1 THIMOTI 2

1Guhegula, nya gu lomba gu kheni milombelo ni gulomba ni gulombelela ni gubonga yi na giredwe vathu vatshavbo ga Nungungulu. 2Lombelelani khu vafumeli ni vathangeli nya mufumu gasi hi vbanye khu gurula, hi khalega gwadi, hi dhumisa Nungungulu khu githawo gyatshavbo. 3Khidzo dzi vbwetegago. Khidzo a dzinago Nungungulu, Muvbanyisi wathu. 4Uye a gu vbweta gu khuye vathu vatshavbo va vbanye ni guti lisine, 5nya gukhavo womo Nungungulu moyo basi, ni Mutshanganisi moyo a tshanganisago Nungungulu ni vathu, khu Jesu Kristo a gu muthu nuye 6a nga ningelago guvbanya gwaye khu gufela guvbanyisa vathu vatshavbo. Khayo Mahungu Nungungulu a ma tivisidego khu gikhati gyakone. 7Khiso nyi nga emisedwa ga iso, gu khala muganeli ni mupostoli, ni muhevbudzi, gasi guhevbudza va nya mayigo gukhodwa ni lisine. Nya gu ganela lisine, kha nyi ganeli malipha. 8Khu kharato, nya gu vbweta vama vatshavbo va gira nombelo, ni wevbini wulanga, va khusedza mandza ma agidego nya mbana likhulo ni wukhusu. 9Khu magirelo yamamowo gu vbweta vanyamayi va ambala myendra yi yelago, khu githawo ni gu dzi phara, va nga dzi mburisi khu gu lugela ndzudzu, ni gu ambala ndralama ambari maniya ni dziphera ni myendra nya seda. 10Va na ambale nga edzi gu yelago khidzo vanyamayi, va dzi garadze khu gu tsakisa Nungungulu khu mithumo nya yadi, kha nga edzi gu lombago khidzo ga vanyamayi va khodwago. 11Gikhati nya sihevbulo, vanyamayi va na degule, vapwe, va dzi nogisa. 12Kha nyi dzumeli nyamayi a hevbudza ambari guruma vama, aholu, a na khale khu gurula, 13kholu Nungungulu guhegula a di vanga Adhamu, khu hwane nya gikhati khavbo a nga vangago Eva. 14Oyu a nga thega mu gusengwani a hambana ni nayo wa Nungungulu, khandri Adhamu, khu nyamayi, nyamayi khuye a nga sengwa, a gu hambana ni nayo wa Nungungulu. 15Aholu, nyamayi a na vbanyiswa khu gu velega sanana, ni guvbanya khu gukhodwa ni lihaladzo ni githawo ni gu dzi phara.

will be added

X\