2 PEDRO 3

1Dzipari dzangu nya sigodwa, eli lidangalila nya wuvili nyi mi lovelago eni. Malangalilani ya mavili nya gu vbweta gu wusa mapimo yanu nya lisine, mufela gu dundruga silo sesi. 2Nya gu vbweta gu kheni mu dundruge magana ma nga ganedwa gikhati gya gale khu vaprofeti, ni Nayo wa Pfhumu yathu Yesu Kristo, mu ningidwego khu vapostoli. 3Guphela gu vbweta mu dzitini gu khenu guvbelani nya matshigu va na dugelela vathu va nya gufumwa khu gunavela gwawe, va na mi poyila, 4khavo: "Uye tumbisile gu khuye a na wuya, khandridzo, womo hayi olu? Vababe vathu va fude, satshavbo si ngari idzo saye gukhugela guvangwa nya mafu." 5Vapoyili vovo va gu hangwa khu gu khavo matshigu ya gale, Nungungulu a di ganela, gu vangwa ndzadzi ni mafu. Litigo li di duswa khu matini, li gu wumbwa vbakari nya mati khu lito la Nungungulu. 6Va hangwa gambe khu gu khavo khu mati nya talo, litigo li di pfhungumudwa. 7Aholu, ndzadzi ni mafu si guromo olu si vegisedwe khu lito la limwedo la Nungungulu, guta pfhungumudwa khu nilo. Si vegisedwe litshigu nya gulamudwe ni gumbembiswa ga va nya guvivbe. 8Dzipari dzangu nya sigodwa, mu nga divalini esi, kholu ga Pfhumu, litshigu limwedo la gu khala nga likhumi mazana myaga; likhumi mazana myaga ya gu khala nga litshigu limwedo. 9Pfhumu kha yi hweli gu gira esi yi nga tumbisago, kha nga edzi va hingigedzago khidzo vambe vathu. Aholu iyo yi na ni gutimisela khu enu, kholu kha yi dzini na moyo wanu a mbemba, aholu ya gu vbweta gu khiyo mu vbindrugedze. 10Litshigu la Pfhumu li na vboha kha nga mbafa. Litshigu lolo, ndzadzi yi na mwalalega gu pwala ligwaha nya gusamadzise. Satshavbo si guromo ndzadzini si navbya, litigo ni satshavbo si guromo tigoni si na fuviswa. 11Olu silo satshavbo si na gu mbembisago guralo, gu vbwetega mu vbanya khu mavbanyelo nya yadi nya wukhodwa, nya gutsakise Nungungulu. 12Virelani litshigu nya gute gwa Nungungulu, mu gira gu khenu li vbiredze guta. Litshigu lolo, ndzadzini gu na khungumudwa khu nilo, satshavbo si guromo ndzadzini si na nyungulugiswa. 13Aholu, Nungungulu tumbiside ndzadzi yiphya ni mafu maphya, umo gu na bani gu na romo gululama, ethu hi ngu tumba ni gu lirela gutadzisega nya gitumbiso gyogyo. 14Khu kharalo, dzipari dzangu nya sigodwa, nga olu mu lindrelago litshigu lolo, girani tshivba mu khale ga Nungungulu, nyambana gisolo, ambari gighoho mbeli gwaye. 15Dzitini gu khenu gutimisela ga Pfhumu yathu, a gu girede gu hi vbanyisa. Ndriyathu Pawulo, khu guti a ningidwego khu Nungungulu, a mi lovedeni khu mahungu yaya. 16Khiso esi a nga si ganelago malangalilani gwaye, gikhati a nga mi lovelani khu mahungu yaya. Malangalilani gwaye somo silo nya gugaradze gu sipima, va nya mbati ni va nya gukhodwa vbadugwana va sindrwago khiso gu si tshamusela, nga edzi va girago ga simbe sipandre nya Milowo nya gu Age. Khu guralo, va gu dzi mbembisa vabune. 17Aholu, enu dzipari dzangu, olu mu matigo mahungu yaya, dzi woneleni, mu nga ndreyiswa ndzilani nya yadi, khu gu sengwa khu sigiro sa va nya guvivba, mu kwiriga gutiyani gwanu. 18Aholu, simamani gudandra khu wuhigo ni guti ga Pfhumu, Muvbanyisi wathu Jesu Kristo. Wudhumo ga uye, olu ni gikhati gyatshavbo. Amen.

will be added

X\