1VAKORINTO 6

1Muthu wanu a gu dwana ni ndriyaye nya mukhodwa, a gu tiya kharini guya thela mahungu phathani ga va nya mayigo, a diga gu lomba a lamudwa khu madhota nya Libandla la Nungungulu? 2Ina mwa gu hangwa khu gu khenu sihathwa sa Nungungulu si fanede gu lamula litigo, gani? Na mu emisedwe gu lamula litigo, khu ginani mu padwa khu gu lamula mahungu nya guvbevbuge, gani? 3Kha mu dzitini nya gukhenu, ambari dzingilozi dza Nungungulu hi na dzi lamula ethu, gani? Ha gu tandrega kharini gu lamula silo sa mafuni? 4Mwa gu bani muri ni mahungu nya guvbanye nya mafu, khu ginani mu tutumela guya ma thela ga valamuli va si gu gilo ndrani nya libandla nya vakhodwa? 5Nya gu mi embela esi gasi mu khale dzitshoni, kholu nyi ngu dziti gu kheni vbakari gwanu vomo vagengeli va dzi kodzago gu lamula mahungu, va gu dwana va na ndruye ni ndruye. 6Aholu, gu manega gu muthu a tutumela gu hongola phathani ga va nya mayigo aya thela umo ketso ndriyaye; a ningela, kharati mahungu yawe ma lamudwa khu vathu nyamba khodwa. 7Ga gu manega mayunga vbakari gwanu sa gu yeyedza wumbihu wanu gukhodwani. Ina adisiri tshukwana gu tshaniseka nyambana nandru, gani? Ina adisiri gwadi muthu a dzumela gukalavedwa, gani? 8Aholu khenu mu girago esi nyamba lulama, mu belana khu gyanu, enu va na ndruye ni ndruye! 9Ina mwa gu hangwa khu gu khenu va nya guvivbedwa khu monyo, gima kha va na nga hodza thomba nya mufumu wa Nungungulu, gani? Mu nga dzi pembi! Va nya horo, va nya guphasa sithombe nya vanungungulu nya malipha, ni sibhayi, ni vama va dzi girago vanyamayi,va bhayana khu ni mwama kwawe, 10ni dzimbafa, ni va nya ligungo, ni dzibewudzi, ni va nya milembo, ni va nyambana milayo gima kha va na bela mufumuni wa Nungungulu. 11Vbakari gwanu vomo va nga bani vari ni mavbanyelo yoyo. Olu mu handzidwe, mu agiswa, mu gu girwa vathu nya gululame linani ga Pfhumu Jesu Kristo, khu tshivba nya Liphuvbo la Nungungulu wathu. 12Nyi ngu dzumedziswa gu gira silo satshavbo nyi sinago. Lisine; aholu khandri satshavbo a gu sadi gu si thuma; khandri satshavbo si phasago. Nyi tshulegide gu gira ni gevbini gilo, aholu gima kha nyi na dzumela gu dzi gira khumbi nyi fumedwa khu silo. 13Guhodza gu emede guya girumbuni, kha nga girumbu nigyo gi emedego guhakha guhodza. Aholu, Nungungulu a na pfhungunula sa sivili: guhodza ni girumbu. Aholu, givili gyathu kha gi yeli gu thumiswa wubhayi, kholu khya Pfhumu, Pfhumu nuye khwa givili. 14Uye Nungungulu a wusidego Pfhumu a na hi wusa nethu khu tshivba yaye. 15Ina kha mu dzitini nya gukhenu givili gyanu givbango gya kristo, gani? Nyi na dzega sivbango sa Kristo nyi si gira sivbango nya gibhayi, gani? Kha si kodzegi ni vbadugwana! 16Ina mwa gu hangwa khu gu khenu oyu a dzi tshanganisago ni gibhayi a gu khala mili moyo nagyo, gani? Milowo nya gu Age yari khiyo: "Va vavili va na khala muthu moyo basi." 17Gasi oyu a dzi tshanganisago ni Pfhumu a na khala muthu moyo ni Pfhumu khu liphuvbo. 18Thavani wubhayi! Kholu mambe mafumbu yatshavbo nya sighoho a girago muthu, kha si nyenyezisi givili gyaye. Aholu, oyu a girago wubhayi a ngu nyenyezisa givili gyaye. 19Ina kha mu dzitini gu khenu sivili sanu nyumba nya Liphuvbo nya gu Age, li vbanyago gwanu; Liphuvbo mu ningidwego khu Nungungulu, gani? Enu kha mu dzi lumbi enu vamune, 20kholu Nungungulu a mi rengide khu tengo nya wungi. Khu kharalo, rungudzani Nungungulu sivilini gwanu.

will be added

X\