1 PEDRO 2

1Khavbo avbo, digani satshavbo nya guvivbe: malipha, gusengedzela, lidiwo ni milembo. 2Khalani nga sanana si ngari gu velegwago, mu vbweta mahwe nya liphuvbo gikhati gyatshavbo, gasi mu sela, mu dandre, mu vbanyiswe. 3Kha nga Milowo nya gu Age yi ganelago, khiyo: "Enu mu lingide wuwadi wa Pfhumu." 4Hidzimelani ga Pfhumu a gu giwindri nya guvbanye, gi gu gilo nya lisima. 5Hidzimelani nenu mu dzi ningedzela ga Nungungulu, gasi a mi thumise kha nga siwindri nya guvbanye, gu vbaha nyumba nya Liphuvbo ya Nungungulu. Nyumbani momo, enu mu womo kha nga tsawa nya vaphasi nya mhamba va agisidwego, va hathidwego gasi gu ningela miphaso yi tsakisago Nungungulu khu ga Jesu Kristo. 6Kholu, Milowo nya gu Age yi ngu ganela khiyo: "Eni nyi hathile giwindri nya lisima ngudzu;nyi gi vega Siyoni kha nga giwindri nya gikole nya nyumba;aholu, wule a khodwago ga egi giwindri gima kha na khala dzitshoni." 7Giwindri gyogyo khya lisima ngudzu ga enu mu khodwago. Aholu, ga ava va si khodwigo; "Giwindri gi nga nyenywa khu vavbahi gi khade giwindri nya lisima ngudzu." 8Wumbe wulanga gambe Milowo nya gu Age yi ngu ganela khiyo: "Egi khu giwindri gi na gu tshunganisago vathu;giwindri gi na gu va thesago." Avo va tshunganede kholu va nga mba khodwa khu Mahungu, khiso si dongisedwego avo. 9Aholu, enu mu lifumbu li hathidwego, mu vaphasi va Pfhumu, mu lihundzu li agisedwego Nungungulu, mu vathu mu lumbago uye. Enu mu hathidwe gasi mu huwelela tshivba ya Nungungulu, a mi ranidego mu duga gidemani, muta guwonegelani nya wenengedzo waye. 10Gale enu mu disiri vathu va Nungungulu, Olu mu vathu vaye; gale mu di si wuti wuhindzi wa Nungungulu, olu mu wu hakhide. 11Dzipari dzangu nya sigodwa, dundrugani gu khenu mu va luveli ni vawuyi ga litigo leli, Khu guralo, nyi ngu mi lomba mu dige gunavela nya wuthu gu dwanago ni hefemulo. 12Mavbanyelo yanu vbakari nya mahedheni gu vbwetega nari mavbanyelo nya yadi. Gasi va gu mi singedza guvivba, va konwe khu mithumo yanu nya yadi, vafela gu rungudza Nungungulu litshigu a natago. 13Khu khotani ya Pfhumu yingelani vafumeli vatshavbo nya litigo: gukhugela ga Mufumeli nya khongolo, 14ni dzindruna dzaye a dzi vegidego gasi gu tsayisa ava va girago guvivba, ni gu zundza ava va girago iso nya sadi. 15Kholu Nungungulu a gu vbweta gu khuye enu mu gire esi nya sadi, gasi sipumbu ni mapemi va si mani gilo nya guganele khu enu. 16Vbanyani nga vathu nya gutshulege; mu dzega gutshulega mu gu gira gilo nya gusihe guvivba; aholu vbanyani nga sithumi sa Nungungulu. 17Vegani githawo ga vathu vatshavbo, haladzani vandriyanu nya gukhodwe, thavani Nungungulu mu vega githawo ga vafumeli. 18Enu sithumi, yingelani ni gu vega githawo ga vafumeli vanu, nasiri ga avo nya vadi basi, aholu, ni ga ava nya guvivbe navo. 19Kholu, mwa gu timisela sigaradzo khu gu dzitini gu khenu khugo guhaladza ga Nungungulu, uye a na mi kategisani. 20Mwa gu saniswa khu sighoho mu sitigo, wuzundzo muni mu na gu wu manago khu gutimisela gwanu? Aholu mwa gu saniswa na mu girile esi nya sadi, Nungungulu a na mi kategisa khu gu timisela gwanu. 21Kholu, khiso a mi ranedego iso. Uye Kristo, wurumba waye, sanisekile kotani yanu, a hi ninga giwonelo gasi hi landra ndzila yaye. 22Uye gima kha gira giwono, gambe mwalo a mu pwidego na gu ganela guvivba khu kanani gwaye. 23Gikhati a nga vadwago kha nga hakha khu guvala, gikhati a nga saniswa kha nga wugela muthu, aholu a di vega gutumba gwaye gwatshavbo ga Nungungulu, Mulamuli nya lisine. 24Uye Kristo, wurumba waye, dzegide sighoho sathu givilini gwaye a si vbayega vbagihambanotunu, gasi afe gwathu muthu nya gighoho hi gu vbanya lisineni. Kristo bayisidwe gasi enu mu mane guvbanyiswa. 25Enu, gale mu di gu khala nga dzinvuta nya gudzimele, olu mu wuyisidwe ndzilani, gasi muta landra muhavisi ni musayisi nya mihefemulo yanu.

will be added

X\