2 VAKORINTO 12

1Kha gu vbwetegi guganela gambe khu mahungu nya gu dzi zundze. Khu guralo, nyi na ganela khu siwoniso ni gu tuledwa khu Pfhumu. 2Nya guti muthu moyo a khodwego ga Kristo, oyu hwane nya likhumi na mina myaga a nga khusedzwa a gwela Ndzadzini. Gani hongode khu givili, gani khu liphuvbo, kha nyi dziti. Nungungulu khuye a dzitigo, 3Aholu, nya gu dziti gu kheni muthu yoyo a di gwedziswa a hongola ga Nungungulu. Gani hongode khu givili, gani khu liphuvbo, kha nyi dziti. Nungungulu khuye a dzitigo. 4Iyoyo, a dipwa silo nya gusamadzise, si si kodzigo gu ganedwa khu muthu. 5Nya gugira matshandza khu muthu yoyo. Kha nyi vbweti gu gira matshandza khu gwangu, aholu, khu gu vbevbuga gwangu. 6Ambari nari gu gira matshandza, kha nya nga vbweta gu gira nga gipumbu, kholu nyi di vbweta guganela lisine. Aholu, nya gu vbweta gu si diga, gasi muthu a si alakanyi mapimoni gwaye gu khuye nyi khongolo, guvbindra edzi a nyi wonago khidzo, ni esi a si pwago khu eni. 7Nyi tuledwe guti silo nya guete, gasi nyi si dzi gugumugisi khavbo, nyi di thedwa muba givilini, ngilozi ya Sathane gi nyi vetago, gasi nyi si tali khu matshandza. 8Khu mahungu yoyo, nyi lombide guraru ga Pfhumu gu kheni a nyi duse muba yoyo. 9Aholu, uye a di nyi hakha khuye: "U na eneledwa khu wuhigo wangu, kholu tshivba yangu ya gu dzi yeyedza khu gu tadzisega, ga vale va gumwalo tshivba." Khu gu dzina gwangu nyi na seketela wudhumo wangu ngudzungudzu guvbungugani nya tshivba yangu, gasi tshivba ya Kristo yi dzi wonegisa khavbo gwangu. 10Khidzo kharato nyi nengelago khu gupwa guvbunguga nya tshivba yangu, khu gu vadwa, ni sigaradzo, ni gunyenywa, ni gusaniseka khu khota ya Kristo. Kholu gikhati nyi dzi pwago na nyi vbungugide tshivba, khavbo nyi gu ni tshivba. 11Nyi ganede kharati nga gipumbu. Enu khenu mu nga nyi girisa gu kala nyi ganela esi, mu diri ni fanelo nya gu nyi vhikeleni. Ambari nyi siri gilo, kha va nyi vbindri vapostoli vovo nya vakhongolo. 12Wupostoli wangu nya lisine nyi yeyedzide vbakari gwanu: nyi di dzi vegisa ni gu timisela, nyi mi yeyedzani siwoniso nya tshivba ya Nungungulu. 13Khu ginani mu manega vbavbatshi nya mambe mabandla? Mwendro kholu nyi nga mba mi lemelelani! Nyi tsetseleleni gihoso gyogyo! 14Nyi dzi emisede guta nya guraru iyo gwanu. Ambari ulo kha nyi vbweti guta mi lemedzani. Eni nya gu vbweta enu basi, kha nyi vbweti esi si gu sanu. Kholu khandri sanana si vegelago vavelegi, khu vavelegi va vegelago sanana. 15Eni nyi ngu dzumela gu ningela satshavbo nyi gu naso, ambari wurumba wangu khu kota nya enu. Nya gu mi yeyedzani lihaladzo nya lingi, khavbo mu na gu nyi golago vbadugwana? 16Ambari mu dziti nya gukhenu kha nya mi lemedzani, vambe va na alakanya khavo nyi di mi riyani khu mano nya yadi, nyi mi molani khu naphwi. 17Nyi di nga rumela muthu ata mi sololani gani? 18Olu nyi nga lomba Tito, ni vambe vandruye, Guta iyo gwanu. Gyomo egi a nga mi hodzelani Tito? Kha dzi vegisa ni gu dzi sayisa a vbanya khu mavbanyelo nyi nga vbanya khayo eni? 19Mwa gu dzina sanu mwa gu alakanya gu khenu nya gu vbweta gu dzi vhikela vbakari gwanu. Nya guganela mbeli ga Nungungulu, esi nya gugira khu mapimo ya Kristo. Ga satshavbo sesi, nya gu vbweta wuwadi wanu. 20Nyi na ni hwanga guta iyo gwanu, nyita mi mana na mu vbindrugedzide mavbanyelo yale nyi ma golago, enu nenu mu nyi wona na nyi vbindrugedzide mavbanyelo. Nyi na ni hwanga nya gukheni nyi nata mi mana na mu bede mayungani, lidiwo, mazondra, gunyenyana, gudwana, gusingedzana, milembo, ni gumba pwana. 21Gasi Nungungulu wangu a si nyi theli dzitshoni vbakari gwanu, nya gu vboha gambe iyoyo. Ni gulilela vale va nga girago sihoso gale, va si vbindrugedzi guvivbani gwatshavbo, ni gu dzi nyenyezisa khu wubhayi va wu giridego.

will be added

X\