2 THIMOTI 4

1Eni nyi ngu gu sambanyisa mbeli ga Nungungulu ni ga Jesu Kristo a na gutago a ta lamula va nya guvbanya ni va nya gufa khu gu dzi wonegisa ga Kristo ni mufumu waye. Nyari kheni 2ganela Mahungu nya Yadi u simamisa gu gira kharato, gikhati nya gugaradze nigyo nya guvbevbuge kawuka, luleka ni gukhongotela khu gutimisela gwatshavbo ni guhevbudza. 3Kholu, gi nguta gikhati vathu va na gu bombago sihevbudzo nya guvbanyise; olu va gu ni dzindezeve nya gunyaganyele, va na dzi vbwetela vahevbudzi nya vangi, va na ganelago silo si tsakisago myonyo yawe. 4Va na diga gu yingisa sihevbudzo nya lisine va gu tutumela mitsheketo. 5Aholu, uwe tiya u timisela sigaradzo satshavbo, dzi vegise thumoni gwago nya gutivise Mahungu nya Yadi, u vbedzisa thumo wago. 6A gu bani ari eni, nyi lulamide gu khala mhamba kholu, gikhati gyangu nya gufe gi ngu vboha. 7Nyi dwanile litunga nya ladi. Nyi vbedzide gututuma ni gu sayisa gukhodwa gwangu. 8Olu gu tshade basi gu hakha tshatshazelo wangu owu Pfhumu a na gu nyi ningago khu litshigu lakone. Uye khuye Mulamuli nya lisine. A na nyi ninga tshatshazelo, nasiri eni basi, aholu ni vale vatshavbo va nga lindrela khu lihaladzo guwuya gwaye. 9Vbiredza nugunugu olu ute ino gwangu, 10kholu, Dhemasi a nyi digile khu gu vbweta silo nya mafu, hongode Tesalonika, Kreski hongode Galatiya, Tito hongode Dalamitiya. 11Khu Luka basi a gu ni eni. Delu ni Marko, kholu a ngu nyi phasa thumoni momu. 12Tikiko nyi mu rumede Efeso. 13Wa guta, delu ni libhadzi langu nyi nga li divala Trowade, ndrangani ga Karpo. Delu gambe ni mabhuku, ngudzungudzu aya nya gulowe vbamalowotunu. 14Alexandre, mupfhuli nya dzisimbi a nyi hosede ngudzu, Nungungulu a na mu bweledzela mithumo yaye. 15Dziwonele nuwe gwaye kholu khuye a nga wusa sigaradzo ni gu ganedza tshumayelo yangu. 16Gulamudwani gwangu nya guphele mwalo na moyo a nga nyi emela, vatshavbo va di nyi diga. Nungungulu a na va tsetselele. 17Aholu, Pfhumu yi diri ni eni yi nyi ninga tshivba nya gutivise Mahungu maphya nya Yadi ma hakhwa khu va nya mayigo. Khu kharato, nyi vbulugile kanani nya nghala 18Pfhumu a na nyi vbulugisa guvivbani gwatshavbo, a na nyi ninga guvbanya Wufumuni gwaye wa ndzadzini. Wudhumo wu na ningwe Uye kala gupindruga. Amen. 19Losedzela Priska ni Akila ni ndranga ya Onesiforo. 20Erasto tshade Korinto, Trofimo nyi mu tshide na gu dwala tigoni ga Mileto. 21Gira tshivba ute ino gi si gu pheli girame. Ewubolo, Pudenti, ni Lino, ni Klaudiyo ni vathu vatshavbo va Nungungulu va ngu gu losedzela ngudzu. 22Pfhumu a na khale ni uwe, wuhigo wa Nungungulu wu na khale ni enu.

will be added

X\