1 THIMOTI 5

1U nga kawuki ni gu ronogela muthu nya khongolo nya guvbindre uwe, aholu, mu kawuke nga babe wago. Madzaha ma kawuke nga vandriyago. 2Vega githawo ga vanyamayi nya vakhongolo, nga vamayi, vale nya dzimbiri, nga vandriyago, khu githawo nya gikhongolo. 3Sayisa dzinoni dzi gu mwalo wawe nya gusayiswe khuye. 4Aholu, va gu bani vari ni sanana mwendro vatugulo, va ngu yela gu girela githawo valongo vawe, ni gu va bweledzela wuhindzi va nga giredwa khu sikhosane sawe. Kholu, khidzo Nungungulu a dzi vbwetago. 5Oyu a gu noni, khu lisine, nari mwalo waye, a gu vega gutumba gwaye ga Nungungulu gikhati gyatshavbo, a gu lombelela ni gu dhumisa Nungungulu wutshigu ni mihani. 6Aholu, oyu a dzi ningedzelago gutsakisa givili, ambari na gu vbanya, fude. 7Va dundrugise gambe esi, gasi va landrise fanelo yawe. 8Oyu a si sayisigo valongo vaye, ngudzungudzu va ndrangani gwaye, bombile gukhodwa guvbindra wule nyamba khodwa. 9Noni yi vbwetago gu bela tsawani nya dzinoni, gu vbwetega na yiri ni livbandre na limwedo magumi myaga, na yi vbanyide gwadi ni mwama waye. 10Gu vbwetega a tidwa nga nyamayi moyo a giridego mithumo nya gululame, a hevbudzidego gwadi sanana saye, a kodzago gu hakha sisiwana, a dzi vegidego vbavbatshi thumoni nya vakhodwa, a phasedzedego sisiwana sigaradzoni gwawe, a thumidego mithumo yatshavbo nya yadi. 11U nga dzumeli gu hakha dzinoni dzi ngarigo sagadzyana kholu va nga dogorela gudzegwa, va hambana ni Kristo, 12va rwala nandru khu gu diga gisambanyo gyawe nya guhegule. 13Va olovela gu khala basi, va gimbila khu ndranga ni ndranga, va ganelela mapepetela niso nyambaya khumo. 14Khu kharato, gu ngu yela dzinoni dzi ngarigo sagadzyana dzi dzegwe, dzi velega sanana, dzi sayise dzindraga dzawe, nyamba ninga wulanga nala a ganela guvivba khu gukhodwa gwathu. 15Kholu dzimbe dzinoni dzi ndreyide dzi gu landra Sathane. 16A gu bani aromo nyamayi nya mukhodwa, a gu ni dzinoni ndrangani gwawe, a na dzi sayise, gasi libandla li si lemedwi, li kodza gu sayisa dzinoni nya mbana wawe. 17Vathangeli nya libandla, vale va thumago gwadi thumo wawe, va ngu yela gu zundzwa guvbindra pimo, ngudzungudzu ava va tshumayelago ni guhevbudza. 18Kholu, Milowo nya gu Age yari khiyo: "U nga segi likana nya mombe na yi gu vbula dzimbewu." Yi engedza gambe khiyo: "Githumi gi na ni fanelo nya guhakhe." 19U nga dzumeli guhakha mahungu nya gu ketsarwi vathangeli nya libandla nyambana dzifakazi dzimbili ambari dzitharu. 20Avo va ghohago va kawuke mwandrani, gasi vale vambe vafela gu khala hwanga. 21Nyi ngu gu lomba, mbeli ga Nungungulu ni Jesu Kristo ni sirumwa saye, u gira wuhindzi u sayise sileletelo sesi, u si lamuli mahungu khu gupima gwago, ni gihathela. 22U nga vbiredzeli gu handzega mandza muthu thumoni nya libandla, u nga rwali nandru nya sighoho sa mumbe muthu, gimbila khu mavbanyelo nya yadi. 23U nga seli mati basi, sela gambe vbinyu vbadugwana khu kota nya ndrani gwago, ni madwali yago nyamba kala. 24Aholu, sighoho sa vambe vathu si ngu tidwa khu vatshavbo, si gu lamudwi, simbe sighoho si na tidwa khu hwane nya gikhati. 25Khu magirelo ya mawowo, mithumo nya yadi, eyi yi tidwago ni eyi nyamba tidwa gima kha yi na sihala.

will be added

X\