2 VATESALONIKA 1

1Eni Pawulo ni Silvano ni Thimoti, hi ngu losa libandla nya vathu va Nungungulu va vbanyago dhoropani ga Tesalonika, na hi patane khu lihaladzo la Nungungulu, Babe wathu ni Jesu Kristo, Pfhumu yathu. 2Hi ngu mi suvelani, khu ga Nungungulu ni Pfhumu Jesu Kristo, mathomo ni gurula. 3I fanelo yathu gu dhumisa Nungungulu gikhati gyatshavbo khu enu, vandruye. Gu ngu yela gu gira kharalo kholu gukhodwa gwanu gu andrile ni lihaladzo lanu li dandrile, eli mu girelanago vatshavbo. 4Ethu hi ngu dzi khusedza khu enu vbakari nya mabandla nya vakhodwa, khu kotani nya gutimisele ni gukhodwa gwanu mu gu yeyedzago vbakari nya sigaradzo, ni gusaniseka mu gu rwadego. 5Isoso sa gu yeyedza gulamula nya lisine ogu Nungungulu a na gu mi sayelago mufumuni waye, khu kotani nya olu mu timiselago sigaradzoni. 6Khu magirelo ya mamowo, vale va mi sanisago, va na hakha ga Nungungulu tsayiso nya lisine. 7Gasi enu mu nga sanisekago gumogo ni ethu, a na hi ninga guhefemula gikhati a na gutago khu ndzadzini Pfhumu Jesu Kristo, gumogo ni sirumwa saye, na tade khu tshivba. 8A nata khu vbakari nya nilo ata tsayisa vale va si khodwigo ga Nungungulu, ni ava va si hakhigo Mahungu nya Yadi ya Pfhumu yathu Jesu Kristo. 9Avo va na mbembiswa va yiswa hwindzo, nyamba wona ni gupwa tshivba ni wudhumo wa Pfhumu. 10A na bani ari litshigu Pfhumu atago guta dhumiswa khu vatshavbo vale a va hathidego, a na wonwa khu vatshavbo va dzumedego gukhodwa. Enu mu hakhide gwadi mahungu yathu. 11Khu guralo, hi ngu lomba ga Nungungulu wathu gikhati gyatshavbo khu enu, gasi a mi phasani gu girani dzifanelo nya guranwe gwanu, a mi ningani tshivba ni masuwo nya gutshambe, ni gu tiyisa gukhodwa gwanu. 12Khu magirelo yoyo, Pfhumu yathu Jesu Kristo, a na dhumiswa khu gu dzi vegisa gwanu, enu nenu mu na dhumiswa khuye, khu wuhigo wa Nungungulu wathu ni wa Pfhumu Jesu Kristo.

will be added

X\