2 VAKORINTO 10

1Eni, Pawulo, nya gu bani nyiri vbakari gwanu nya gu dzi vbevbugisa, nya gu bani nyiri hwindzo nya gu dzi lemedza. Nyi na ni gilo nyi vbwetago gumi lomba khu lina la Kristo, oyu a nga dzi vega vbavbatshi ni gu dzi sodzisa. 2Nyi ngu mi lombani kheni, nya gu bani nyiri vbakari gwanu mu nga nyi gurumedzi gu girela wurena vale vambe, va gu khavo, eni nya gugira esi khu tshivba nya wuthu. 3Ina nyi muthu, lisine. Aholu sigiro nya mithumo yangu, khandri sa wuthu. 4Matshari nyi dwanago khayo khandri ya wuthu, kholu tshivba nya ayo ya guta khu ga Nungungulu, ma gu khungumula mabhiyo yatshavbo, ni gu vbedza mapimo nya guvivbe, 5ni matshandza yatshavbo, ma wugelago guti gwa Nungungulu. Eni, nya gugira gu kheni, mapimo nya wuthu ma gu yingisa Kristo. 6Nyi dzi emisede gutsayisa ni gwevbini guphungela, kala gu yingisa gwanu Kristo gu vbelela. 7Enu mwa gu wona silo khu vbavbandze. A gu bani aromo oyu a dzi tumbago, nya gukhuye a gu lumba Kristo, uyoyo a na pimise gwadi, kholu eni neni nya gu lumba Kristo. 8Ambari na nyi dzi zundzide khu tshivba yeyi Pfhumu a nga nyi ninga, kha nyi khali dzitshoni khiso, kholu nyi di ningwa gasi gu yi thumisa yi vbahe vbakari gwanu, nasiri gu pfhungumula. 9Kha nyi vbweti gu mi thelani hwanga khu malangalila yangu. 10Vambe va guganela khavo: "Malangalila yaye ma lemede ma na ni tshivba, aholu ha gu bani hiri naye, vbevbugide ni givili gyaye, gu ganela gwaye kha gu phasi gilo". 11Avovo va na khale na va gu dziti nya gukhavo, ambari nyi ganela khu hwindzo, mwendro khu lidangalila, ni gu gira esi nyi girago na nyiri vbakari gwanu, kheni muthu yoyo wa moyo. 12Eni kha nyi kodzi gu dinganisa ambari gu dzi fananisa ni vale va dzi yeyedzago nga vathu nya vakhongolo, kholu, avovo va mwalo mapimo, kholu va gu dzi dinganisa avo vamune khu wurumba wawe. 13Aholu, eni kha nyi vbweti gu dzi khusedza guvbindra pimo khu thumo wangu, pimo yoyu Nungungulu, a nyi ningidego, khuwo nyi wu vbohisidego vbakari gwanu. 14Nari pwani kha nya vbohisa iyoyo, gima mwa sa vega githawo. Aholu, nyi dzude kala iyo gwanu na nyi guganela Mahungu nya Yadi ya Kristo. 15Kha nyi dzi zundzi gu vbindrisa, khu mithumo ya vambe vathu. Egi nyi gi lindrelago nya guvbweta gu zundzega khu gu dandra nya gukhodwe gwanu, nga edzi Nungungulu a nyi pimedego khidzo. 16Olu nya gu vbweta gu dzega Mahungu nya Yadi nyi ma yisa mambe mayigo, vbavbandze nya litigo lanu. Khu kharalo kha nyi na dzi khusedza khu thumo wu giridwego khu vambe, ga litigo li va lumbago. 17Oyu a vbwetago gu dzi khusedza, a na dzi khusedze Pfhumuni. 18Kholu, oyu a dzi zundzago a dzi gira muthu nya khongolo, kha hakhwi, gu hakhwa oyu a zundzwago khu Pfhumu.

will be added

X\