MITHUMO 14

1Pawulo ni Bharnabha, na va vbohide Ikoniya, va di bela nyumbani nya nombelo nya Vajudha, va gu ganela khu tshivba. Vathu nya vangi va di khodwa, Vajudha ni Vagreki. 2Aholu, Vajudha vale va nga bomba gukhodwa, va di kutsedzela mahedheni gu wugela vandruye. 3Aholu Pawulo ni Bharnabha va di khala dhoropani mule matshigu nya mangi, na va gu tumba Pfhumu, a nga bani a gu tadzisela tshumayelo yawe khu siwonegiso ni siliwugiso si nga bani si girega khu mandza yawe. 4Aholu, vathu va dhoropani va di kabanega. Vambe va di ema ni Vajudha, vambe va gu ema ni vapostoli. 5Mahedheni ni Vajudha na va gu thangedwa khu vafumeli vawe, va di hunga gikungu nya gu va poyile ni gu va pfara khu siwindri. 6Na va dzitide, vapostoli va di thavela tigoni ga Likawoniya, madhoropani ya Listra ni Dherbhe, ni mayigwana ya vbafuvbi. 7Iyo va nga ya tshumayela Ivhangeli. 8Listra a di gu vbanya mwama moyo nya guhase mawundru, gukhugela guvelegwa gwaye adiri gigoha, nyamba gimbila. 9A di yingisa Pawulo na gu ganela. Uye Pawulo a di khusa maho a mu khedza a wona gu khuye a na ni gukhodwa nya guyele guhawulugiswa, 10a di mu embela khu lito nya likhongolo khuye: "Khuga u lulame khu mawundru yago." Uye a di ndraga a khuga a gimbila. 11Na va wonile esi si nga girwago khu Pawulo, gidzemo gi di gira ligwaha gi gu ganela khu lidimi la Likawoniya khigyo: "Vanungungulu va tshigidego gwathu khu giemo nya wuthu" 12Va di rana Bharnabha khavo khu Jupiteri, Pawulo khavo khu Hermesi kholu adiri uye a nga bani a gu ganela gwawe. 13Vaphasi nya mhamba ya Jupiteri va nga bani vari ni nyumba yawe vbavbandze nya libhiyo nya lidhoropa, va dita ni dzimombe nya vamatune ni matamo nya senge vbalidimbatunu, na va gu vbweta gu gira mhamba gumogo ni gidzemo. 14Na va pwide silo sesi, vapostoli Bharnabha ni Pawulo, va di pferula dzingandzu dzawe va gu bela vbakari nya gidzemo va ganela khu tshivba khavo: 15"Madhota, khu ginani mu gira esi! Ethu nethu hi vathu kha nga enu, hi na ni mavbanyelo mamowo ni enu, ha gu mi tivisa Ivhangeli gasi mu vbindrugedza mavbanyelo mu gu diga vanungungulu nya liphanga, mu khodwa ga Nungungulu a vbanyago, Uye a nga gira mafu ni ndzadzi, ni yiphwa ni satshavbo si guromo umo. 16Ga mimela yi vbindridego dzumedzisile gu khuye vathu va gimbile khu dzindzila nya tumbunuko wawe; 17Kha diga gu dzi yeyedza khu wukustumunyu nya esi nya sadi a nga girago; a resa khu vbatshani ndzadzi, ndzinango nya dzimbewu, a gu mi khurisa, a tadza myonyo yanu khu gunengela." 18Ambari ulo, kha sa va vbevbugela gu digisa gidzemo gu va girela mhamba. 19Va di ta Vajudha khu Antiyokiya ni Ikoniya va ta kutsedzela vathu gu va wugela. Va di veta Pawulo khu siwindri, va mu ndrindra va gu duga naye vbavbandze nya lidhoropa khavo fude. 20Na randredwe khu vapizane, a di khuga a ema a gu bela dhoropani. Khu mindru gakone va di phara ndzila gumogo ni Bharnabha va gu hongola dhoropani ga Dherbhe. 21Hwane nya gu na va tshumayede Ivhangeli dhoropani mule, ni gu gira vapizane nya vangi, va di bwelela Listra, Ikoniya ni Antiyokiya. 22Va di tiyisela myonyo nya vapizane, va gu va khongotela gu tiya gukhodwani gwawe, kholu, va di gu ganela khavo: "Gu vbwetega guvbindra khu sigaradzoni nya singi gasi gu bela Mufumoni wa Nungungulu." 23Na va girile milombelo ni gu hala, va di hatha madhota khu libandla ni libandla va gu ma vega mandzani ga Pfhumu va khodwego gwaye. 24Khavbo avbo, na va tsemakanyile Pisidiya, va di vboha Panfiliya. 25Hwane nya gu bani va tivisile mahungu ya Nungungulu tigoni ga Perga, va di relela Ataliya, 26va ya khilela ngalava va gu bwelela Antiyokiya, eyi va nga khuga khiyo, na va lombeledwe wuhigo wa Nungungulu gasi gu ya thuma thumo va nga rigu gu wu gira. 27Na va vbohile, va di tombanisa libandla va gu va embedzela satshavbo iso Nungungulu a nga girago navo, ni edzi Nungungulu a nga tulelago khidzo ndzila nya gukhodwe va nya mayigo. 28Va di khala ni vapizane matshigu nya mangi.

will be added

X\