ya losana ni libandla. Khavbo avbo, a di relela Antiyokiya. 23Na khade iyo gipimo nya gukari, a di bwelela nya luphye, a gimbila khu madhoropani yatshavbo ya tigoni ga Galatiya ni Frijiya, a tiyisela vapizane vatshavbo. 24A di vboha Efeso mwama moyo nya Mujudha nya gupwani khu Apolo, givelegwa gya Alexandriya, a diri mwama a nga bani a etile khu gu hevbula Milowo. 25A di hevbudza guti ndzila ya Pfhumu, ambari ulo a nga bani a guti basi gubhapatisa ga Johane, a di tshumayela ni gu hevbudza khu nongameto satshavbo esi si ganelago khu mahungu ya Jesu. 26A di phela gu ganela khu gu tiya nyumbani nya nombelo. Prisila ni Akila, na va mu pwide, va di mu dzega va gu mu sasamedzela gwadi ndzila ya Nungungulu. 27Kha nga a nga bani a gu vbweta gu hongola tigoni ga Akaya, vandruye va di mu tiyisela, va gu lova lidangalila ga vapizane gasi va mu hakhe. Na vbohide a di gira, khu wuhigo wa Nungungulu, giphaso nya gikhongolo ga makhodwa. 28Kholu a di ganedza Vajudha khu tshivba vbakari nya vathu, a va yeyedza khu Milowo khuye Jesu khu Kristo.


Copyright
Learn More

will be added

X\