1 PEDRO 5

1Eni nyi gu lidhota neni, nyi ngu khongotela mambe madhota. Eni nyi fakazi nya gusaniseke ga Kristo, nyi na hengela wudhumoni wu na gu wonegiswago. 2Nyi ngu mi laya mu havise gwadi tshambi wa Nungungulu a mi ningidego; thumani na mu tshulegide myonyo kha nga idzo a dzinago khidzo Nungungulu; nasiri khu gu gurumedzwa. Mu nga thumeli gu hakha dzitsapawu. Aholu thumani khu gu dzina gwanu. 3Mu nga dzi girini vamune, mu khozisa vathu mu ningidwego, aholu khalani giwonelo nya tshambi. 4Gikhati a na gutago Muhavisi nya khongolo, mu nata hakha gihugu nya wudhumo nyamba kuwuluga. 5Enu madzaha, yingisani vakhongolo. Thumelanani mwatshavbo khu gu dzi nogisa, kholu Milowo nya gu Age yari khiyo: "Nungungulu a ngu vengana ni va nya gu dzi khusedza, aholu a ngu khusedza va nya gu dzi nogisa." 6Khu guralo, dzi nogiseni vbavbatshi nya mandza nya tshivba ya Nungungulu, gasi a mi khusedze khu gikhati gi enedego. 7Vegani ga Nungungulu sigaradzo sanu satshavbo, kholu uye a ngu mi khathalela. 8Dzi phareni, mu dzi wonele, kholu, nala wanu Sathane a ngu mi dzuwulugela na gu dzuma-dzuma nga nghala yi vbwetego muthu gu mu hodza. 9Mu ganedzeni, mu tiya gukhodwani gwanu, kholu enu mu ngu dzitini nya gukhenu vandriyanu va phalalegidego mayigoni gwatshavbo va ngu saniseka navo khu sigaradzo nya nga esi mu si manago. 10Nungungulu nya wuhigo watshavbo a mi ranidego khu ga Jesu Kristo, guta belani wudhumoni gwaye nyamba vbela, khu hwane nya gu na mu sanisekile vbadugwana, a na mi kategisani, a mi tiyisela, a mi ninga tshivba ni gutiya nya lisine. 11Ga uye, wudhumo ni tshivba kala gupindruga! Amen. 12Nya gu mi lovela lidangalila leli na nyi gu phasedzedwa khu Silvano, uye khu mawonelo yangu a gu ndruye nya gutumbege. Nya gu vbweta gu mi tiyisela ni gu mi ningani wufakazi nya gukheni makategwa mu ma hakhidego giyeyedzo nya lisine nya wuhigo wa Nungungulu. Simamani mu tiya ga wuhigo wowo. 13Libandla li guromo Bhabhiloniya li hathidwego khu Nungungulu li ngu mi losedzela. Gyanana gyangu Marko, gi ngu mi losedzela nigyo. 14Losanani khu beju nya wundruye. Gurula gu na khale ni enu mwatshavbo mu lumbago Kristo.

will be added

X\