2 VATESALONIKA 3

1Khu guhegisa, vandruye, hi lombeleleni nethu ga Nungungulu, gasi mahungu yaye ma andre, ma hakhwe gwadi, nga edzi gu nga girega khidzo vbakari gwanu. 2Lombani ga Nungungulu a hi vbulugise mandzani nya vathu nya guvivbe. Kholu khandri vatshavbo va khodwago. 3Gasi, Pfhumu khwadi. Uye a na mi ningani tshivba, a mi vbulugisani mu guvivbani. 4Hi ngu tumba Nungungulu nya gukhethu mu na simama gikhati gyatshavbo gu girani esi nyi nga mi hevbudzani. 5Pfhumu yi na khusedze myonyo yanu lihaladzoni ga Nungungulu, gasi mu gu virela Kristo khu gutumba. 6Vandruye, khu lina la Pfhumu yathu Jesu Kristo, hi ngu mi embelani khethu hambanani ni vandruye vale va vbanyago nyamba thuma gilo, va si landrigo nayo nya tumbunuko mu wu hakhidego ga ethu. 7Mu ngu dzitini gwadi gu khenu guvbweta mu vbanya nga ethu. Ethu kha ha khala vbakari gwanu nyamba thuma gilo, 8kha ha hodza guhodza ga muthu mahala. Hi di thuma nya guvbindre pimo, wutshigu ni mihani, gasi hi si lemedzi muthu. 9Khandri gu khwatshi hi diri mwalo fanelo nya guhakhe gilogyo. 10Aholu, hi di mi ningani giwonelo gasi mu gire nga idzo hi nga girago ethu. Gikhati hi nga bani na hiri iyo gwanu hi mi embedeni nya gukhethu, oyu a si dzinigo gu thuma mwalo fanelo nya guhodze. 11Hi pwide nya gupwani vomo, vbakari gwanu, vomo va vbanyago nyamba thuma gilo, wulangani nya guthume va gu luza gikhati khu gu belela siloni si si va lumbigo. 12Vathu vovo, hi ngu va khongotela ni gu va laya khu lina la Pfhumu yathu Jesu Kristo, gu khethu va na thume khu gurula, va hodze guhodza nya lithonga lawe. 13Vandruye, mu nga garali khu gu girani wuwadi. 14A gu manega muthu nyamba landrisa milayo yeyi hi mi ningago khu lidangalila leli, mu khedzeni gwadi, mu nga hengeli naye, gasi afela gu khala dzitshoni. 15Mu nga mu vengini nga nala, aholu, mu layeni kha nga ndriyanu. 16Gasi Pfhumu, Nungungulu nya gurule a na mi ningeni gurula gwaye khu maphuvbo yatshavbo. Pfhumu yi na khale ni enu mwatshavbo. 17Eni Pawulo, nyi ngu rumela malosedzela yangu, nya gulowe khu mandza yangu. Egi giyeyedzo gasi mufela gu mati malangalila yangu yatshavbo. Khigyo kharati gyandza gyangu. 18Wuhigo wa Pfhumu yathu Jesu Kristo wu na khale ni enu mwatshavbo.

will be added

X\