MITHUMO 15

1Va di relela khu Judheya va ta Antiyokiya vathu va ngata hevbudza vandruye khavo: "Mwa gu mba hana wugwera, ni gu landrisa Nayo wa Mosi, gima kha mu na dzikodza gu vbanyiswa. 2Gu di manega gu ganedzisana nya gukhongolo, kholu Pawulo ni Bharnabha va di hambana ngudzu ni sihevbudzo sawe. Va di pwanana vatshavbo va rumela Pawulo ni Bharnabha ni vambe vandruye, va gwela Jerusalema gu ya wudzisa mahungu yaya ga vapostoli ni madhota. 3Avo, na va dongisedwe khu libandla la Antiyokiya, va di phara ndzila va gu hongola. Va di tsemakanya Fenisiya ni Samariya, va gu tshamusela gu vbindrugedza ga va nya mayigo va gu nengedzisa ngudzu vandruye vatshavbo. 4Na va vbohile Jerusalema va di hakhwa gwadi khu libandla, ni Vapostoli, ni madhota, va gu tshamusela siliwugiso Nungungulu a nga girago khu avo. 5Aholu, vambe nya tsawa nya vafarisi va nga bani va khodwe va di ganela khavo gu vbwetega va nya mayigo va bela wugwera, va landra Nayo wa Mosi." 6Vapostoli ni madhota va di tshangana gasi guhevbula mahungu yaya. 7Gu di manega gu ganedzisana nya gukhongolo ngudzu, Pedro a khuga a ema, a ganela khuye: "Vandruye, mu ngu dzitini nya gukhenu Nungungulu a nyi hathile vbakari gwanu, gukhugela matshiguni nya guhegule, gasi va nya mayigo vapwe Ivhangeli khu kanani gwangu, va khodwa. 8Uye Nungungulu atigo myonyo, a va girede wukustumunyu, khu gu va ninga Liphuvbo nya gu Age kha nga a nga hi ningago ethu. 9Kha vega guhambana ga ethu ni avo, aholu a di agisa myonyo yawe khu gukhodwa. 10Khu ginani olu mu vbwetago gu linga Nungungulu khu gu rwega vapizane pingwi nya gu ambari vababe vathu ni ethu kha wu hi vbevbugeli gu wu rwala? 11Kholu hi ngu khodwa gu khethu ha gu vbanyiswa khu wuhigo wa Pfhumu Jesu, kha nga avo navo." 12Khavbo avbo, gu di gira kape libandla latshavbo. Va yingisa Bharnabha ni Pawulo na va gu thsamusela siwoniso ni siliwugiso satshavbo Nungungulu a nga girago khu avo vbakari nya va nya mayigo. 13Na va vbedzile gu ganela, Jakobe a di khusa lito a gu ganela khuye: "Vandruye, nyi yingiseni: 14Simoni ganede khu edzi Nungungulu, gu khugela guhegulani, a hathidego khidzo vbakari nya va nya mayigo vale va na ranwago vathu vaye. 15Ma ngu tadzisega magana ya vaprofeti; kholu gu lovidwe pwani: 16'Khu hwane nya esi nyi na wuya nyi ta wusedza tshatsha wa Dhavide wu thegidego nyi na vbahedza marumbi yawe, nyi va emisa, 17gasi vathu vatshavbo vale va nga tshadego va vbwete Pfhumu. Gumogo ni va nya mayigo vatshavbo va agisedwego Lina langu, 18a ngu ganela Nungungulu a nga tulelago gu tidwa silo sesi khu myaga ya gale.' 19Khu kharato eni nya gu wona gu kheni hi nga va garadzi va nya mayigo va vbwetago gu vbindrugedza mavbanyelo va khodwa ga Nungungulu. 20Va na ningwe basi nayo nya gu mba hodza nyama nya guphasedwe dzinguluve ni nyama nya sirengo nya gufe khu gu tshwedza, ni gu diga wubhayi, ni gu mba hodza novba. 21Kholu, gukhugela matshiguni ya gale, Mosi na ni vahevbudzi nya Nayo va wu hevbulago mu dzinyumbani nya nombelo khu dzisabhado dzatshavbo." 22Khavbo avbo, Vapostoli ni madhota, na va pwanane ni libandla latshavbo, va di hatha vama nya gukari vbakari gwawe, va gu va rumela Antiyokiya gumogo ni Pawulo ni Bharnabha, ni Silasi, vama nya gutumbege vbakari nya vandruye. 23Va di va ninga lidangalila leli: "Ethu vapostoli ni madhota, hi gu vandriyanu, hi ngu mi losani enu mwatshavbo vandruye va nya mayigo mu vbanyago Antiyokiya, ni Siriya, ni Silisiya. Seweni! 24Na hi dzitide nya gukhethu va dugile vathu khu tsawani gwathu va nga ta mi hambanisa mapimo khu gu ganela gwawe va gu khunguvanyisa mihefemulo yanu, 25hi hungile khu monyo moyo gu hatha madhota hi ma rumela iyo gwanu gumogo ni Bharnabha ni Pawulo, 26vama va ningedego womi wawe khu kota nya Lina la Pfhumu Yathu Jesu Kristo. 27Khavbo avbo, hi ngu mi rumelani Judha ni Silasi, avo va na ta ganela khu magana yawe mahungu yaya ya mamowo. 28Liphuvbo nya gu Age ni ethu, hi wonile gu khethu gwadi gumba mi ningani rwalo nya gulemele, vbavbandze nya milayo yeyi yi vbwetegago: 29Mu diga gu hodza esi si phasedwego dzinguluve, ni novba, ni nyama nya sirengo nya gufe khu gu tshwedza, ni gu diga wubhayi. Mu na gira gwadi mwa gu dzi vegisa ga silo sesi. Vbanyani gwadi." 30Vale va nga rumedwago, va di relela Antiyokiya, na va vbohile, va di tombanisa libandla, va gu ningela lidangalila. 31Na va li hevbude, va di nengela khu gu tiyisedwa va gu manego. 32Judha ni Silasi va nga bani vari vaprofeti navo, va di luleka vandruye va gu va tiyisela khu magana nya mangi. 33Na va vbedzile matshigu nya gukari, vandruye va di va vbangana ni malosedzela nya gurule ga vale va nga va rumelago. [ 34Aholu Silasi a di hatha gu tshala Antiyokiya.] 35Pawulo ni Bharnabha va di khala Antiyokiya gumogo ni vambe va hevbudza ni gu ganela mahungu nya yadi ya Pfhumu. 36Khu hwane nya matshigwana, Pawulo a di embela Bharnabha khuye "Hongole hi bwelela hi gimbila hi holela vandriyathu madhoropani omu hi nga hevbudza mahungu ya Pfhumu, hi vati va ngu vbanya kharini." 37Aholu Bharnabha a di vbweta gu dzega nuye Johane a ranwago Marko. 38Pawulo kha nga wona gwadi gu hengela ni wule a nga va diga Panfiliya a si hengeli navo thumo. 39Gu di manega gu ganedzisana nya gukhongolo va hegisa khu gu hambana. Khavbo avbo Bharnabha a di dzega Marko a khilela ngalava a gu hongola naye Kipra. 40Aholu Pawulo, na hathile Silasi a di dongiswa khu vandruye wuhigoni ga Nungungulu a phara ndzila a hongola. 41A di vbindra khu Siriya ni Silisiya a tiyisela mabandla.

will be added

X\