2 VAKORINTO 11

1Nya gu vbweta mu timisela gambe vbadugwana, ambari nya gu ganela wupumbu! 2Gu khathala gu ngu nyi girisa wufu, linani ga Nungungulu. Kholu enu mu khade nga sagadzyana nya makendzi, nyi mi ningedego ga mwama moyo basi, a gu Kristo. 3Aholu, nyi na ni hwanga nya gukheni mapimo yanu ma na ghoheka mu diga lisine, ni gukhodwa ga Kristo, kha nga olu Eva a nga sengwa khu malipha ni wugengeli nya nyoga. 4Kholu mu nga tshuka mu dzumela mumbe muthu a guta ganela khu Jesu, nya guhambane ni oyu nyi nga mi embelani, ambari gu hakhani Liphuvbo nya guhambane ni eli mu li hakhidego, mwendro Mahungu nya Yadi nya guhambane ni aya mu ma dzumedego. 5Aholu, nya gukheni kha nyi vbindrwi khu vapostoli vovo nya vakhongolo. 6Ambari khu gu ganela nyi tshala hwane, khu guti, nyi womo mbeli. Ga satshavbo sesi, nyi mi yeyedzideni lisine nya iso. 7Nyi mi embedeni Mahungu nya Yadi ya Nungungulu, nyamba lomba gu hakhiswa. Nyi di dzi nogisa gasi mufela gu khusedzwa enu. Mwa gu alakanya gu khenu nyi di ghoha? 8Na nyiri vbakari nya guthumele enu, nyi di hakhiswa khu mambe mabandla. Nyi di ma solola khu gufela gu phasa enu. 9Gikhati nyi nga bani nyiri iyo gwanu, ambari na nyi keneledwe khu gilogyo gima kha nya garadza muthu. Vakhodwa va nga tago khu Makedhoniya, khayo va nga nyi phasa khu esi si nga nyi kenelelago. Kha nya dzina gu mi lemedzani, gima kha nyi na mi lemedza. 10Khu gukhodwa nya lisine nyi gunago ga Kristo, kha nyi vbweti gu luza wuzundzo wowu ni wevbini wulanga tigoni ga Akaya. 11Khu ginani? Nyi mwalo lihaladzo ni enu? Nungungulu a ngu dziti gwadi! 12Esi nyi girago, nyi na simamisa gu si gira. Kha nyi vbweti gu ninga wulanga vale va dzi khusedzago ni gu alakanya khavo va ngu fanana ni eni. 13Avovo khavo vapostoli nya gukanganyise, sithumi nya malipha va dzi girago vapostoli va Kristo. 14Kha si samadzisi, kholu ambari Sathane a ngu dzi gira ngilozi ya Nungungulu. 15Khu guralo, khandri silo nya gusamale, avo khu lisine vomo thumoni wa Sathane, va dzi gira vathu va thumago gu haladza ga Nungungulu. Aholu khu gu hegisa va na hakha ma dingano ni mithumo yawe. 16Nyi ngu engedza gambe gu ganela: mu nga alakanyi gu khenu nyi gipumbu. Mwa gu alakanya kharalo, nyi digeni nyi dzi zundze gambe. 17Esi nyi vbwetago guganela khandri sa eno ga Pfhumu, nya gu ganela gasi gu dzi zundza, nga khwatshi nyi gipumbu kamwe. 18Olu nya vangi va dzi zundzago khu wuthu, eni neni nyi na gira kharalo. 19Enu mu gu vathu nya guti mu gu yingisa gwadi sipumbu. 20Mu ngu haka gwadi ava va mi girago dzikhumbi, va mi sololago, va mi nyenyago, va mi vetago. 21Eni kha nya tiya longo gugire isoso. Nya gu ganela khu dzitshoni! A gu bani aromo oyu a gu ni fanelo nya gudzigire matshandza, nyi ngu engedza gambe guganela nga gipumbu, eni neni nyi nayo. 22Avo Vaheberu nya tumbunuko? Eni neni! Avo Lihundzu la Abrahama? Eni neni! 23Avo sithumi sa Kristo? Nya guganela nga gipumbu, nyi na ganela kheni, eni nyi womo mbeli ngudzu guvbindra avo. Nyi va vbindride mbeli ga mithumo yatshavbo; gu khothedwa mapasoni, gu kwamudwa khu dzimboma, gu vbuluga gufa gikhati nya gingi. 24Nyi sanisidwe livbandre dzinyondro khu Vajudha, nyi kwamudwa magumi-mararu na livbandre na dzina dzimboma. 25Nyi vetidwe khu misimbo nyondro tharu, nyondro mweyo nyi vetwa khu siwindri. Nyi gimbide linene khu ngalava tanga nya guraru, nyi vbedzide litshigu rumba, wutshigu ni mihani, na nyi gu penga linene. 26Nyi di gira mapfhumba nya mbana tengo, nyi saniseka ngudzu mitsongoni, ni gu saniswa khu dzimbafa, khu va na gyathu, ni va nya mayigo, madhoropani, mu giwulani, linene, ni vandruye nya malipha. 27Nyi diri ni thumo nya wungi, gu ganela, nyi di pila wutshigu nya wungi, nyamba lala, ni ndzala, ni lidora, matshigu nya mangi nyamba hodza, girame, wuhagadzo. 28Vbavbandze nya isoso, nyi di rwala, litshigu ni litshigu, gulemela nya sigaradzo nya Mabandla yatshavbo. 29Khu hayi a guromo mudwali, eni nyi si dwali neni naye? Khu hayi a thegago muthu guvivbani, nyi si saniseki neni khuye? 30Ga gudzumedwa gu pwani muthu a na dzi zundze, eni nyi ngu dzi zundza khu esi nyi nga saniseka khiso. 31Nungungulu, Babe wa Pfhumu yathu Jesu Kristo a na rungudzwe gikhati gyatshavbo mu ngu dziti khenu kha nyi liphi. 32Eyi Dhamasko, gyandza gya mufumeli Areta, a di ruma gu segwa malimba yatshavbo nya libhiyo nya lidhoropa, gasi a mane gu nyi mola. 33Aholu, va di nyi thela gitundruni va nyi tshisa khu vbagihogotunu, yi nga bani yiri libhiyoni nya lidhoropa, khayo magirelo nyi nga vbulugisa ayo mandzani gwawe.


Copyright
Learn More

will be added

X\