1 VATESALONIKA 4

1Vandruye, mu hakhide ga ethu sileletelo nya ndzila yi yelago gu yi landrani gasi gu tsakisani Nungungulu. Hi ngu mi lombani ngudzu khu lina la Pfhumu mu pharise gu gimbila khu ndzila yoyo, nga edzi mutago mu na gu gira, gasi mu andra ngudzu. 2Dundrugani sileletelo hi nga mi ningani na hi gu rumwa khu Pfhumu yathu Jesu Kristo. 3Nungungulu a gu vbweta mu vbanye khu ndruda, mu gimbilele hwidzo ni wubhayi, 4gasi moyo ni moyo a kodza gu thumisa khu githawo givili gi mu lumbago. 5Mu nga dzumeli gu ndrindrwa khu maalakanyo nya guvivbe nga edzi va girago vale va gu mwalo gukhodwa ga Nungungulu. 6Ga silo sesi, kha gu vbwetegi na moyo a girela guvivba ndriyaye gukhodwani, ambari gu mu supha. Nga olu hi mi embedego ni gu mi tivisani, Pfhumu a ngu tsayisa satshavbo sighoho soso. 7Nungungulu kha hi ranela guvivba, a di hi ranela gu vbanya khu ndruda. 8Khu guralo, oyu a si yingeligo milayo yeyi, khandri a gu yeyisa muthu, aholu, a gu yeyisa Nungungulu, a mu ningago Liphuvbo nya gu Age. 9Mahungu nya lihaladzo ga vandriyathu khu gukhodwa, kha gu vbwetegi gu ganela gambe khiso, kholu enu mu hevbudzidwe khu Nungungulu gu haladzanani. 10Lihaladzo lanu nya wundruye li ngu vboha ga vandriyathu va vbanyago tigoni gwatshavbo ga Makedhoniya. Vandruye, hi ngu mi lombani mu li andrisa ngudzu. 11Dwanelani guvbanya khu gurula, vbedzani mwabune sigaradzo sanu, thumani gasi mu mane guvbanya, nga edzi hi nga mi hevbudzani khidzo. 12Khu guralo, mu na mana lisima ga vathu va vbavbandze, mu vbanya nyamba lemedzani muthu. 13Vandruye, kha hi vbweti mu khale gidemani khu mahungu ya vafudego, mu nga saniseki kha nga vale va gu mwalo gutumba hi gu nago ethu. 14Kholu, ethu hi ngu khodwa gu khethu Jesu fude a wuga; khu kharalo, vale va fudego, Nungungulu a na va wusa khu Jesu va wuya gumogo naye. 15Egi nyi vbwetago gu ganela khu lina la Pfhumu, nya ri kheni, ethu hi vbanyago, guwuyani ga Pfhumu, kha hi na va thangela vale va fudego. 16Iyo Pfhumu wurumba, gikhati gu na pwalago lito nya girumwa nya gikhongolo ni pundru wa Nungungulu, yi na tshiga khu ndzadzini, vale va fudego ga Kristo, va na wuga guhegula. 17Khu hwane, ethu hi vbanyago, hi na ya hakhwa gumogo navo mapfhini, na hi gu khinga Pfhumu ndrengelengeni. Khu guralo, hi na khala ni Pfhumu kala gupindruga. 18Khu kharato, tiyisanani moyo ni moyo khu mahungu yaya.

will be added

X\