2 PEDRO 1

1Eni, Simoni Pedro, githumi ni mupostoli wa Jesu Kristo, nyi ngu mi lovelani lidangalila enu mwatshavbo mu hakhidego gukhodwa nya lisima nga ogu gwathu, khu guvbanyiswa hi ningwago khu Nungungulu ni Muvbanyisi wathu Jesu Kristo. 2Wuhigo ni gurula gu na engedzelane gu dandra ga enu, khu guti Nungungulu ni Jesu Kristo Pfhumu yathu. 3Tshivba ya Nungungulu yi ngu hi ninga satshavbo hi si vbwetago gasi hi vbanye khu mavbanyelo nya yadi nya gutsakise Nungungulu, khu guti wule a hi ranidego guta hengela wudhumo ni wuwadi waye. 4Khu guralo, uye a hi ningile siningwa nya sikhongolo nya lisima a nga hi tumbisago, gasi hifela guvbulugiswa mapimo nya gupfhungumule ma fumago tigoni, hi kodza gu hengela tumbunukoni gwaye nya wunungungulu. 5Khu guralo, gu vbwetega muri ni gukhodwa, gukwodwa mu gu tadzisa khu wuwadi, wuwadi mu wu tadzisa khu guti; 6guti mu gu wonegisa khu gu dzi phara; gu dzi phara mu gu pata ni gutimisela; gutimisela mu gu tadzisa khu githawo ga Nungungulu; 7githawo ga Nungungulu mu gi tadzisa khu gupwanana nya wundruye; gupwanana nya wundruye, mu gu tadzisa khu lihaladzo. 8Khayo ayo mavbanyelo gu vbwetegago muri nawo. Mwa gu bani muri naso satshavbo sesi, mu na khala vathu nya gukhutale, mu na ninga mihandro nya yingi nya yadi khu kotani nya guti Pfhumu yathu Jesu Kristo. 9Aholu, uye a gu mwalo naso silo sesi, a ngu fanana ni gikhumu, mwendro ni muthu nya gurole mapimo, a divaledwago khu gu khuye sighoho saye sa gale si tsetseledwe. 10Khu guralo vandriyangu, zamani, mu simama gutiya guranwani gwanu, ni gu hathwa khu Nungungulu. Mwa gu girani kharato, gima kha mu na tshunganiswa mu thega. 11Khu kharato, mu na ni fanelo yatshavbo nya gubele mufumuni nyamba vbela, wa Pfhumu ni Muvbanyisi wathu Jesu Kristo. 12Khu guralo, nyi na mi alakanyisa gikhati gyatshavbo silo sesi, ambari mu sitigo. Tiyani lisineni mu li hakhidego. 13Nya gu wona nari fanelo yangu gu mi dundrugisani silo sesi olu nyi nga gu vbanyago. 14Kholu, nyi ngu dziti gu kheni kha nyi na hwela gu diga givili gegi nya gufe, kha nga Pfhumu yathu Jesu Kristo a nyi embedego. 15Khu guralo, nyi na gira tshivba yatshavbo nya gu mi hevbudzeni silo sesi, gasi hwane nya gufe gwangu, mu tshala mu si dundruga. 16Ethu gima kha ha mi hevbudzani silo nya gu si luge, gikhati hi nga mi tivisani Mahungu nya Yadi nya gute nya gungangamele, nya gutale khu tshivba ga Pfhumu yathu Jesu Kristo; kholu ethu hi wonide wugulu waye khu maho yathu. 17Kholu ethu hi diromo, gikhati Nungungulu Babe a mu ningidego wuzundzo ni gidhumo. Lito la Nungungulu li nga duga khu gungangamelani nya gukhongolo ngundzu khilo: "Oyu khu Mwamana wangu nya gu mu gole ngudzu, oyu a nengedzisago monyo wangu." 18Ethu hi li pwide lito lolo na li guta khu ndzadzini, gikhati hi nga bani hiri ni Jesu Kristo Gigomoni nya guage. 19Khavbo avbo, hi na ni gutumba ga Mahungu ma nga tiviswago khu vaprofeti. Mu ngu gira gwadi mwa gu yingisa mahungu yoyo, kholu, ma ngu fanana ni guwonegela gu wenengedzago gidemani kala gugya; thandra nya masase yi na wenengedze myonyoni gwanu. 20Ga satshavbo, dundrugani esi: "Mwalo muthu a kodzago gu tshamusela khu gu si khugela khu hungoni gwaye esi si nga lowa khu vaprofeti omu nya Milowo nya gu Age." 21Kholu, ma mwalo magana nya vaprofeti ma nga lowago khu gudzina nya muthu, aholu, vatu va di kutsedzedwa khu Liphuvbo nya gu Age, va ganela Mahungu nya gute khu ga Nungungulu.

will be added

X\