MITHUMO 13

1Umo nya libandla nya makhodwa ya Antiyokiya, va di romo vaprofeti ni vahevbudzi: Bharnabha ni Simoni a nga bani a gu ranwa pwani Nigeri, ni Lusiyu wa Sirene, ni Manaheme a nga dandra gumogo ni mufumeli Herodhi, ni Sawulo. 2Vari vbakari nya nombelo wa Pfhumu ni guhala, Liphuvbo nya gu Age li di ganela khilo: "Nyi kaseleni Bharnabha ni Sawulo gasi va phara thumo nyi va ranedego uwo." 3Khavbo avbo, va di hala, va gu gira milombelo, va gu va handzega mandza, va gu va vbangana va hongola. 4Na va gu rumwa khu Liphuvbo nya gu Age, va di relela Selewusiya, Khiyo va nga ya khilela ngalava va gu hongola Kipra. 5Na va vbohile gidwane gya Salamina, va di tivisa Mahungu ya Nungungulu mu dzinyumbani nya nombelo nya Vajudha, gumogo ni Johane kha nga muphasedzeli wawe. 6Va di dzuwulugela gidwa gyatshavbo kala va gu vboha dhoropani ga Pafosi, iyo va nga ya manago Mujudha moyo nya gupwani khu Barjesu a nga bani a gu thumisa wun'yanga ni wuprofeti nya malipha. 7Uye a di gu khala ni pfhumwana nya gukari nya gupwani khu Serjiyo Pawulo, mwama nya mapimo. Uye, na ranisile Bharnabha ni Sawulo, a di vbweta gupwa mahungu ya Nungungulu. 8Aholu, Elimasi, lina li tshamuselago pwani nya wun'yanga a di va wugela, na gufela gu ndreyisa mufumeli wule ndzilani nya wukhodwa. 9Aholu, Sawulo, a ranwago gambe khu lina la Pawulo, na tade khu Liphuvbo nya gu Age, a di mu khedzisa gwadi mahoni a mu embela khuye: 10"Uwe u gyanana gya Sathane, u tadego khu malipha ni guvivba gwatshavbo, nala nya silo satshavbo nya gululame, u na hegisa lini gu tshunganisela dzindzila nya gululame dza Pfhumu? 11U ngu wona, Pfhumu a na khusa gyandza gyaye a gu veta. U na khala gikhumu ndrani nya matshigwana, nyamba wona safa nya lidambo." Khu gikhati gyogyo gu di phuma, gu manega gidema mahoni gwaye. A di gimbila khu gu phuphuthela a vbweta muthu nya gu mu phare kunga. 12Khavbo avbo, mufumeli, na wonile esi si nga dugelela a di khodwa na gu liwuga sihevbudzo sa Pfhumu. 13Na va khugide khu Pafosi, iyo va nga ya khilela ngalava, Pawulo ni vangana vaye va di hongola Perga, talala wa Panfiliya gasi Johane a di va diga a gu bwelela Jerusalema. 14Avo va di khuga khu Perga, va gimbila, va gu hongola mbeli kala va gu vboha tigoni ga Antiyokiya ga Pisidiya. Khu litshigu nya Sabhado, va di bela nyumbani nya nombelo va gu khala vbavbatshi. 15Na va hevbude lidangalila nya Nayo ni eli nya vaProfeti, vathangeli nya nyumba nya nombelo va di va embela khavo: "Vandruye, mwa gu bani muri ni mahungu nya gulose khayo libandla, ganelani." 16Khavbo avbo, Pawulo, na khugide a ema, a di khusedza mandza a va embela khuye: "Madhota ya na Israeli ni enu mu gu ni githawo ga Nungungulu, yingisani: Nungungulu nya libandla leli, 17Nungungulu wa Israeli hathile vakokwe vathu, a gu dandrisa vathu vaye gikhati va nga ya khala Egipito. Khu hwane nya gikhati a di va dusa khu Egipito, khu tshivba nya libogo Laye. 18Gipimo nya magumi mana myaga a di va sayisa khu lihaladzo mu giwulani. 19Khu hwane nya gikhati a di fuvisa livbandre na mavili mahundzu ya tigoni ga Khanani, a gu li ningela ga vakokwe vathu, 20gipimo nya mazana mana ni livbandre magumi myaga. Khu hwane nya myaga yoyo a di va ninga valamuli kala gikhati gya muprofeti Samueli. 21Khavbo avbo, va di lomba mufumeli, Nungungulu a di va ninga Sawulo, mwamana wa Khisi, nya lihundzu la Bhenjami, a nga va fumela gipimo nya magumi mana myaga. 22Nungungulu, na dusile Sawulo vbagikhalotunu nya wufumu, a di va tulela gu hatha Dhavide kha nga mufumeli wawe. Khuye a nga mu thulago khuye: 'Nyi mane Dhavide, mwamana wa Jese, mwamana a tsakisago monyo wangu, a na londrowodzago guhaladza gwangu gwatshavbo.' 23Ndrani nya livelego la Dhavide, kha nga gutumbisa ga Nungungulu, velegidwe Muvbanyisi wa na Israeli, a gu uye Jesu. 24Na si gu vbohi Jesu, Johane a di ganela khu gu bhapatiswa nya guvbindrugedze ga vathu vatshavbo va na Israeli. 25Nari vbafuvbi nya guvbedze thumo waye, Johane a di khuye: 'Eni khandreni wule mu mu alakanyelago, aholu a nguta hwane gwangu wule nyi si faneligo gu tshula silato nya migondro yaye.' 26"Vandruye, mu gu sanana nya melego wa Abrahama, ni ava va guromo vbakari gwanu, va ningago githawo Nungungulu, mahungu yaya nya guvbanyise ma gu rumedwa avbo gwathu. 27Vathu va Jerusalema ni vafumeli vawe, khu gumba muti Jesu, va di mu mola, va tadzisela kharato magana ya vaprofeti ma hevbudwago khu dzisabhado dzatshavbo. 28Ambari va nga hamuga nandru nya gu mu songe va di lomba ga Pilato a mu songa. 29Na gu tadzisegile khu mandza yawe satshavbo esi si nga lowa khu mahungu yaye, va di mu tshisa khu vbagihambanotunu, va mu vega thowoni. 30Aholu, Nungungulu a mu wusile khu ga vafudego. 31Matshigu nya mangi a dzi wonegisile ga vale va nga gwelago Naye gukhugela Galileya kala Jerusalema; Avovo khavo va khadego dzifakazi dzaye vbakari nya vathu. 32Ethu hi ngu mi tivisa mahungu nya yadi. 33Nungungulu tadzisile ga ethu, sanana, gitumbiso a nga gira ga vakokwe vathu, khu gu wusa Jesu. Kha nga gu lovidwego umo nya Dzindzimo, pwani: 'Uwe u Mwamana wangu nyi gu velegidego muhuno.' 34Edzi nya gupwani Nungungulu a na mu wusa, ni gu pwani gima kha na nga wona guhina, khiso si nga ganedwa umo nya milowo, yi gu khiyo: 'Nyi na tadzisela avbo gwanu situmbiso nya guage nyi nga gira ga Dhavide.' 35Gu ngu ganedwa gambe ga yimbe Ndzimu pwani: 'Khu na nga dzumedzisa gu khuwe gihathwa gyago gi wone guhina.' 36Wonani, Dhavide fude hwane nya gu na enedzile matshigu nya thumo waye, na gu landrisa guhaladza gwa Nungungulu. Na dzingidwe, a di ya lala ni vakokwe vaye a gu hina. 37Aholu, oyu Nungungulu a nga mu wusago, kha wona guhina. 38Khalani na mu gu dziti, vandruye, gu khenu gutsetseledwa nya sighoho gwa gu tiviswa khu lina laye. 39Gusayedwa gululama nya guvbelele, gule mu ngamba gu mana khu Nayo wa Mosi, gu ngu manwa khu muthu watshavbo a khodwago ga Jesu. 40Dzi woneleni, gasi si si dugeleli gwanu iso si nga ganedwa khu vaProfeti, nya gupwani: 41'Wonani, enu vayeyisi;liwugani mu mwalalega!Khaguva nyi na wusa matshiguni yanu thumo moyo nya gu, mwa sa khodwa, nari pwani mu diya khu gu embedwa.' " 42Pawulo ni Bharnabha, na va dugile khu nyumbani nya nombelo, vathu va di ta va lomba, gu ta ganela gambe mahungu yaya khu Sabhado yi landrelago. 43Na vbede tshangano, Vajudha nya vangi, ni vathu nya githawo ni gu khozela Nungungulu va di landrela Pawulo ni Bharnabha. Avo va di va khongotela va simama gu khala na va tumbegile wuhigoni ga Nungungulu. 44Khu Sabhado yi nga landrelago, vathu vatshavbo va dhoropani va di tombana gu tapwa mahungu ya Nungungulu. 45Vajudha na va wone gutala nya vathu va di tala khu lidiwo, va gu ganedza ni gu poyila magana ya Pawulo. 46Aholu, Pawulo ni Bharnabha va di ganela khu gutiya khavo: "A diri fanelo gu hegula khenu mu gu embedwa mahungu ya Nungungulu. Aholu, kha nga mu ma bombago, ni olu mu dzi lamulago mwabune gu khenu kha mu fanedwi khu guvbanya nya gupindruge, khu kharalo, ethu hi na thendregedza hi ya ma ningela ga va nya mayigo. 47Kholu Pfhumu a hi rumile khuye: 'Eni nyi gu vegide kha nga wenengedzo nya mayigo gasi u khale ndzila nya guvbanyiswe gwawe kala mahegiso nya litigo.' " 48Va nya mayigo, na va pwide magana yaya, va di nengela, va gu rungudza mahungu ya Pfhumu; vatshavbo va nga bani va emisedwe guhakha guvbanya nya gupindruge, va di khodwa. 49Mahungu ya Pfhumu ma di phalalega ni litigo latshavbo. 50Aholu Vajudha va di kutsedzela vanyamayi nya makhodwa nya guthavisege, ni vama nya sitetema va dhoropani mule va wugela Pawulo ni Bharnabha kala va gu va tutumisa tigoni gwawe. 51Aholu, vapostoli va di phuphutha kudzudzwane migondroni gwawe, gu yeyedza guhambana navo, va phara ndzila va hongola dhoropani ga Ikoniya. 52Aholu, vapizane va di tala khu gunengela ni Liphuvbo nya gu Age.


Copyright
Learn More

will be added

X\