1 PEDRO 4

1Kha nga ulo Kristo a nga saniseka givilini gwaye, enu nenu gu vbwetega mu saniseka kha nga edzi a nga saniseka khidzo uye. Kholu, oyu a sanisekago givilini kha dzi digi a fumedwa khu gighoho. 2Khu guralo, gukhugela muhuno matshigu yanu ma nga tshadego nya guvbanye mafuni momu, vbanyani khu gu landrisa guhaladza ga Nungungulu, nasiri gu landrisa gudogolela nya wuthu. 3Gale enu mu luzile gikhati nya gingi khu gu girani esi va nya mayigo va si golago gu gira. Gikhati gyogyo, enu mu di gu vbanya wubhayini, ni gudogolela nya givili, ni wubewudzi, ni limidzo, ni guleva, ni gunyenyeza gwatshavbo nya gukhozele vanungungulu nya malipha. 4Olu, mahedheni ma ngu liwuga khu gumba hengelani gambe navo guvbanyani gogo nya guhandruge, nya wuphuphulu; pimani kholu va mi valago. 5Aholu va na lamudwa khu Nungungulu, a dzi vegisedego gulamula va nya guvbanya ni va nya gufa. 6Khigyo gi nga gira gu tiviswa Ivhangeli ga vale va fudego, ga vale va nga lamudwa va nga gu vbanya mafuni momu, kha nga gulamudwago sivangwa satshavbo. Va tivisidwe Mahungu nya Yadi gasi, guvbanyani gwawe nya liphuvbo, va vbanye kha nga edzi Nungungulu a vbanyago khidzo. 7Mahegiso nya silo satshavbo gomo vbafuvbi. Gu vbwetega mu gengela, mu dzi wonela, gasi mu kodze gu lombelela. 8Ga silo satshavbo, haladzanani khu gyanu nyamba pfhadzedzela, kholu, lihaladzo li ngu dzi kodza gu tsetselela sighoho nya singi. 9Hakhani gwadi vapfhumba, nyamba garadzega. 10Khalani vagimbidzisi nya vadi nya siningwa mu hakhidego ga Nungungulu. Muthu ni muthu a na thumise giningwa gyaye afela gu phasa vakwawe. 11Oyu a tivisago, a na tivise Mahungu ya Nungungulu. Oyu a thumago, a na thume khu tshivba a ningwago khu Nungungulu. Girani kharati gasi mithumoni yanu yatshavbo a rungudzwe Nungungulu khu ga Kristo, a gu na ni wudhumo ni tshivba kala gupindruga! Amen. 12Dzipari dzangu nya sigodwa, mu nga liwugi khu gu wona silingo sesi nya gulemele si mi dugelelago, nga khwatshi silo siphya nya gusamadzise mu si wonago. 13Aholu, nengelani khu gu hengela gusaniseka ni Kristo gasi mu tale khu gutsaka gikhati wudhumo waye wu na wonegiswago. 14Enu mu kategide mwa gu vadwa khu gu pwani mu vapizane va Kristo, kholu, gu yeyedza gu pwani Liphuvbo nya wudhumo a gu Liphuvbo la Nungungulu lomo avbo gwanu. 15A nga manegi na moyo vbakari gwanu nya gusaniswe khu mahungu nya wughevenga, nya wuvafa, ni gubelela siloni ga vane. 16Aholu, muthu a gu saniswa khu gu pwani mukristo, a nga khali dzitshoni, a na bonge Nungungulu, khu lina lolo nya Wukristo. 17Gikhati nya gulamudwe gi vbohile. Avo va lumbago Nungungulu va na hegula khavo va lamudwa. Olu hi na phelago khethu hi lamudwa, ginani gi na gu dugelelago vale va nga mba hakha Mahungu nya Yadi ya Nungungulu. 18Nga ulo yi ganelago Milowo nya gu Age khiyo. "Olu gu garadzago gu vbanyiswa ava nya vadi, ginani gi na gu dugelelago ga vale nyamba khodwa ni sighohi?" 19Khu guralo, ava va sanisekago khu guhaladza ga Nungungulu, va na ningele mihefemulo yawe ga Muvangi a tumbegidego, na va gu simama gu gira esi nya sadi.


Copyright
Learn More

will be added

X\