3 JOHANE 1

1Eni, lidhota nya Libandla, nyi ngu losa Gayo nyi mu golago khu lisine. 2Gigodwa gyangu nya gigodwa, nyi ngu lombelela ga Nungungulu, gu kheni u vbanye gwadi womi wago kha nga edzi u gu wadi khidzo hefemuloni. 3Nyi nengede ngudzu khu gikhati va ngatago vambe vandruye va ta nyi embela gu khavo uwe u tumbegile lisineni, ni gu khavo wa gu vbanya mu lisineni gikhati gyatshavbo. 4Gi mwalo gi nyi tsakisago guvbindra gupwa gu pwani sanana sangu si ngu vbanya khu gu landra lisine. 5Gigodwa gyangu, uwe u tumbegile ga esi u girelago vandruye, ngudzungudzu vawuyi. 6Avo va ngu ganela vbakari nya Libandla khu mahungu nya lihaladzo lago. Gira wuhindzi u phasedza vathu vovo gu simama ni liendro lawe khu magirelo nya gutsakise. 7Kholu avo va phede liendro lawe nya guthumele Kristo nyamba dzumela gu hakha giphaso gya va nya mayigo. 8Ethu hi ngu yela gu phasa vathu vovo. Kharato hi na hengela navo thumoni wawe nya gutivise lisine. 9Eni nyi lovide lidangalilana ga Libandla, aholu Diotrefe kha khathali khu esi nyi ganelago kholu a gu gola gu ruma uye. 10Khu guralo, gikhati nyi na vbohago iyoyo, nyi nata mu kawuka, khu kota nya esi a girago: khu kota nya silo nya guthise ni malipha a ganelago khu ethu. Aholu, kha tsaki basi khu gu gira isoso, kholu va gu vboha vandruye, uye kha va hakhi. Mumbe muthu a gu vbweta gu va hakha uye kha mu dzumedzisi, gambe a gu mu tutumisa muthu yoyo ndrani nya Libandla. 11Gigodwa gyangu nya gigodwa, uwe pimedzela esi nya sadi, nasiri esi nya guvivbe. Oyu a girago gwadi khwa Nungungulu, oyu a girago guvivba, gima a si gu mu woni Nungungulu. 12Vathu vatshavbo va gu zundza Dhemetriyo. Ambari lisine nilo li ngu mu zundza. Ethu nethu hi ngu mu zundza. Uwe u ngu dziti gu khuwe esi hi ganelago lisine. 13Nyi ngari ni singi nyi vbwetago gu gu embela, aholu, kha nyi vbweti guya khu gu lova. 14Nyi ngu tumba guta wonana nago nyamba hwela, khavbo hi na guta bhulago giwoni ni giwoni. 15Gurula gu na khale ni uwe. Dzipari dzago dzatshavbo dzi ngu gu losedzela. Losedzela moyo ni moyo dzipari dzathu.

will be added

X\