1 PEDRO 3

1Enu nenu vanyamayi, yingelani vama vanu, gasi va gu bani varomo vambe va si khodwigo khu Mahungu ya Nungungulu, va ndrindrwe khu mavbanyelo yanu nya yadi, va ta khodwa. Kha gu na vbwetega gu ganela gilo, 2kholu va na wona mavbanyelo yanu nya yadi nya githawo. 3Mu nga dwaneli gu dzi mburisela khu vbavbandze, khu gu luga mindzudzu, ni guambala dziphera ni maniya nya ndralama, ni dzingandzu nya gurengwe khu dzitsapawu nya dzingi. 4Aholu, wumburi wanu wu na khale khu myonyoni gwanu, kholu, khuwo wumbiri nyamba vbela, wumburi nya liphuvbo nya gurule, nya ndruda, khiso si gu na ni lisima ga Nungungulu. 5Khidzo kharato, vanyamayi va gale nya ndruda va nga bani va dzi mburisela khidzo, va di vega gutumba gwawe ga Nungungulu, ni gu yingisa vama vawe. 6Khidzo a nga gira Sara; a di yingisa mwama waye a mu rana khuye pfhumu yaye. Enu mu na khala sanana saye mwa gu girani esi nya sadi nyamba thava gilo. 7Enu nenu vama, vbanyani ni vagadzi vanu khu gurula ni githawo. Va phareni gwadi na mu gu dziti gu khenu nyamayi gyombo nya wukheta. Kholu avo navo va na hakha ga Nungungulu guvbanya gwa gumogo mu na gu hakhago nenu. Girani kharati gasi mu si dzuwungeli milombelo yanu. 8Gu vbwetega mwatshavbo mu hengela mapimo ni monyo moyo, mu golana khu gyanu khu lihaladzo nya wundruye, muri vathu nya gurule ni gu dzi sodzisa. 9Mu nga bweledzeli guvivba khu guvivba, ambari guvala khu guvala. Aholu kategisani kholu mu ranedwe guta hakha gikategiso. 10Kha nga idzo yi ganelago khidzo Milowo nya gu Age khiyo: "Oyu a vbwetago gu vbanya gwadi,ni gu wona matshigu nya gunengele,a nga ganeli silo nya guvivbe,gambe a na hegise gulipha. 11A na ndreye ga silo nya guvivbe,a gira iso nya sadi; a na vbwete gurula, a gira tshivba nya gu gu mane. 12Kholu, Pfhumu, maho yaye ma gu khedza vathu nya vadi;gikhati gyatshavbo a gu yingisa milombelo yawe.Aholu, a ngu wugela avo va girago guvivba." 13Enu, mwa gu vbweta gu gira esi nya sadi, khu mani a na mi girelago guvivba? 14Aholu mu na bani mu kategile mwa gu mana sisaniso khu kotani nya gugire iso nya sadi. Mu nga thavi muthu, gambe mu nga thurugi. 15Rungudzani Kristo kha nga Pfhumu myonyoni gwanu, khalani na mu dongile gasi gu ningani phindrulo ni wevbini a na gu mi wudzisago khu mahungu nya gitumbo nya gukhodwe mu gu nago. 16Aholu, girani esi khu monyo nya gurule ni githawo, kha nga vathu va tengidego mapimoni gwawe, gasi mwa gu vadwa, vale va ganelago guvivba khu mavbanyelo yanu nya yadi nya wukristo, va na khala dzitshoni. 17Kholu, gwadi gusaniseka khu gu gira silo nya sadi, a gu bani ari ugo guhaladza ga Nungungulu, guvbindra gu gira guvivba. 18Kristo nuye fude gumogo basi khu kotani nya sighoho, na gufela enu. Muthu nya wadi afela va nya guvivba, gasi gu va yisa ga Nungungulu. Uye fude khu givili, aholu a gu wuswa khu Liphuvbo nya gu Age. 19Khu Liphuvbo a di hongola aya tivisa Mahungu ga maphuvbo ma nga bani ma khothedwe. 20Maphuvbo ya vale va nga mba yingela Nungungulu, gikhati uye a nga virela khu gu timisela, matshigu yale Nowa a nga bani a gu gira litaro. Avo nya vadugwana, nya livbandre na vararu vathu, va nga bani varomo litaroni, khavo va nga vbuluga gufa khu talo nya mati. 21Mati yale a diri giyeyedzo nya gubhapatiswe, mu vbanyiswago khugo enu, muhuno. Gubhapatiswa gogu khandri gwa gu handza givili khu vbavbandze, aholu, gitumbiso gi girwago ga Nungungulu, gi duga khu monyoni wu agidego. Guvbanyiswa gogu gwa guta khu guwuga ga Jesu Kristo. 22A litidego ndzadzini aya khala nyamudye ga Nungungulu, a fumela sirumwa satshavbo ni vafumeli ni dzitshivba dzatshavbo dza ndzadzini.

will be added

X\