1 VATESALONIKA 1

1Eni Pawulo, ni Silvano ni Thimoti, hi ngu losa libandla nya vathu va Nungungulu va vbanyago dhoropani ga Tesalonika, na hi patane khu lihaladzo la Nungungulu, ni la Pfhumu yathu Jesu Kristo, hi ngu mi suvela wuhigo ni gurula. 2Hi ngu bonga Nungungulu gikhati gyatshavbo khu enu, hi ngu mi dundruga mwatshavbo milombeloni yathu. 3Hi ngu ma ti gwadi mavbanyelo nya gukhodwe gwanu, ni gu dzi garadza gwanu khu lihaladzo, ni gutiya gutumbani gwanu mu gu nago khu Pfhumu yathu Jesu Kristo, mbeli ga Nungungulu Babe wathu. 4Vandruye, ethu hi ngu dziti gu khethu Nungungulu a di mi hathani khu lihaladzo. 5Khu guralo, ethu hi dita mi tivisa Mahungu nya Yadi nasiri khu gu ganela basi, aholu khu tshivba nya Liphuvbo nya gu Age, ni gu tiyiswa nya gungi. Mu ngu dziti edzi hi nga dzi vegisago khidzo vbakari gwanu, khu lihaladzo lanu. 6Enu mu khade giwonelo gyathu ni gya Pfhumu, khu gu dzumelani magana yaye, khu gu tsaka nya Liphuvbo nya gu Age, ambari mu nga bani mu nari ni sigaradzo. 7Khu kharalo, mu khade giwonelo ga vakhodwa vatshavbo va Makedhoniya ni va Akaya. 8Gukhugela khavbo gwanu, mahungu ya Nungungulu ma di phalalega tigoni gwatshavbo ga Makedhoniya ni Akaya, gukhodwa gwanu ga Nungungulu gu di pwala malangani yatshavbo, khu isoso kha gu vbwetegi gu ganela gambe gimbe gilo. 9Khu guralo, vatshavbo va gu ganela khu mahakhelo mu nga hi hakhani khayo ni gu digani vanungungulu nya malipha, mu thumela Nungungulu nya guvbanye, nya lisine. 10Olu, na mu gu lindrela guwuya ga Mwanaye Jesu khu ndzadzini, oyu a mu wusidego khu ga vafudego, a na hi vbulugisa ga libango li na gutago.

will be added

X\