2 THIMOTI 1

1Eni, Pawulo, Mupostoli wa Jesu Kristo khu guhaladza ga Nungungulu, nyi rumidwego gu tivisa gitumbo nya guvbanye, a hi giredego khu Jesu Kristo, 2nyi ngu gu lovela lidangalila leli uwe Thimoti, mwanangu nya gigodwa, kheni, Nungungulu Babe ni Jesu Kristo, Pfhumu yathu, va na gu ninge gutsaka ni lihaladzo ni gurula. 3Nyi ngu bonga Nungungulu oyu nyi mu thumelago khu mapimo nya lisine, nga edzi va nga girago vakokwe vangu. Gikhati gyatshavbo nyi ngu gu dundruga wutshigu ni mihani milombeloni gwangu. 4Nyi ngu guti gulila gwago, nyi ngu dogorela gu gu wona gambe, gasi nyi tala khu gutsaka. 5Nyi ngu dundruga gwadi gukhodwa gwago nyamba sengedzela, gu khade nga ogu a nga bani ari nago guhegula kokwe wago Loyide ni mayi vago Eunise. Nyi ngu ganela khu lisine kheni khugo saye gukhodwa u gu nago uwe. 6Khu kharato, nyi ngu gu laya kheni sayisa gwadi, gikhati gyatshavbo giningwa gya Nungungulu u hakhidego khu gu handzegwa mandza yangu. 7Kholu, Nungungulu kha hi ninga liphuvbo nya hwanga, aholu, a hi ningide liphuvbo nya tshivba ni lihaladzo ni gu dzi phara. 8Khu kharato, u nga khali dzitshoni gu fakaza Pfhumu yathu Jesu Kristo, gambe u nga khali dzitshoni khu eni nyi gu gibotshwa khu kotani yaye. Aholu saniseka gumogo ni eni khu kota nya Ivhangeli nu gu tiyiswa khu tshivba ya Nungungulu. 9Khuye a hi vbanyisidego ni gu hi rana, nasiri khu mithumo yathu, aholu khu gudzina ni wuhigo waye, a nga hi dongisela galeyo gu hi ninga khu Jesu Kristo. 10Wuhindzi wowo wu wonegide khu guta ga Muvbanyisi wathu Jesu Kristo, a nga vbedza gufa a wonegisa gutumba nya guvbanye nya gupindruge khu Mahungu Yadi nya Ivhangeli. 11Khayo nyi nga emisedwa ayo gu khala muganeli ni mupostoli ni muhevbudzi. 12Khu kharato, nyi ngu saniseka khu silo sesi. Ambari ulo kha nyi khali dzitshoni kholu, nyi ngu muti oyu nyi vegidego gwaye gutumba gwangu, khuye a gu na ni tshivba nya gu nyi sayise thumoni gwangu, kala nyi gu wu vbohisa mahegiso. 13Phara khu gutiya ni gukhodwa ni lihaladzo u li manago ga Jesu Kristo, mahungu yaya nya yadi u ma pwidego ga eni, gasi ma khale giyeyedzo gwago. 14Vegisa sihevbudzo nya sadi u ningidwego, u phasedzedwa khu Liphuvbo nya gu Age li vbahidego myonyoni gwathu. 15Uwe u ngu dziti nya gukhuwe vatshavbo va tigoni ga Asiya va nyi digide ambari nuye Fijelo ni Hermojene. 16Nungungulu a na girela wuhindzi ndranga ya Onesiforo kholu matshigu nya mangi a di nyi tangadzisa, a di si khali dzitshoni khu gumodwa gwangu. 17Gikhati a vbohidego Roma a dita nyi vbweta kala a nyi mana. 18Nungungulu a na mu girele wuhindzi litshigu nya gulamudwe. Mahungu nya mithumo a nga girago Efeso uwe u ngu mati gwadi guvbindra eni.

will be added

X\