1VAKORINTO 4

1Gu vbwetega vathu va hi wone kha nga sithumi sa Kristo hi ningidwego thumo nya gutivise ni gusayisa misihalo ya Nungungulu. 2Fanelo nya githumi khu gu khala na gi tumbegide ga Pfhumu yaye. 3Eni kha nyi theli kota gu lamudwa khu enu mwendro gu lamudwa khu mufumu nya vathu va tigoni; ni eni mune kha nyi dzi lamuleli nyabune. 4Eni kha nyi dzipwi nyiri ni nandru wa gilo. Ambari ulo, kha nyi dzi woni nga muthu nya ndruda. Pfhumu khuye a nyi lamulago. 5Khavbo avbo, mu nga tutumeli gu lamula gi si gu vbohi gikhati, virelani Pfhumu a wuye. Uye khuye anata wenengedzago esi si sihadego gidemani, ni gu funungula esi si sihadego myonyoni nya vathu. Khavbo avbo, muthu ni muthu a na ningwa khu Nungungulu wuzundzo wu mu fanelago. 6Vandruye, nyi ganede silo sesi nyi gu thula eni ni Apolo khu kotani gwanu, gasi mu hi wone kha nga giyeyedzo, mu hevbulela khavbo gupima magana ma gu khayo: "U nga vbindrisi avba gu lovidwego khu Nungungulu," gasi a si manegi ni moyo wanu a dzi gugumugisago khu gutsakela mumbe a nyenya mumbe muhevbudzi. 7Khu mani a nga gu ninga gu khala khongolo ga vakwanu? Satshavbo u gu naso khandri u di ningwa khu Nungungulu, gani? Khu ginani u dzi gugumugisago khwatshi esi u gu naso khwa hakha khu mandzani ga Nungungulu? 8Enu olu mu naso satshavbo mu si vbwetago! Nyambana ethu, enu mu khade dzipfhumu! Mawako nari pwani mwa gu khala dzipfhumu khu lisine, gasi ethu nethu hi kodze gu fuma nanu. 9Kholu nya gupimisa gu kheni Nungungulu vegide ethu vapostoli gu khala wulanga nya mahegiso, khwatshi hi vathu va lamuledwego gufa; hi khade mabhemba ga litigo, ga sirumwa sa Nungungulu ni ga vathu. 10Ethu hi handrugide khu kotani ya Kristo, gasi enu mu gengede khu ga Kristo! Ethu hi vbede tshivba, enu mu nayo; enu mu ngu ningwa githawo, ethu ha gu nyenywa. 11Kala ni muhuno, ethu hi va gu saniseka khu ndzala ni lidora, hi na ni wuhagadzo, hi ngu veteledwa, hi valegalegi nyambana gaya, 12hi ngu dzi garadza khu gu thuma khu mandza yathu. Va gu hi vala ethu ha gu va kategisa; va gu hi tshanisa ethu ha gu timisela; 13va gu hi tsorodzela ethu ha gu va hakha khu gwadi. Ni olu, ethu ha gu wonwa kha nga ndzilo nya litigo, kha nga vathu nya gunyenyeze guvbindra vathu vatshavbo. 14Khandri nya gu mi lovela silo sesi khu gufela gu mi thela dzitshoni, aholu nya gufela gu mi luleka kha nga sanana sangu nya sigodwa ngudzu. 15Kholu ambari mu mana mazana ni mazana nya vahevbudzi nya wukhodwa, gima kha mu na mana vababe nya vangi. Eni kheni nyi mi velegidego gukhodwani ga Kristo khu gu mi tivisa Mahungu nya Yadi. 16Khavbo avbo, nyi ngu mi embela gu kheni khalani vapizane vangu. 17Khu kota nya kharato, nyi rumede guta iyo gwanu Thimoti gyanana gyangu nya gigodwa gi tumbegidego ga Pfhumu. Uye anata mi dundrugisa milayo nya mavbanyelo ya vale va khodwago ga Kristo, milayo nyi gimbilago nyi gu hevbudza malangani ni mabandlani gwatshavbo. 18Vambe vbakari gwanu va di ghiya va dzi gugumugisa khu gu alakanya gu khavo gima kha nyi na ngata gambe iyo gwanu. 19Aholu nyi nata iyo gwanu nugunugu, nyamba hwela, Nungungulu a gu nyi phasa. Khavbo nyi nata wonago, nasiri magana ya ava va dzi gugumugisago, aholu mithumo yawe. 20Kholu mufumu wa Nungungulu khandri wa guganedwa khu magana basi, aholu khu mithumo. 21Ginani mu hathago: nyita ni mboma, mwendro nyita ni monyo nya gutale khu lihaladzo ni wuwadi?

will be added

X\