1VAKORINTO 8

1Olu nya guvbweta gu ganela khu mahungu nya nyama nya guphasedwe vanungungulu nya malipha. Ethu hatshavbo hi ngu pima gwadi. Aholu, gupima gu ngu gira muthu a dzi gugumugisa; gasi lihaladzo khilo li vbahago ni gu dandrisa gukhodwa. 2Muthu a gu pima gu khuye a ngu giti gwadi gilo, khu lisine, a si gu giti gwadi khu edzi gu vbwetegago khidzo. 3Aholu, muthu a gu haladza Nungungulu, Nungungulu nuye a na mu muti. 4Gasi khu mahungu nya guhodze dzinyama nya guphasedwe sithombe nya vanungungulu nya malipha, hi ngu dziti gu khethu sithombe nya vanungungulu nya malipha khandri vanungungulu tigoni. Kholu mwalo mumbe Nungungulu vbavbandze ga Nungungulu wa moyo basi. 5Vomo va ranwago "vanungungulu" va ndzadzini ni va mafuni; gu gira gu khwatshi vanungungulu nya vangi ni dzipfhumu nya dzingi dzi guromo. 6Gasi ethu ha guti gu khethu womo Nungungulu moyo basi, a gu Babe ni muvangi nya silo satshavbo; ethu ha gu vbanyela uye. Gambe yomo Pfhumu Mweyo basi, Jesu Kristo. Silo satshavbo si vangidwe khu tshivba yaye, ni ethu hi womo khu kotani gwaye. 7Aholu khandri vatshavbo va si pimago silo sesi. Vambe, khu gu olovela gu phasela sithombe nya vanungungulu nya malipha, gikhati va hodzago nyama yeyi, va gu alakanya nungungulu nya malipha, va dzi nyenyezisa khu kotani nya gu mba tiya gupimani gwawe. 8Guhodza khandrugo gu hi tshanganisago ni Nungungulu. Ha mba hodza kha hi luzi gilo, ha gu hodza gambe kha hi wuyedwi khu gilo. 9Ambari ulo dzi woneleni, gasi gutshulega gwanu gu si khali gikhunguvanyiso ga vale nyamba tiya. 10Uwe u gu ni guti, wa gu wonwa khu oyu a sa tiyago nu khade vbaguhodzatunu mu ginyumbanani nya githombe nya nungungulu nya malipha, ina muthu yoyo kha na nga dzipwa na tiyisidwe guhodza silo nya guphasedwe dzinguluve, gani? 11Kharati, ndriyago a sa tiyago, oyu Kristo a fudego khu kotani gwaye, a na luza kotani nya guti gwago. 12Mwa gu ghohela vandriyanu khu gu va khunguvanyisa gukhodwani gwawe nyamba tiya, khu Kristo mu mu ghohelago. 13Khu kharato, nya gu wona gu kheni guhodza nyama nya miphaso gikhunguvanyiso ga ndriyangu, nyi na diga nyi si hodzi gambe, gasi gumba mu khunguvanyisa.

will be added

X\