2 VAKORINTO 7

1Na hiri ni situmbiso sesi, sigodwa sangu, hongoleni hi dzi handze guvivba gwatshavbo nya givili ni liphuvbo, hi gira thumo wathu nya guagiswe ni githawo ga Nungungulu. 2Hi hakheni myonyoni gwanu. Kha ha vivbisa muthu, kha ha senga muthu, kha ha vbweta giphaso ga muthu. 3Kha nyi ganeli esi khu gu vbweta gu mi kona, kholu nyi mi embedeni khu gale kheni mu womo myonyoni gwathu gasi hi vbanya ni gufa gumogo. 4Nyi na ni gutumba nya gukhongolo ngudzu khu enu, nyi ngu dzi zundza ngudzu khu enu; nyi tade khu gu tshaveledwa, nyi tade khu gutsaka, vbakari nya gusaniseke gwathu gwatshavbo. 5Kholu gukhugela hi gu vboha tigoni ga Makedhoniya, gima kha hi mani ni gikhati nya guhefemule. Ha gu wona sigaradzo maphuvbo yatshavbo: Mayunga ni guhambana ni vathu, khu vbavbandze; khu ndrani gu gugaradzega nya monyo. 6Nungungulu a tshavelelago ava va sanisekago, a hi tshavelede khu guvboha ga Tito. 7Khandri basi khu guvboha gwaye, aholu khu gu tshavelela a nga gu mana gwanu. Uye a hi tiviside gusuva gwanu, ni marongo yanu, ni gukhathala gwanu khu eni. Esi satshavbo si engedzede gutsaka gwangu. 8Lidangalila langu la gu bani li mi thedeni wusiwana, kha nyipwi wuvi. Nyi ngu dziti gwadi gu kheni lidangalila langu li mi thede wusiwana gikhati gyogyo. Ambari ulo, si nga nyi pwisa wuvi, 9olu nyi ngu tsaka, kha nyi tsaki khu olu mu nga saniseka, aholu, kholu gusaniseka gwanu gu mi girile mu vbindrugedza. Mu di thedwa wusiwana, khu gu dzina ga Nungungulu, khu guralo kha ga ghoheka gilo khu ga ethu. 10Kholu wusiwana, ga Nungungulu, wa gu vanga gu vbindrugedza gu yisago guvbanyani; aholu wusiwana wa mafuni wa gu vanga gufa. 11Wonani gwadi esi wusiwana wa Nungungulu, wu vangide ga enu: Gulomba nya gungi, divalelo, gugaradzega, githawo, gusuva, gusayisa, ni gutiya gu tsayisa gighohi. Mu yeyedzide khu satshavbo sesi gu khenu mu mwalo nandru ga mahungu yaya. 12Khu guralo, nya gu bani nyi mi lovede, kha nya lova khu kota nya oyu a nga gira guvivba, ambari ga oyu a nga giredwa guvivba nyi di lova gasi gu yeyedza gulomba gwanu khu ethu mbeli ga Nungungulu, khu kota nya guralo hi tshaveledwe. 13Aholu, vbavbandze nya ogu gutangadziswa hi gu manidego, hi ngu tsakiswa gambe ngudzu khu gu wona gutsaka ga Tito. Kholu uye nengede ngudzu khu edzi mu nga mu hakhago khidzo. 14Eni nyi di mu embede Tito kheni nyi ngu dzipwa matshandza khu enu, kha nya thedwa dzitshoni. Kha nga a gu lisine satshavbo iso hi mi embedego, kharato gambe, gu wonegide nari lisine esi hi nga ganelago ga Tito khethu: hi ngu dzipwa matshandza khu enu. 15Lihaladzo laye khu enu la gu engedzela ngudzu, a gu dundruga gu yingisa gwanu mwatshavbo edzi mu nga mu hakha khidzo khu githawo nya gikhongolo ngudzu. 16Nya gutsaka, nyi mi tumbani ga silo satshavbo.

will be added

X\