1 VATESALONIKA 5

1Vandruye, khu mahungu nya gikhati ni matshigu si na gu giregago silo soso, kha gu vbwetegi gu ganela gambe gimbe gilo. 2Enu mu ngu dziti gwadi nya gukhenu litshigu la Pfhumu li nata nga mbafa, vbakari nya wutshigu. 3Gikhati vathu va ganelago khavo: "Litigo li lade, gu mwalo gilo," khavbo avbo gu natago, khu gipitipiti, gumbemba vbatshani gwawe. Va na khala nga nyamayi nya mimba gikhati a lumwago, kha va na vbuluga. 4Vandruye, enu kha mu vbanyi gidemani nya wutshigu, khu guralo, litshigu lolo kha li dzi kodzi gu vboha ga enu kha nga mbafa, yitago wutshigu. 5Enu mwa gu vbanya guwonegelani nya mihani, kholu ethu kha hi lumbi wutshigu ambari gidema. 6Khu kharalo, hi nga khali na hi lade nga vambe, hongoleni hi khedzisele, hi vbanye khu gu dzi phara. 7Kholu, vale va lalago, va gu lala wutshigu, ni vale va levago, va gu leva wutshigu. 8Gasi ethu hi lumbago, mihani, ha gu vbanya khu gu dzi phara, hi vhikedwa khu gitshango nya gukhodwe ni lihaladzo, ni gihugu nya litunga a gu gutumba nya guvbanyiswe. 9Khu kharalo, Nungungulu kha hi emisela gu hi sanisa, aholu, a hi emisede guya mana guvbanya khu ga Pfhumu yathu Jesu Kristo. 10Uye a difa khu kotani nya ethu, gasi mu guvbanyani ambari gufani hi vbanye gumogo naye gikhati gyatshavbo. 11Khu kharato, tiyisanani, phasanani moyo ni moyo nga edzi mutago na mu gu gira kala olu. 12Vandruye, hi ngu mi lomba mu ninge githawo ga vale va tago khu lina la Pfhumu va ta thumela enu, vathangeli, valuleki vanu. 13Va sayiseni khu ligolo ni lihaladzo, khu thumo yoyo va gu nawo. Vbanyani khu gurula vbakari gwanu. 14Vandruye, hi ngu mi lomba gambe, kawukani va nya mahudzuri, tiyiselani ava va rerekago, sayisani vadwali, mu hunisela vatshavbo. 15Mu nga bweledzelani guvivba khu guvivba. Aholu girelanani wuwadi vbakari gwanu ni vatshavbo. 16Vbanyani khu gu tsaka gikhati gyatshavbo. 17Mu nga garali khu gu gira milombelo. 18Bongani Nungungulu ga silo satshavbo, Aya khayo mavbanyelo a ma vbwetago Nungungulu vbakari gwanu, ni wuhengeli ga Jesu Kristo. 19Mu nga degudzi lito nya Liphuvbo nya gu Age, 20mu nga yeyisi vaprofeti. 21Khedzani gwadi satshavbo; mu vegisa esi nya sadi, 22ndreyani ga satshavbo esi nya guvivbe. 23Nungungulu nya gurula a na agise ni gu sayisa sivili sanu ni mihefemulo yanu kala a gu wuya Pfhumu yathu Jesu Kristo. 24Oyu a nga mi hathani tumbegide a na gira esi a nga tumbisago. 25Vandruye, hi dundrugeni nethu omu nya milombelo yanu. 26Losani vathu vatshavbo va Nungungulu khu maloselo nya wundruye. 27Nyi ngu mi lombani, khu lina la Pfhumu, mu hevbulela lidangalila leli vathu vatshavbo. 28Wuhigo wa Pfhumu yathu Jesu Kristo wu na khale ni enu.


Copyright
Learn More

will be added

X\