1 VATESALONIKA 3

1Khu kharato, na hi thindregide, nyi di wona gu khala dhoropani ga Atena eni nyenga, 2nyi mi rumelani Thimoti, ndriyathu a guromo thumoni wa Nungungulu, a tshumayela Mahungu nya Yadi ya Kristo. Nyi mu rumide guta mi tivisani ni gu mi phasani gukhodwa gwanu, 3gasi mu si thurugi khu sisaniso sesi. Enu mu ngu dziti gwadi gu khenu khiso esi hi si lindrelago. 4Na nyiri iyoyo gwanu nyi di mi embedeni khu libango li na gu hi dugelelago. Khu guralo, li giregide nga olu mu dzitigo. 5Khidzo idzodzo, gu kala nyi ruma Thimoti khu guvbiredza, guta wona gukhodwa gwanu gwa gu gimbila kharini, mwendro saye mukanganyisi a mi lingideni, a ghohetela mihandro nya thumo wathu. 6Olu, Thimoti wide khiyo gwanu, a hi wuyede ni mahungu nya gutshambe khu gukhodwa gwanu ni lihaladzo mu gu nalo ga vambe. A hi embede gambe khuye mu ngu hi dundruga ngudzu, mu ngu hi suva gu hi wona, nga ethu nethu hi mi suvago gu mi wona. 7Mahungu yoyo nya gukhodwe gwanu ma hi tangadziside ngudzu mu sigaradzoni ni gusanisekani gwathu. 8Olu ha gu dzipwa na hi gu vbanya nya dzadi, khu gupwa gusimama gutiya ni gukhodwani ga Pfhumu. 9Hi ngu yela gubonga Nungungulu, khu gutsaka gogo mu hi girelago mbeli gwaye. 10Wutshigu ni mihani, ha gu lomba ngudzu ga Nungungulu a hi ninge gutsaka khu guta wonana gambe nanu, gasi hi kodza gu vbedzisa ugo gu tshadego vbagukhodwatunu gwanu. 11Gasi Nungungulu Babe wathu ni Jesu Kristo Pfhumu yathu va na hi endredze ndzilani nya gute iyo gwanu. 12Pfhumu a na engedzele ngudzu gu dandrisa lihaladzo lanu, li andra, mu haladzana moyo ni moyo, ni vathu vatshavbo. Lihaladzo lanu li na khale idzo saye ni eli hi gu nalo ethu khu enu. 13Khu guralo, myonyo yanu yi na bani yiri gululamani nya gwadi, khavbo mu na gu kodzago guya emani mbeli ga Nungungulu, Babe wathu, na mu agide, muri mwalo nandru, gikhati Pfhumu yathu Jesu Kristo a na gu wuyago ni sihathwa saye satshavbo.

will be added

X\