1 THIMOTI 3

1La gu ganela lisine lito leli li gu khilo, muthu a gu dogorela gu phara thumo nya guthangele libandla, hathide thumo nya wadi. 2Kholu, muthangeli gu vbwetega muthu a lulamidego, mwama nya wadi nya gurule a gu ni nyamayi moyo basi, a dzi pharago, a gengedego, a kodzago guhakha vapfhumba ni guhevbudza. 3Oyu a si dzi ningedzeligo wadwani, ambari gudwanisa, aholu, a kodzago gu timisela, a si vegigo likhulo, asiri mugoli nya dzitsapawu. 4Oyu a kodzago gu fumela ndranga yaye, a kodzago gu hevbudza githawo sanana saye. 5Kholu, muthu amba kodza gu sayisa ndranga yaye, a na kodza kharini gu phara libandla la Nungungulu? 6Kha gu vbwetegi oyu a gu muphya gukhodwani, a nga dzi khusedza a gu thega gighononi gya Sathane. 7Gu vbwetega muthu a ningwago githawo ambari khu vambe vathu va walo, gasi a si solegi a thegela napwini wu riyidwego khu Sathane. 8Khu magirelo ya mamowo, vadiyakoni navo gu vbwetega vari vathu va zundzegago ni gu ganela lisine, va si dzi ningedzeligo wadwani, ni maalakanyo nya guvbwete wutetema, 9gu vbwetega va vbanye sihalo nya gukhodwe khu mapimo nya lisine. 10Avo navo va na hegule khu gu khedzwa, khu hwane nya avbovbo, gya gumba manega gihoso, va ngu fanela gu phela thumo wawe. 11Vanyamayi navo, gu vbwetega vale va lulamidego, va gu mwalo milembo, va dzi pharago, va tumbegago ga silo satshavbo. 12Mudiyakoni, gu vbwetega oyu a gu ni nyamayi moyo basi, a gu babe a dzi kodzago gu sayisa sanana saye ni ndranga yaye. 13Vale va na thumago gwadi, va na mana wuzundzo nya wukhongolo, va kodza gu ganela na va tiyile mahungu nya gukhodwe ga Jesu Kristo. 14Nya gu gu lovela silo sesi na nyi gu tumba gu kheni nyi nata khu gu vbiredza nyita wonana nago. 15Aholu, nya guhwela, khala nu gu dziti gu khuwe gu vbweta gu khala makhalelo muni nyumbani ga Nungungulu, a gu libandla la Nungungulu a vbanyago, a gu lidingo ni giseketelo nya lisine. 16Sihalo nya gukhodwe hi ganelago khuwo, khu lisine, khongolo: "Uye a di dzi gira muthu,a wonwa na lulamide khu Liphuvbo la Nungungulu a wonwa khu sirumwa sa Nungungulu,a huweledwa ga va nya mayigo,a hakhwa mafuni gwatshavbo, va khodwa gwaye mafuni a dhumiswa khu Nungungulu."

will be added

X\