2 VAKORINTO 8

1Vandriyangu, nya gu vbweta gu kheni muti wuhigo owu Nungungulu a nga girela Mabandla ya Makedhoniya. 2Ambari va nga bani vari vbakari nya silingo ni gusaniseka, va vbanya khu wusiwana nya wukhongolo. Aholu, va di yeyedza gutsaka gwawe ni wuwadi wawe, va ningela esi nya wusiwana wawe. 3Nyi ngu tiyisa gu kheni, ava va ningede maningano ni gu manela gwawe ni gu vbindra gambe gumanela gwawe. Avo vamune, 4va dita nyi lomba wuhindzi nya guhengele navo thumo yoyu nya guphasedzele vakhodwa va Jerusalema. 5Va di gira silo gu vbindra esi nyi nga si lindrela. Va gu dzi ningela mandzani ga Nungungulu, ni gwangu neni, nga edzi Nungungulu a nga ruma khidzo. 6Khu guralo, nyi lombide Tito, gu kheni edzi a nga phela khidzo, a nate gambe ga enu ata mi phasa ni gu vbedzisa thumo yoyo nya wuhindzi. 7Enu, ga silo satshavbo mu fumile khu gukhodwa, khu guganela, khu gu pima lisine, khu gu dzi garadzani khu maphuvbo yatshavbo ni, omu nya lihaladzo nyi gunalo gwanu. Dzi yeyedzeni gambe gu khenu mu vafumi nya wuhindzi. 8Oyu khandri nayo nyi mi ningago. Nya gu vbweta gu wona gu kheni lihaladzo lanu khya lisine gani, nyi li pimanisa khu la vambe. 9Mu ngu wuti wuhindzi wa Pfhumu Yathu Jesu Kristo: Uye a nga bani a fumile, a di dzi gira gisiwana khu kota yanu, mufela gu mana gufuma khu kota nya wusiwana waye. 10Khu guralo nyi ngu mi ningani mawonelo yangu: Thumo nya wuhindzi wu khade gwadi ga enu, kholu, mwaga wu vbedego mu giride ningelo wamoyo; khenu gambe va nya guhegula gu ninga mawonelo. 11Olu mwa gu dzi kodza, girani guvbindra edzi nya guhegule, khu avba a manago khavbo muthu ni muthu. Ligolo ni gudzumela khu gu gira ni gu yeyedza esi si hungidwego. 12Nungungulu a ngu wona oyu a ningelago egi a gu nagyo khu lihaladzo nasiri egi muthu a gumwalo nagyo. 13Kha nyi dwaneli gu mi lemedza gasi gu vbevbugisela vambe, nya gu dwanela gu kheni gu manege gu ningana. 14Ga gikhati gegi, esi si mi tshalelago sa gu phasedzela vandriyanu, gasi mindru ga tshigu, esi si na gu va tshalelago si gu phasedzela avba mu na gu keneledwago khavbo nenu. Khu magirelo yoyo gu na manega gu ningana. 15Kha nga gu lovidwego pwani: "Oyu a nga bani ari ni singi kha tshaledwa, ni oyu a nga bani ari ni sidugwana kha keneledwa". 16A na bongwe Nungungulu, a ningidego ligolo monyoni ga Tito, nga eli nyi gu nalo neni khu enu. 17Nasiri khu gulomba gwangu, aholu khu gu vbisega gwaye khu enu, Tito a di khuga khu gu dzina gwaye ata iyo gwanu, gasi guta wonana nanu. 18Nyi rumede gumogo ni uye, mumbe ndriyathu a zundzwago khu mabandla yatshavbo khu gu tshumayela Ivhangeli, 19vbavbandze nya isoso a di hathwa khu mabandla, gasi hi bangaladzana ga thumo yoyu hi ningidwego guta gira gwanu, wu yeyedzago wudhumo wa Pfhumu, ni gu yeyedza ligolo langu. 20Nya guvbweta guhunisa ni wevbini a na nyi solago khu hwengo yoyu nya wungi wu vbindrago khu mandzani gwangu. 21Egi nyi gi vbwetago khu wuwadi, nyi si wu giri basi mbeli ga Pfhumu, aholu, nyi wu gira gambe vbakari nya vathu. 22Nyi ngu va ruma gumogo ni mumbe ndruye, a yeyedzago gu khathala nya lisine, kha nga hi mu wonego gikhati nya gingi. Aholu, lihaladzo laye likhongolo ngudzu, ni gutumba a gu nago ni enu. 23A gu bani ari Tito, i ndriyangu, githumi gikwathu, vbakari gwanu, gasi vambe vandruye va gu rumwa khu mabandla, vatshavbo va gu thumela wuzundzo ni wudhumo wa Kristo. 24Yeyedzani ga mambe mabandla lihaladzo mu gu nalo khu avo, mu va sayisa gwadi. Gasi gu dzi zundza gwangu khu enu, gu wonege nari gwa lisine.

will be added

X\