1 JOHANE 3

1Wonani wukhongolo nya lihaladzo la Babe ga ethu, gu kala hi gu ranwa pwani hi sanana sa Nungungulu. Lisine kamwe, hi sanana sa Nungungulu. Litigo kha li hiti, kholu kha la muti Nungungulu. 2Dzipari dzangu nya sigodwa, ethu olu hi sanana sa Nungungulu, aholu, hi si gu dziti gu khethu hi na bani hiri ginani. Ethu ha guti esi nya gukhethu, gikhati Kristo a na dzi wonegisago, hi na fanana naye, kholu hi na mu wona wurumba waye, nga edzi a guromo khidzo. 3Muthu watshavbo a gu na ni gutumba gogu ga Kristo a gu dzi agisa kha nga Kristo a agidego. 4Oyu a ghohago a na ni nandru nya gundrage nayo wa Nungungulu, kholu gughoha gu ndraga nayo. 5Enu mu ngu dzitini gu khenu Kristo dzude guta dusa sighoho sathu, nari gu uye mwalo gighoho. 6Khu guralo, oyu a hengelago guvbanya ni Kristo kha simami gu ghoha. Aholu, oyu a simamago gughoha gima kha mu wona, gambe kha muti. 7Vanavangu, mu nga dzumeli mu sengwa khu muthu! Oyu a girago esi nya lisine lulamide, kha nga nuye Kristo a lulamidego. 8Oyu a simamago gu ghoha a gu lumba Sathane. Kholu Sathane ghohile gukhugela guhegulani. Mwamana wa Nungungulu atede isoso; guta pfhungumula mithumo ya Sathane. 9Oyu a gu gyanana gya Nungungulu kha simami gu ghoha, kholu Liphuvbo la Nungungulu li ngu thuma gwaye. Khu guralo, kha dzi kodzi gu simama a ghoha, kholu Nungungulu Babe waye. 10Ogu khugo guhambana nya lisine nya sanana sa Nungungulu ni sanana sa Sathane. Oyu a si girigo esi nya gululame, ni gumba haladza ndriyaye, khandri gyanana gya Nungungulu. 11Mahungu mu ma pwidego gukhugela guhegulani khaya: Hi na haladzane khu gyathu. 12Hi nga giri nga Kayimi a nga bani a gu lumba Sathane a songa ndriyaye. A di mu songa khu kotani nya ginani? Kholu mithumo a nga bani a gu gira Kayimi yi di vivbile, gasi eyi ya ndriyaye yidiri yadi. 13Vandriyangu, mu nga liwugi mwa gu zondrwa khu vathu va mafuni momu. 14Hi ngu dziti gu khethu hi dugile khu gufani hi bela guvbanyani. Ha gu dziti kholu hi ngu haladza vandriyathu. Oyu a si haladzigo a nga fude. 15Oyu a vengago ndriyaye musongi. Enu mu ngu dzitini gu khenu musongi mwalo guvbanya nya gupindruge. 16Kharato, khavbo hi dzitigo gu khethu ginani lihaladzo: Kristo ningede guvbanya gwaye kotani gwathu. Khu guralo, ethu nethu hi ngu yela gu ningela guvbanya gwathu khu kotani ya vandriyathu. 17Muthu a gu gitetema, a gu wona ndriyaye nari ni wusiwana, aholu a sega monyo waye, a si mu ningi gilo, a na tiya kharini gu ganela khuye a ngu haladza Nungungulu? 18Lihaladzo lathu li nga khali basi nya guganele ni mabhulo. Li na khale lihaladzo nya lisine, li dzi yeyedza khu mithumo. 19Khidzo kharati hi dzitigo gu khethu ha gu lumba lisine la Nungungulu, myonyoni gwathu ha gu dzipwa na hi tiyile mbeli ga Nungungulu. 20Kholu, myonyo yathu ya gu hi kona, hi ngu dziti nya gukhethu Nungungulu khongolo guvbindra myonyo yathu, a nguti satshavbo. 21Khu guralo, dzipari dzangu, nya sigodwa, myonyo yathu ya mba hi kona, hi tiyile mbeli ga Nungungulu. 22Ethu hi ngu hakha gwaye satshavbo esi hi lombago, kholu hi ngu yingisa milayo yaye, ni gu gira esi si mu tsakisago. 23Esi a rumago khesi; nya gukhuye hi na khodwe linani ga Mwanaye Jesu Kristo, ni gu haladzana khu gyathu nga edzi Kristo a nga hi rumago. 24Oyu a yingelago milayo ya Nungungulu a ngu hengela guvbanya ni Nungungulu, Nungungulu nuye a ngu hengela guvbanya naye. Ha gu siti isoso khu kotani nya Liphuvbo a hi ningidego.


Copyright
Learn More

will be added

X\