1VAKORINTO 9

1Ina kha nyiri muthu nya gutshulege, gani? Kha nyiri mupostoli, gani? Pfhumu yathu Jesu Kristo kha dzi wonegisa gwangu, gani? Ahati enu, kha muri handro nya thumo wangu gukhodwani gwanu, gani? 2Nya gu bani nyisiri mupostoli ga vambe vathu, nyi ngu pima ni gu tiya gu kheni nyi mupostoli ga enu. Kholu gukhodwa gwanu khigyo gifungo gi tiyisago thumo nya wupostoli wangu. 3Oyu a nyi wudzisago nya gu dzi vhikela kheni: 4Gasi nyi mwalo fanelo nya guhakhe guhodza ni gusela nyi ningwago vbathumotunu wangu, gani? 5Ina nyi mwalo fanelo nya gudzege neni ndruye nya nyamayi nya mukristo a nyi bangaladza liendroni, kha nga edzi va girago vambe vapostoli, vandruye va Pfhumu ni Pedro, gani? 6Mwendro mwa gu pima gu khenu eni ni Bharnabha basi khethu hi gu ni giguruvedzo nya gu dzi thumele habune khu mandza yathu. 7Khu levbini lisotshwa li yago nyimbini khu dzitsapawu dza kwamani gwaye? Khu wevbi muthu a limago lithembwe nya miuvha, a si hodzi mihandro yaye? Khu wevbini muhavisi a si seligo mahwe nya tshambi waye? 8Ina nya gu ganela esi khu gupima nya wuthu basi, gani? Aha Nayo kha wu ngu ganela nuwo kharato, gani? 9Nayoni wa Mosi gu lovidwe pwani: "U nga hungi likana nya mombe nya gu bani yi vbula sivbila." Ina kamwe Nungungulu a gu tsetsa dzimombe basi, gani? 10Khandri a gu ganela esi kotani yathu, gani? Khu lisine silo sesi si lovidwe khu kotani yathu; sa gu tshamusela gu pwani muthu a limago a na ni fanelo nya gulime khu gutumba; ni oyu a vbulago emede gu hakhiswa nuye gipandre gyaye. 11Na hi yade gwanu dzithomba nya hefemulo ina mwa gu wona nari gilo gikhongolo ha gu hakha silo sanu nya mafu, gani? 12Olu vambe vathu va gu ni fanelo yoyo vbakari gwanu, ina ethu hi mwalo nawo guvbindra avo, gani? Ambari ulo kha hi mi henguli fanelo yoyo. Aholu ha gu timisela satshavbo gasi gumba vegela gikhunguvanyiso Ivhangeli ya Jesu Kristo. 13Ina mwa gu hangwa khu gu khenu ava va thumelago nyumbani ga Nungungulu va na ni fanelo nya guhodziswe khu nyumba ya Nungungulu, gani? Vaningeli nya mhamba kha va ngu hakha gipandre nya miningelo ya vbagiluvelotunu, gani? 14Khidzo gambe kharato ni vale va gimbidzisago thumo nya gutivise mahungu nya Ivhangeli. Pfhumu a gu ruma gu khuye va vbanye khu thumo wawe nya gutivise Ivhangeli. 15Aholu eni nyi si gu henguli muthu dzifanelo dzatshavbo dzedzi. Gambe khandri nya gu mi lovelani esi khu gufela gu mi hengula gilo, kholu nyi ngu dzumela gufa guvbindra gu gira silo nya nga isoso. Kha nyi dzumeli muthu gu nyi dzegela wuzundzo wangu. 16Nyi mwalo fanelo nya gu dzi gire matshandza khu thumo nya gutivise Ivhangeli, kholu i fanelo yangu gu gira isoso. Khidzo, libango ga eni nyamba tivisa Ivhangeli! 17Nari gu pwani nya gu thuma thumo nya gu wu khugele khu gudzina gwangu, nyi diri ni fanelo nya guvirele gu hakhiswa. Aholu nyi girumwa nyi landrisago thumo nyi ningidwego. 18Khu gwevbini guhakha gwangu? Guhakha gwangu khu gu tivisa Ivhangeli, nyamba hengula gilo, khu thumo wangu. 19Ambari nyi tshulegidego khu maphuvbo yatshavbo, nyi dzumede gu dzi gira khumbi ya vatshavbo nyifela gu mana nya vangi. 20Vbakari nya Vajudha, nyi dzi giride Mujudha. Ambari nyi dzitigo gu kheni kha nyi fumedwi khu Nayo wa Mosi, nyi dzi vegide vbavbatshi nya Nayo khu gufela gu vbindrugedza Vajudha. 21Ni vale va si gu Vajudha, va si landrisigo Nayo wa Mosi, nyi dzi giride neni kha nga muthu nyamba landrisa Nayo nyifela gu mana avo va si gu Vajudha, nasiri khu gu nyenya Nayo wa Nungungulu kholu nyi ngu fumwa khu Nayo. 22Nya gu manega vbakari nya vathu nyamba tiya gukhodwani gwawe, nya gu khala neni nga muthu nya gumba tiya, nyi fela gu vbanyisa va nyamba tiya. Khu kharato eni nya gu dzi gira satshavbo ni vatshavbo, khu gu kheni mwendro nyi na mana guvbanyisa vambe ni vambe. 23Nya gu gira satshavbo sesi khu kota nya Ivhangeli khu gu dwanela guhakha makategwa nya Ivhangeli. 24Mu ngu dzitini gwadi gu khenu ava va girago mapalisana nya gututume va gu tutuma vatshavbo, aholu moyo basi a kokago givango, khavbo avbo tutumani nga uye mufela guya mana hure. 25Vathu vatshavbo va girago mapalisana va gu dzi phara siloni satshavbo. Va gu gira satshavbo esi khu gufela gu koka givango nya litamo nyamba hwela gufa. Gasi ethu ha gu thumela gu koka givango gi vbanyago kala gupindruga. 26Khidzo kharati nyi tutumago khidzo, nasiri kha nga muthu a tutumago nyamututume nyamba guti a guya hayini. Khidzo kharati nyi dwanago khidzo, nasiri kha nga muthu a rinyago sibhakela pfhukani a veta liphuvbo. 27Eni nya gudwana ni givili gyangu, nyi gi khozisa, gasi nyi si mani givalo nya gugimbile nyi tshumayela vakhwathu, eni mune nyi nyenywa khu Nungungulu.

will be added

X\