1 JOHANE 1

1Hi ngu mi lovelani khu mahungu ya wule a nga bani aromo gukhugela guhegulani, uye hi mu pwidego ni gu mu wona khu maho yathu. Khu lisine, ethu hi mu wone, hi wuya hi mu phara khu mandza. Ha gu ganela khu Lito nya guvbanye. 2Gikhati guvbanya gogu gu dzi wonegisidego, ethu hi gu wone. Khu guralo, ethu hi ngu ganela khugo, hi mi tivisani guvbanya nya gupindruge gu nga bani guri ni Babe, hi tuledwego gu guti. 3Esi hi si wonego ni gu sipwa, khiso hi mi tivisago nenu, gasi enu nenu mufela gu hengela gumogo ni ethu, kha nga ethu nethu hi hengelago ni Babe ni Mwanaye Jesu Kristo. 4Hi ngu mi lovelani silo sesi gasi gutsaka gwanu gu tadzisega. 5Mahungu hi ma pwidego ga Jesu Kristo, ayo hi ma tivisago gwanu nenu, khaya: Nungungulu Wenengedzo, ga Uye gu mwalo gidema. 6Khu guralo, ha gu khethu hi ngu hengela gumogo ni Nungungulu, bwelo khavbo hi gu vbanya mu gidemani, ha gu lipha, gambe kha hi vbanyi lisineni. 7Aholu, ha gu vbanya guwonegelani, kha nga olu Nungungulu a guromo mu guwonegelani, gu yeyedza gu pwani hi ngu hengela gumogo ethu hatshavbo, gambe Novba wa Kristo, Mwamana waye, wu ngu handza sighoho sathu satshavbo. 8Ha gu ganela gu khethu hi mwalo gighoho, ha gu dzi kanganyisa ethu vamune wurumba; lisine li mwalo ga ethu. 9Aholu, ha gu ganela sighoho sathu, hi ngu dzi kodza gutumba ga Nungungulu, uye a lulamidego a na hi tsetselela sighoho sathu, a hi agisa guvivbani gwatshavbo. 10Ha gu khethu hi mwalo gighoho, hi ngu dzega Nungungulu hi mu gira muliphi; gambe ha gu yeyedza gu khethu mahungu yaye ma mwalo gwathu.

will be added

X\