1VAKORINTO 15

1Vandruye, nya guvbweta gu mi dundrugisa Mahungu nya Yadi nyi mi tivisidego, mu ma hakhidego, mu wuya mu ma sayisa khu gu tiya. 2Khayo aya mahungu ma na mi vbanyisago mwa gu ma sayisa gwadi nga edzi nyi mi tivisidego khidzo; mwa gu bani mwa sa khodwa mahala. 3Gilo nya guphele nyi di mi tivisa esi eni neni nyi nga hakhago: Kristo fude khu kota nya sighoho sathu kha nga edzi gu lovidwego khidzo omu nya Milowo nya gu Age. 4Dzingidwe, a wuga khu litshigu nya wuraru, kha nga yi ganelago Milowo nya gu Age. 5A dzi wonegiside ga Pedro, a wuya a dzi wonegisa gambe ga tsawa nya vale nya likhumi na vavili. 6Khu hwane nya ugo, a di dzi wonegisa gambe ga gikwata nya vathu nya tengo nya guvbindre livbandre mazana vakhodwa, khu gumogo. Nya vangi vawe va ngu guvbanya ni olu, vambe va fude. 7Khavbo avbo, a di wonega ga Jakobe ni ga vapostoli vatshavbo. 8Khu guhegisa a di wonega gambe ga eni, nyi gu khwatshi nyi gyanana nya guvelegwe ma si gu eneli matshigu yaye. 9Kholu eni kheni nyi gu dugwana ga vapostoli, gambe kha nyi faneli gu ranwa mupostoli, khu kota nyi nga tshanisa Libandla la Nungungulu. 10Aholu khu wuhigo wa Nungungulu kha idzo nyi gu idzo. Gambe wuhigo a nyi ningidego, kha nyi ninga mahala. Eni nyi ngu thuma ngudzu guvbindra vatshavbo vapostoli. Ambari ulo khandreni nyi girago esi satshavbo, wuhigo wa Nungungulu wu thumago gumogo ni eni. 11Kholu, eni ni avo ha gu tivisa kharati, enu mu khodwe khu gu embedwa kharato. 12Ethu hi ngu tivisa gu khethu Kristo wugide khu ga va fudego, khu ginani vambe va gukhavo va nya gufa kha va wugi? 13Ha gu khethu va nya gufa kha va wugi, gu yeyedza gu pwani anuye Kristo kha wuga. 14Aholu, Kristo a gu bani a sa wuga, thumo wathu nya gutivise Mahungu ya Pfhumu khandri wa gilo, ni gukhodwa gwanu gambe kha gu phasi gilo. 15A gu bani ari kharato, ethu hi khade dzifakazi nya malipha dza Nungungulu. Hi tiviside gu khethu Nungungulu wuside Kristo khu ga va fudego, nari malipha, olu hi gu khethu va nya gufa kha va wugi. 16Ha gu khethu kha va wugi, Kristo nuye kha wuga. 17Aholu, a gu bani a sa wuga Kristo, gukhodwa gwanu gumwalo tiyiso, gambe mu ngari wugumbini nya sighoho sanu. 18Ambari ava va fudego na va gu khodwa ga Kristo va luzile navo. 19Gitumbo hi gu nagyo ga Kristo gya gu hegela sa mafuni momu basi, nyamba hi tshatugisa khisi kheyi nya guvbanye gogu, hi na manega ethu hiri ni libango nya guvbindre vathu vatshavbo. 20Aholu, Kristo wugide, khu lisine, khuye matiwula nya guwuge ga vafudego. 21Kha nga olu gufa gu manidego wulanga tigoni khu kota nya muthu moyo, guwuga ga va nya gufa gu bede tigoni khu kota nya muthu moyo. 22Khu kharato, vathu vatshavbo va modwe khu gufa khu gu hengela ni Adhamu; olu khu gu hengela ni Kristo, vathu vatshavbo va na bweledzedwa gambe guvbanya. 23Aholu, muthu ni muthu a na hakha guvbanya khu gikhati gyaye. Matiwula khu Kristo a gu gitumbiso ga vatshavbo. Na wugide Kristo, gu na landrela vale va mu lumbago va hakha navo guvbanya. 24Khavbo avbo, gu na vboha mahegiso nya silo satshavbo! Na fuviside mifumu, ni dzitshivba ni valala vatshavbo, Kristo a na ningela mufumu mandzani ga Nungungulu Babe. 25Kholu guvbwetega Kristo a fuma kala Nungungulu a gu khozisa valala vatshavbo khu tshivba yaye. 26Nala nya guhegise a na padwago, khu gufa. 27Nungungulu a mu ningide gufuma silo satshavbo. A gu pwani Nungungulu a Mu ningide gufuma silo satshavbo, gu yeyedza gu pwani Uye Nungungulu kha valedwi avba nya silo satshavbo, kholu khuye a ningago Mwanaye tshivba nya gufume silo satshavbo. 28Gikhati Nungungulu a na vegago silo satshavbo vbavbatshi nya mufumu wa Mwamana, Mwamana nuye a na dzi vega vbavbatshi nya mufumu wa Babe, a gu uye a mu ningago gu fuma silo satshavbo. 29Alakanyani vale va hakhelago gubhapatiswa va nya gufa. Ha gu khethu ava va fudego kha va wugi, khu ginani va va hakhelago gubhapatiswa? 30Ina ambari ethu kha hi ngu manega dzimhangoni gikhati gyatshavbo gani? 31Vandruye, khu gutsaka nyi gu nago mbeli ga Pfhumu yathu Kristo Jesu khu kotani yanu, nyi ngu mi embela gu kheni matshigu yatshavbo nya gu wona gufa mbeli gwangu. 32Nari pwani litunga nya likhongolo ngudzu nyi nga li dwanago dhoropani ga Efeso nyi di dwanela silo nya vathu basi, ginani nyi nga hadza guwuyedwa khigyo? A gu bani ari lisine gu pwani ava va fudego kha va wugi, hi na gira nga esi si nga ganedwago, pwani: "Hi na hodze hi sela kholu mindru hi nafa." 33Mu nga sengwi: Gidinga nya vathu nya guvivbedwe khu monyo gi ngu vivbisa mavbanyelo nya yadi. 34Digani mavbanyelo nya guvivbe, vbanyani khu ndruda kha nga edzi a dzinago khidzo Nungungulu! Kholu, vbakari gwanu vomo va si mutigo Nungungulu. Nya gu ganela esi khu gufela gu mi thela dzitshoni. 35Muthu a ngu dzi kodza guwudzisa khuye: "Va gu wuga kharini ava va fudego? Givili muni va na wonegago khigyo?" 36Wupumbu muni uwowo! Esi u yalago kha si ningi mihandro ya mba mwalalega mbewu yakone. 37Egi U yalago khandri litshina lakone nya simbo wu na bugago, wa gu yala basi nyingi yakone, gani khya givbila, gani khya mumbe simbo. 38Nungungulu a gu ninga nyingi ni nyingi givili a gi wonago gu khuye gi ngu yi yela. 39Sivili satshavbo kha si khali idzo saye. Givili nya muthu gi hambanile ni givili nya sirengo, ni sinyoni ni dzindzandzi. 40Somo gambe sivili sa ndzadzini ni esi sa tigoni. Gungangamela nya sivili sa ndzadzini gu hambane ni ogu nya esi sa mafuni. 41Lidambo li na ni mangangamelelo yaye, ngima nuwo wu na ni yaye, dzinyeledzi nidzo dzi na ni yawe nya guhambane. 42Khidzo gambe kharato gu na giregago guwugani ga vafudego. Ha gu kembela givili nya gufe, gu wuga givili nyamba fa gambe. 43Gu kembedwa givili nyambana wumburi, gi wuga na gi gu ngangamela ngudzu; gu kembedwa givili nyambana tshivba, gi wuga na gi tade khu tshivba. 44Gu kembedwa givili ginene nya muthu, guta wonega givili nya gutale khu guvbanya nya guphye nya guningwe khu Liphuvbo nya gu Age.Kha nga gi guromo givili nya guvbanye nya wuthu, gyomo gambe givili nya guvbanye nya Liphuvbo nya gu Age. 45Milowo nya gu Age yari khiyo: "Mwama nya guhegule, Adhamu, givangwa nya guvbanye", aholu Adhamu nya mahegiso, liphuvbo li ningago guvbanya. 46Oyu nya guhegule adisiri muthu nya liphuvbo, adiri muthu basi, khu hwane khavbo a ngata manega muthu nya liphuvbo. 47Oyu nya guhegule adiri muthu wa mafuni. Oyu nya wuvili khwa ndzadzini. 48Vathu va mafuni va gu godza oyu nya guhegule; vathu nya liphuvbo va gu godza oyu nya wuvili. 49Nga olu mafuni momu hi godzago muthu nya mafu, kharato gambe, hi na godzana ni muthu wa ndzadzini. 50Khu maganelelo yaya nya guvbweta gu mi embela kheni, muthu nya mafu kha dzi kodzi uye wurumba waye, gu hakha thomba nya mufumu wa Nungungulu. Egi gi gu ni lufa kha gi yeli gu hakha thomba nya guvbanye nya gupindruge. 51Nya guvbweta gu mi tulela sihalo: Khandri ethu hatshavbo hi nafago, aholu hatshavbo hi na vbindrugedza giemo, 52Isoso si na girega khu gikhati gimwegyo basi, khu gukhwavbila nya maho, gikhati wu na wombago pundru nya mahegiso. Wa gu pwala pundru, ava va fudego va na wuga va vbanya nyamba fa gambe, gasi ethu, hi na vbindrugedza giemo. 53Kholu gu vbwetega givili gegi nya guhine gi hakhe gumba hina, ni givili gegi nya gufe gi hakhe gumba fa. 54Gikhati givili nya guhine gi na digago guhina, ni givili gegi nya gufe gi na hakhago gu mba fa, gu na tadzisega magana ma lovidwego nya gupwani: "Gufa gumbembisidwe khu gupala nya mahegiso. 55Uwe gufa, olu gomo hayi gupala gwago?Yomo hayini tshivba yago nya gusonge?" 56Tshivba nya gufe khu gighoho; tshivba nya gighoho khu nayo. 57A na rungudzwe Nungungulu a hi ningidego gupala khu tshivba ya Pfhumu yathu Jesu Kristo! 58Khu kharato, vandruye nya sigodwa, simamani mu khala na mu tiyide mu thuma gikhati gyatshavbo khu gu nengela esi Nungungulu a si vbwetago, Kholu mahoni ga Pfhumu, thumo wanu khandri wa mahala.

will be added

X\