1 THIMOTI 6

1Vale va gu dzikhumbi va na ninge githawo ga vafumeli vawe, gasi hi si poyili Nungungulu gumogo ni nayo waye. 2Ava vafumeli vawe va gu vakhodwa, va nga va kanyisi khu gu khavo vandriyawe, khavbo gu vbwetegago gu thuma khu lihaladzo kholu va gu thumela mukhodwa wa Nungungulu. Khiso esi u yelago gu va hevbudza ni gu va embela. 3A gu bani aromo muthu a hevbudzago silo nya guhambane, a si landri sihevbulo nya lisine sa Pfhumu yathu Jesu Kristo, a gu sihevbulo nya gululame, 4uyoyo muthu nya matshandza, gambe khati gilo. Muthu nya gudwale, khwa gu wusa maregera ni guphikizana, lidiwo, milembo, guvalana, gusingedzelana guvivba, 5ni guganedzana nya mahala, vathu nyambana mapimo, va guromo hwindzo ni lisine. Avo va gu dzega gukhodwa va gu gira wugwewo. 6Ina, gukhodwa gu ngu khala wugwewo wa gu gu gimbidzisa khu ndzila ni lisine. 7Kha hata ni gilo mafuni momu, hi na bwelela gambe nyambana gilo; 8Ha nga mana gilogyo nya guhodze ni gu ambalana, si enede. 9Aholu, ava va vbwetago gughanya, va gu thegela gulingwani ni naphuni nya guvbwete silo nya singi nyambana giphaso. Khiso si girago vathu va bela guvivbani, va mbemba ni wurumba wawe. 10Nala nya silo satshavbo khu dzitsapawu. Khu gu fumedwa khidzo, nya vangi va digide gukhodwa vaya bela guvivbani. 11Uwe u gu muthu wa Nungungulu ndreya ga silo soso. Vbweta lisine, ni gululama, ni gukhodwa, ni lihaladzo, ni gutimisela ni gurula. 12Dwana litunga nya ladi nya gukhodwe, gasi u mane guvbanya nyamba vbela, ugo u nga ranedwa ugo. Khugo u nga ninga wufakazi vbakari nya vathu nya vangi. 13Nyi ngu gu lomba, mbeli ga Nungungulu a ningago guvbanya silo satshavbo, ni ga Jesu Kristo a nga ninga wufakazi nya lisine khovbeni ga Pontiyo Pilato. 14Sayisa sileletelo sesi u si vegisa gwadi kala Pfhumu yathu Jesu Kristo a gu wuya. 15Khu gikhati gyogyo, uye a na wonega khu tshivba ya wule a gu ni gidhumo ni tshivba yatshavbo, Pfhumu nya dzipfhumu, Mufumeli nya vafumeli. 16Khuye basi a si figo. Uye khade gungangamelani gu si vbohedwigo khu muthu. Mwalo a mu wonidego, gambe mwalo a dzi kodzago gu mu wona. Ga uye, wudhumo ni tshivba kala gupindruga! Amen. 17Tivisa ava va gu sitetema nya dzithomba nya mafu yaya, va nga giri matshandza ambari gu tumba thomba nyamba tiya. Va na tumbe Nungungulu, oyu a hi ningago silo satshavbo hi si thumisa. 18Va na thume silo nya sadi, va khale sitetema khu magirelo nya yadi, va yeyedza lihaladzo ni gu ninga sisiwana. 19Khavbo va na gu manago thomba nya yingi yi na gu va thumelago, khu gikhati gi na gutago, gasi va mane guvbanya nya lisine. 20Gigodwa gyangu Thimoti, vegisa gwadi gukhodwa u gu hakhidego nga thomba. Ndreya ga maganelelo nya litigo ni gu ganedzana khu guti nya malipha. 21Nya vangi va pengisidwe khugo, va diga ndzila yawe nya gukhodwe. Wuhigo wa Nungungulu wu na khale ni enu.


Copyright
Learn More

will be added

X\