1 THIMOTI 1

1Eni Pawulo, Mupostoli wa Jesu, nyi nga hathwa khu Nungungulu Muvbanyisi wathu ni Jesu Kristo gutumba gwathu, 2nyi ngu gu lovela eli lidangalila, uwe Thimoti, gyanana gyangu nya lisine gukhodwani. Wuhigo ni lihaladzo ni gurula gutago khu ga Nungungulu Babe wathu ni ga Jesu Kristo, Pfhumu yathu, gu na khale ni uwe. 3Nyi ngu gu lomba u simame gukhala iyoyo Efeso, nga olu nyi nga gu embela gikhati nyi nga hongolago tigoni ga Makedhoniya. Vomo iyoyo vambe va hevbudzago Ivhangeli nya guhambane. Nya gu vbweta uwe u va gire va dige isoso. 4Va nga landriseli silo nya tumbunuko ni sibongo nyamba vbela sa vakokwe. Isoso sa gu wusa guganedzana ni mayunga, kha si giri guhaladza ga Nungungulu, ogu hi gu tigo khu gukhodwa. 5Aholu, fanelo nya gihevbudzo gyathu, khu guwusa lihaladzo li dugago khu monyoni wu agidego, khu mapimoni nya yadi, ni gukhodwa nya lisine nyamba pfhadzedzela, 6Vambe va ndreyile ga esi silo, va landrela sihevbudzo nyamba phasa gilo. 7Va gu dzi gira vahevbudzi nya Nayo na va si siti esi va ganelago, ambari gu si pima ni tiyiso wakone. 8Hi ngu dziti gu khethu Nayo wa Mosi khwadi ga oyu a wu thumisago khu fanelo. 9Hi ngu dziti nya gukhethu Nayo kha wa vegedwa vale va lulamidego, va landrago guhaladza ga Nungungulu, wu vegedwe vale va si landrisigo, ni va nyamba yingisa, ni sighohi, ni vale va si mu dzumeligo ni gu thava Nungungulu ni satshavbo nya guage, ni vale va songago babe ni mayi ni vambe vathu, 10ni vale va girago guvivba, va bhayana khu wama wawe, ni vale va sanisago vakwawe, ni va nya malipha, ni vale va sambanyago malipha, ni vale va girago ni gevbini gilo nya guhambane ni sihevbulo nya lisine. 11Eyi khiyo Ivhangeli nya Mahungu nya Yadi nya Maphya ya Nungungulu nya wudhumo nyi ningidwego. 12Nyi ngu bonga Jesu Kristo, Pfhumu yathu, a nyi ningidego tshivba, a nyi tumbidego a nyi vega thumoni gwaye. 13A nyi girede esi, ambari nyi nga bani nyiri muvali, mutshanisi ni muhembululi. Ambari ulo, nyi mane wuhindzi kholu, nyi di gira khu wuhangi, gikhati nyi nga bani nyi si gu hakhi gukhodwa. 14Gambe wuhigo wa Pfhumu yathu Jesu Kristo wu tade ngudzu ni gukhodwa ni lihaladzo hi gu nalo ga Jesu Kristo. 15Magana yaya ma na ni fanelo nya guhakhwe ma dzumedwa khu gukhodwa: Jesu Kristo dzude mafuni guta vbanyisa sighohi, eni kheni gighohi gyakone nya guphele. 16Aholu, nyi manide wuhindzi, gasi khavbo gwangu, Jesu Kristo a phela gu yeyedza gutimisela gwaye gwatshavbo, gasi eni nyi khale giyeyedzo ga vale va nga vbweta guta khodwa gwaye, vafela gu mana guvbanya nya gupindruge. 17Rungudzo ni gidhumo gi na vegwe ga Pfhumu nya gikhati gyatshavbo, nya gupindruge, nyamba wonega, Nungungulu wa moyo, olu kala gupindruga, Amen. 18Thimoti, gigodwa gyangu, nyi ngu gu ninga sileletelo sesi, si gimbilago gumogo ni magana nya guprofete ga Nungungulu, aya u nga tiviswago. Ema ga ayo, simamisa gu dwana nga edzi Nungungulu a dzinago khidzo, 19u vegisa gukhodwa ni mapimo nya lisine. Vambe va digile, va dzimeledwa khu gukhodwa. 20Heminewu ni Alexandre va gu lumba tsawa yoyo, nyi va ningede ga Sathane gasi va hevbule gumba poyila Nungungulu.

will be added

X\