1 PEDRO 1

1Eni, Pedro, mupostoli wa Jesu Kristo, nyi ngu lova eli lidangalila ga vathu va Nungungulu va vbanyago vbavbandze nya litigo lawe, mayigoni ga Ponto, Galatiya, Kapadokiya, Asiya, Bhitiniya. 2Enu mu hathidwe khu guhaladza gwa Nungungulu Babe, mu giridwe vathu va Nungungulu khu tshivba nya Liphuvbo laye, gasi mu yingela Jesu Kristo ni gu agiswa khu Novba waye. Wuhigo ni gurula gu na tadzisedwe avbo gwanu. 3A na rungudzwe Nungungulu, Babe wa Pfhumu yathu Jesu Kristo, khu lihaladzo laye nya likhongolo, a hi ningidego guvbanya nya guphya khu guwuga ga Pfhumu yathu Jesu Kristo. Khu guralo, myonyo yathu yi tade khu gutumba nya guvbanye. 4Khu kharato, hi ngu virela gu hakha thomba nya sikategiso, eyi Nungungulu a yi vegisidego gasi gu ninga vathu vaye. Uye a yi vegede enu ndzadzini, avba yi si kuwulugigo, yi si pfhureligo, yi si hagaligo. 5Sikategiso soso sa gu lumba enu khu gukhodwa, si vegidwe khu tshivba ya Nungungulu, gasi mu mana guvbanya gu dongisedwego gasi guta wonegiswa khu gikhati nya guhegise. 6Nengelani khiso, ambari ulo mu guromo gugaradzegani khu kotani nya silingo nya singi mu si manago. 7Silingo soso sa gu vbweta guwonegisa gukhodwa gwanu nya lisine. Ambari ndralama a gu gilo gi fuvago, yi ngu lingedzedwa khu nilo; kharati nugo gukhodwa gwanu, gu na ni lisima ngudzu guvbindra ndralama, gu ngu yela gu lingwa gasi gu yeyedza gutiya gwanu. Khu kharato, mu na kodza guhakha wuzundzo, ni wudhumo, ni rungudzo litshigu Jesu Kristo a na gu dzi wonegisago. 8Enu mu ngu mu haladza, ambari mu nga mba mu wona; mu ngu khodwa gwaye, ambari mu si mu wonigo olu. Khu guralo, enu mu ngu nengela khu gutsaka nya gukhongolo ngudzu ni wudhumo wu tandrwago gu ganedwa khu magana. 9Enu mu na ni gunengela gogo kholu mu hakhago mihandro nya gukhodwe gwanu, a gu guvbanyiswa nya mihefemulo yanu. 10Vaprofeti va wudzisede ni gusola gwadi mahungu nya guvbanyiswe gogo, va tivisile mahungu nya giningwa nya guvbanyiswe, igyo Nungungulu a vegisedego gu ninga enu. 11Va zamide gu vbweta guti gikhati muni, matelo muni; Liphuvbo la Kristo li nga bani liri gwawe li va tiviside gikhati gyogyo khu gu va embela sisaniso a nga hadza gu si mana Kristo, ni wudhumo wu nga vbweta gu manega khu hwane nya iso. 12Gikhati vaprofeti va ganedego khu Mahungu nya Yadi, aya mu ma pwidego enu olu, Nungungulu tivisile gu khuye thumo wawe wu di si phasi avo, aholu wu di phasa enu. Vagimbidzisi nya Mahungu Yadi nya Ivhangeli va nga ganela khu tshivba nya Liphuvbo nya gu Age, li nga rumedwa khu ndzadzini, khavo va mi embedego lisine leli. Silo nya gu, ambari sirumwa sa Nungungulu si di gu gola niso gu siti. 13Khu guralo, khalani na mu dongide, mu nga sengwi khu gilo; vegani gutumba gwanu gwatshavbo ga giningwa mu na gi hakhago litshigu Kristo a na gu dzi wonegisago. 14Yingisani Nungungulu, mu nga dzumeli guvbanya gwanu gu fumwa khu gunavela nya mavbanyelo yanu ya gale; na mu nga gu vbanyela gidemani. 15Aholu, vbelelani guaga ga satshavbo esi mu girago, kha nga Nungungulu a mi ranidego a agidego. 16Kholu Milowo nya gu Age yari khiyo: "Enu agani, kholu eni nyi agile." 17Milombeloni gwanu mu ngu rana Babe, Nungungulu a lamulago vathu vatshavbo nyamba khedza khu khovbe, a khedzago khu mavbanyelo ya muthu ni muthu; khu kharalo, mu fanede gu mu ninga githawo matshiguni nya guvbanye gwanu mafuni momu. 18Kholu enu mu ngu wutini gwadi tengo wu livbidwego gasi gu mi tshula guvbanyani nya gumba phasa gilo, mu gu hakhidego ga vakokwe vanu. Tengo yoyo khandri gilo gi kuwulugago nga ndralama mwendro parata. 19Enu mu dzegisidwe khu Novba nya lisima wa Kristo, a gu uye Nvutana nyamba hasa, nyambana mavala. 20Kristo hathidwe khu Nungungulu na li si gu vangwi litigo, a gu wonegiswa ga matshigu yaya nya guhegise, gasi gu phasa enu. 21Khavbo gwaye, enu mu ngu khodwa ga Nungungulu a mu wusidego khu ga vafudego, a mu ninga wudhumo. Khu guralo, gukhodwa ni gutumba gwanu gomo ga Nungungulu. 22Olu enu mu agisidwego khu gu yingela lisine; olu mu gu ni lihaladzo nyamba pfhadzedzela ga vandriyanu khu gukhodwa, haladzanani khu gyanu khu myonyo yanu yatshavbo. 23Khu tshivba nya magana nya guvbanye nya gupindruge ya Nungungulu, enu mu velegidwe nya luphye khu Babe a sifigo, nasiri khu vababe nya gufe. 24Kha nga yi ganelago Milowo nya gu Age:"Vathu vatshavbo va khade kha nga mwasi wa thembweni,ni gungangamela gwawe gu khala nga genge nya mwasi;mwasi wa gu banga, senge si gu thega. 25Aholu, magana ya Pfhumu ma ngu simama kala gupindruga."Khayo aya magana mu resedwego khu Mahungu Yadi nya Ivhangeli.

will be added

X\