1VAKORINTO 2

1Vandriyangu, gikhati nyi ngata tigoni gwanu nyita mi tivisa sihalo nya gikungu gya Nungungulu, kha nyata ganela khu magana nya gusamadzise, mwendro khu guti nya guliwugise. 2Na nyiri vbakari gwanu, nyi di hatha basi gu mi tivisani Jesu Kristo a khokhothedwego vbagihambanotunu. 3Gikhati nyi ngata mi holelani khigyo, nyi diri muthu nyambana tshivba, nyi di gu ndrendremela ngudzu khu hwanga. 4Tshumayelo ni mahungu nyi mi hevbudzidego, kha nya si tiyisa khu magana nya wugengeli ni guti nya wuthu, aholu nyi si tiyiside khu siwonegiso nya tshivba nya Liphuvbo nya gu Age. 5Khu kharato, gukhodwa gwanu kha gu tiyiswi khu guti nya vathu, aholu, gwa gu tiyiswa khu tshivba ya Nungungulu. 6Ga vale va vidzidwego gukhodwani, nyi ngu tivisa guti. Khandri guti ga mafuni momu, mwendro ga vale va fumago khu tshivba mafuni, kholu avo, mahegiso yawe khu gu vbeledwa khu wufumu; 7gasi enu nya gu mi tivisani misihalo nya guti gwa Nungungulu, gu nga bani gu sihidwe khu gale; guti gule Nungungulu a gu vegisidego gukhugela guhegulani, gasi guta ninga ethu wuzundzo. 8Mwalo mufumeli wa mafuni a nga gu pima guti gogo. Nari gu pwani va di gu pimide, gima va sa khokhothela vbagihambanotunu Pfhumu nya wudhumo watshavbo. 9Aholu, kha nga yi ganelago Milowo nya gu Age: "Pfhumu dongisede ga vale va mu golago silo nya gu gima mwalo a si wonidego, mwendro gu sipwa, gambe mwalo a nga si pimisa." 10Nungungulu a hi tulede guti silo sesi khu tshivba nya Liphuvbo nya gu Age, kholu Liphuvbo li ngu wona satshavbo, ambari misihalo nya guete ya Nungungulu. 11Khu mani a wutigo sihalo nya muthu, vbavbandze nya liphuvbo nya wuthu li guromo ndrani gwaye? Khidzo nugo kharato ni misihalo ya Nungungulu, mwalo a yi pimago, sine Liphuvbo la Nungungulu basi. 12Ethu kha ha hakha liphuvbo la mafuni momu, aholu hi hakhide Liphuvbo li tago khu ga Nungungulu. Khavbo avbo, ethu hi ngu dzi kodza guti wuhigo watshavbo hi ningidwego khu Nungungulu. 13Khayo mahungu yaya nyi mi tivisago, nasiri khu magana nya guti nya muthu, aholu khu magana nya tshivba nya Liphuvbo. 14Oyu a tumbago wugengeli waye, kha dzumeli gu hakha mahungu a tiviswago khu Liphuvbo la Nungungulu, a gu mapwa kha nga silo nya wupumbu. Kha dzi kodzi gu si pima, kholu mwalo a si pimago a gu mba wenengedzwa khu Liphuvbo. 15Muthu a fumwago khu Liphuvbo a ngu kodza gu pima silo satshavbo, aholu, uye kha lamudwi khu gilo kholu gu lovidwe omu nya Milowo nya gu Age pwani: 16"Khu mani a matigo mahingigedzo ya Pfhumu?Khu mani a mu ningago wusingalagadzi?" Gasi ethu, hi na ni mahingigedzo ya Kristo.


Copyright
Learn More

will be added

X\