1 JOHANE 4

1Dzipari dzangu nya sigodwa, mu nga dzumeli vatshavbo avo va ganelago gu khavo va na ni Liphuvbo la Nungungulu. Hegulani khu gu va sola vathu vovo mufela gu dziti gu khenu Liphuvbo lolo la guta khu ga Nungungulu kamwe gani. Kholu vaprofeti nya vangi nya malipha va phalalegide ni litigo latshavbo. 2Egi gi na gu mi tugudzisago gu liti Liphuvbo la Nungungulu khegi: Oyu a ganelago khuye Jesu Kristo a dzi girile muthu, a na ni Liphuvbo li tago khu ga Nungungulu. 3Aholu, oyu a ganedzago isoso nya mahungu ya Jesu Kristo, mwalo Liphuvbo li tago khu ga Nungungulu. Liphuvbo a gu nalo kheli la nala wa Kristo. Enu mu pwide na gu ganedwa gu pwani liphuvbo lolo li nata, ilo lomo olu tigoni. 4Vanavangu, enu mwa gu lumba Nungungulu. Mu pade vaprofeti nya malipha. Kholu, Liphuvbo mu gu nalo enu, li na ni tshivba guvbindra liphuvbo la vale va lumbago litigo leli. 5Avo va gu ganela khu sa mafuni momu, litigo li va yingela. Kholu avo va gu lumba litigo. 6Aholu, ethu ha gu lumba Nungungulu. Oyu a mutigo Nungungulu a ngu hi yingisa; oyu a si mutigo Nungungulu kha hi yingisi. Khidzo kharati hi na gutigo guhambana nya Liphuvbo nya lisine ni liphuvbo nya malipha. 7Dzipari dzangu nya sigodwa, hi na haladzane khu gyathu, kholu, lihaladzo la guta khu ga Nungungulu. Oyu a haladzago khuye a gu gyanana gya Nungungulu, a ngu muti Nungungulu. 8Oyu a si haladzigo, kha muti Nungungulu, kholu Nungungulu lihaladzo. 9Khidzo kharato a nga yeyedza lihaladzo laye ga ethu. Uye a di rumela Mwamana waye wa Moyo tigoni, gasi ethu hi mane guvbanya khu kota yaye. 10Lihaladzo kheli: Khandri ethu hi nga mu haladzago Nungungulu, uye khuye a nga hi haladzago, a hi rumela Mwamana waye, gasi, khavbo gwaye, hi ditshedzwa sighoho sathu. 11Dzipari dzangu nya sigodwa, olu Nungungulu a hi haladzidego kharati, ethu nethu gu vbwetega hi haladzana khu gyathu. 12Mwalo na moyo a nga wona Nungungulu; ethu ha gu haladzana khu gyathu, Nungungulu a ngu vbanya ni ethu ni lihaladzo laye gambe li tadzisegile avbo gwathu. 13Khidzo kharati hi dzitigo gu khethu hi ngu hengela gu vbanya ni Nungungulu a nuye Nungungulu a ngu vbanya ga ethu, kholu: Uye a hi ningile Liphuvbo laye. 14Ethu hi si wone, gambe hi ngu tivisa ga vambe gu khethu Babe rumede Mwamana waye, gasi guta khala Muvbanyisi nya litigo. 15Muthu a gu tiyisa nya gukhuye Jesu Kristo Mwamana wa Nungungulu, Nungungulu a ngu vbanya gwaye, uye nuye a ngu hengela gu vbanya ni Nungungulu. 16Ethu nethu hi ngu liti lihaladzo Nungungulu a gu nalo ga ethu, gambe hi ngu khodwa ga lihaladzo lolo. Nungungulu lihaladzo, oyu a vbanyago khu lihaladzo a ngu hengela gu vbanya ni Nungungulu, gambe Nungungulu a ngu vbanya gwaye. 17Lihaladzo la gu tadzisega ga ethu, gasi hifela gu tiya litshigu nya gulamudwe, kholu, guvbanya gwathu mafuni momu, gu khade kha nga ogu ga Kristo. 18Lihaladzo li mwalo hwanga. Lihaladzo nya lisine li ngu vbedza hwanga, khu guralo, lihaladzo kha li tadzisegi ga wule a gu na ni hwanga, kholu, hwanga wa gu resa tsayiso. 19Gasi ethu, hi ngu haladza kholu Nungungulu khuye a nga hi haladza guhegulani. 20Muthu a gu ganela khuye, eni nyi ngu mu haladza Nungungulu, na gu nyenya ndriyaye, a gu lipha. Kholu, mwalo a dzi kodzago gu haladza Nungungulu a si mu wonigo, a gumba haladza ndriyaye a mu wonago. 21Oyu khuye Nayo hi nga ningwago khu Kristo: Oyu a haladzago Nungungulu, a na haladze gambe ni ndriyaye.

will be added

X\