2 THIMOTI 2

1Uwe, mwanangu, tiya gukhodwani ni wuhigo wutago khu ga Jesu Kristo. 2Esi u nga hevbulago gwangu vbakari nya dzifakazi nya dzingi, hevbudza vathu va tumbegidego va na gu kodzago gu hevbudza navo vambe. 3Hakha sigaradzo satshavbo si tago nga musotshwa wa Jesu Kristo. 4Oyu a hongolago litungatunu aya dwana mwalo mahungu ni gu khedza silo nya guvbanye gwaye, a gu vega mapimo yaye ga muphari nya litunga, gasi a mu tsakisa. 5Muthu a gu hongola mapalisanatunu nya gututume a gu hakha na vbedzide thumo. 6Mulimi a thumidego a na ni fanelo nya guhegule khuye a gu hodza mihandro nya thumo waye. 7Si vegise gwadi esi nyi gu embelago, Pfhumu yi na gu phasa guti satshavbo sesi. 8Dundruga Jesu Kristo a wugidego khu ga vafudego. Uye khwa nyumbani ga Dhavide, nga edzi nyi hevbudzago khidzo omu nya Ivhangeli nyi tivisago. 9Eni nyi ngu saniseka khu kota nya Ivhangeli kala nyi hungwa dzitshinga kha nga gighevenga. Aholu, Mahungu ya Nungungulu kha ma hungwi dzitshinga. 10Eni nya gutimisela satshavbo khu kota nya sihathwa, nya gugirela gu kheni anavo va mane guvbanyiswa gogu ga Jesu Kristo, gumogo ni gidhumo nya gupindruge. 11Li tumbegile lito leli li gu khilo: "Ha gu bani hi fude ni Kristo, hi na vbanya gambe naye" 12Ha gu tumbega hi tiya, hi na fuma naye. Ha gu mu danga, uye nuye a na hi danga. 13Ha mba tumbega ethu, uye a na simama gu tumbega kholu uye kha dzi khodzi gu dzi danga abune. 14Va embele, u va dundrugisa silo sesi khu lina la Nungungulu, gasi gu si manegi guganedzisana nyamba phasa gilo, gu phalalegisa vale va gu pwago. 15Khala nu dzi dongisede u manega mbeli gwa Nungungulu nga githumi nyambana dzitshoni, nga idzo a dzinago khidzo uye. Khu kharato, ganela mahungu nya lisine, nya gululame. 16Hambana ni mabhulo nya guvivbe ma si phasigo gilo, ma engedzela vathu gumba khodwa. 17Magana ya ava va ganelago kharato ma gu dandra nga gilondra nya likhoro. Vbakari gwawe khu Eminewu ni Fileto. 18Avo va hambanide ni lisine, khavo va vbedzago tshivba nya gukhodwe vambe vathu, khu gu khavo, guwuga ga vafudego gu vbindride. 19Aholu tiyiso wu nga emiswa khu Nungungulu wu tiyide, wari khuwo: "Pfhumu a ngu va ti avo va gu vaye." Gu lovidwe gambe pwani: "Vatshavbo vale va dhumisago lina la Pfhumu, kha va beli guvivbani." 20Nyumbani nya gitetema kha si khali basi sombo nya ndralama ni prata, aholu, somo gambe sombo nya guvatwe niso nya libumba. Simbe sa gu thuma khu matshigu nya makhongolo nya guhakhe vapfhumba, simbe si thuma matshigu yatshavbo. 21Khu kharato, oyu a handzegidego ga silo sesi, a na khala nga gyombo gi agidego, gi hathwa khu mune wa igyo a gi dongisela gu thuma satshavbo nya sadi. 22Uwe u nga hengeli ni madzaha u dogorela esi nyambaya khumo. Vbweta lisine, ni gukhodwa ni lihaladzo ni gurula ga vatshavbo vale va khodwago ga Pfhumu khu myonyo yi agidego. 23U nga dzumeli gu hakha mahungu nya wupumbu. U ngu dziti gwadi nya gukhuwe ma gu vanga guhambana. 24Oyu a guromo thumoni wa Pfhumu mwalo fanelo nya gubele nuye mihambanoni. Aholu, gu vbwetega gu pwanana ni vathu vatshavbo ku githawo ni gu kodza guhevbudza lisine ni gu timisela guvivba gwatshavbo. 25Gu vbwetega gu kodza gu kawuka valala vaye khu gwadi, gasi Nungungulu, a gu dzina saye, a va ninge mapimo nya gulandre lisine. 26Khu kharato, va na vbuluga naphuni wa Sathane va hungidwego khuwo, gasi va gire edzi dzaye a dzinago.

will be added

X\