1VAKORINTO 14

1Dzi garadzeni khu gu vbanya khu lihaladzo, mu dogorela siningwa nya Liphuvbo nya gu Age, ngudzungudzu giningwa nya gutivise mahungu. 2Oyu a gu ni giningwa nya guganele malimi nya guhambanelane kha ganeli ga vathu, a gu ganela ga Nungungulu. Kholu kha si tidwi khu muthu esi nya gusihale a ganelago khu gu tiviswa khu Liphuvbo. 3Gasi oyu a tivisago mahungu ya Nungungulu a gu ganela ga vathu: a ngu vbaha ni gu laya ni gu tangadzisa. 4Oyu a ganelago malimi a gu dzi phasa uye wurumba waye, gasi oyu a tivisago mahungu ya Nungungulu a gu vbaha Libandla. 5Nyi ngu gola gu kheni enu mwatshavbo mu ganele malimi. Aholu nya gu gola ngudzu gu kheni mu tivise mahungu ya Nungungulu. Oyu a tivisago mahungu ya Nungungulu khongolo guvbindra oyu nya guganele malimi, amba khu gu manega muthu nya gutshamusele esi si ganedwago, gasi gu phasedzela Libandla. 6Nga pimisani, vandruye, nari pwani eni nya guta iyo gwanu nyita ganela malimi nya guhambanelane, nyi di hadza gu mi phasa kharini olu magana yangu ma si pwadziseligo gutuledwa ga Nungungulu, guti, mahungu, mwendro sihevbudzo? 7Khidzo saye ni dzingoma dzi wombwago. Silo si si vbanyigo, kha nga pundru mwendro hwambi; sa gumba wombwa gwadi, si pwala, a na dziti kharini muthu gu khuye ginani a wombago muwombi? 8Pundru a gu pwala khu madzumelo nyamba tisega, khu mani a na dzi dongiselago guya nyimbini? 9Khidzo nenu kharato, mwa gumba ganela khu lidimi li tidwago khu vathu, va na dzi kodza kharini gu si pima esi mu ganelago? Mu na ganela mahala, mu yingiswa khu liphuvbo. 10Malimi nya mangi ngudzu ma guromo mafuni, aholu lidimi ni lidimi li na ni tshamuselo yaye. 11A guta muthu ata ganela ni eni khu lidimi nyi si litigo, eni nya gu khala nombo ga muthu yoyo, uye nuye a gu khala nombo gwangu. 12Khiso esi si manegago vbakari gwanu.Kha nga mu dogorelago siningwa nya Liphuvbo nya gu Age, lombani mu ningwe khu gu tala nya iso, gasi gu vbaha Libandla. 13Oyu a ganelago malimi a na lombe ga Nungungulu giningwa nya gukodze gu ma tshamusela. 14Kholu nya gugira nombelo khu lidimi nyamba tidwa, hefemulo wangu khuwo basi wu lombelelago, aholu mapimo yangu kha ma mani giphaso. 15Hi na rini olu? Guvbwetega nyi lombelela khu hefemulo ni mapimo gambe. Guvbwetega nyi embelela rungudzo ga Nungungulu khu hefemulo ni mapimo gambe. 16Wa gu gira nombelo khu liphuvbo basi, oyu a na bani romo a yingisela a na kodza kharini gu hakha khuye "Amen" guhegisani nya gubonge gwago, olu a nga mba si mana esi u nga ganelago. 17Ambari u gira gwadi nombelo wago nya gubonge, wu mwalo giphaso ga mumbe muthu. 18Nyi ngu mu bonga Nungungulu kholu eni nyi ngu kodza guganela malimi nya guhambanelane guvbindra enu. 19Ambari ulo, vbakari nya tshangano nya Libandla, nya gu gola gu ganela magana madugwanana ya hungoni gwangu ma dzi kodzago gu phasedzela vathu, guvbindra gu ganela mazana magana khu malimi nyamba tidwa khu muthu. 20Vandruye, mu nga khali sanana mapimoni gwanu, aholu, khalani sanana ga esi nya guvivbe, mu khala vagulu nya vathu khu gu pima. 21Umo nya Milowo nya guage, Pfhumu wari khuye: "Nyi na ganela ga ava vathu khu lito nya vathu nya guganele limbe lidimi, ni likana nya valombo. Ambari ulo kha va na tula dzindzeve va nyi yingisa." 22Khavbo avbo, gu ganela malini nyamba tidwa giyeyedzo gya Nungungulu ga vale va si khodwigo, nasiri ga ava va khodwago. Gasi gu tivisa mahungu ya Nungungulu giyeyedzo ga ava va khodwago, nasiri ga ava va si khodwigo. 23La gu tshangana Libandla, vathu vatshavbo va phela gu lombelela khu malimi nyamba tidwa, a gu vboha muthuyo mwendro moyo nyamba khodwa, gu khuye mwatshavbo mu siphuguphugu. 24Aholu, mwatshavbo mwa gu tivisa mahungu ya Nungungulu, a bela muthu nyamba khodwa, mwendro mumbe muthuyo, khu gupwa magana yanu, a na alakanya, a tugula sihoso saye. 25Makungu a gu nawo monyoni gwaye ma na wonegiswa, a na khidzima a tsitsa khovbe vbavbatshi a khozela Nungungulu na gu ganela khu likana khuye: khu lisine Nungungulu womo vbakari gwanu. 26Egi nyi vbwetago gu mi embela vandruye, khegi: na mu tshanganide, moyo a na thula ndzimo, mumbe a na hevbudza, mumbe a na ninga wufakazi, mumbe a gira nombelo khu lidimi nyamba tidwa, mumbe a ninga tshamuselo. Girani satshavbo sesi khu gufela guphasana gudandra gukhodwani. 27Va gu manega va nya guganela malimi nyamba tidwa, ningani wulanga a ganele moyo, mwendro vavili ambari vararu khu guhegisa, moyo ni moyo a na ganele khu gyaye gikhati. Aholu gu vbwetega na romo muthu nya gutshamusele esi va ganelago. 28A gu hamugega mutshamuseli, gwadi va degule, va ganela basi khu myonyoni gwawe ni Nungungulu. 29Vaprofeti vavili mwendro vararu va na tivisa mahungu ya Nungungulu, vambe va ninga mawonelo yawe khu esi si nga ganedwago. 30Aholu, Nungungulu a gu embela gilo ga moyo nya ava va khadego vbavbatshi a na degula oyu a nga bani a gu ganela. 31Kholu enu mwatshavbo mu ngu dzi kodza gu ganela kha nga vaprofeti, aholu muthu ni muthu khu gikhati gyaye, gasi vatshavbo va mane guhevbula ni guphasega khu magana ya vatshavbo. 32Gambe gu vbwetega giningwa nya gutivise mahungu ya Nungungulu gi wonwa khu vambe vaprofeti. 33Kholu Nungungulu kha goli pfilupfilu, a gu gola gurula. Kha nga edzi gu girwago mabandlani yatshavbo ya vanya guaga, 34vanyamayi va nga ningwi wulanga va ganela mitshanganoni. Khandri gwadi vanyamayi gu ganela mu vathuni. Avo va na yingise kha nga edzi wu rumago khidzo Nayo wa Mosi. 35Va gu vbweta guti gambe simbe silo, va na wudzisa vama vawe gaya. Kha gu khali gwadi nyamayi gu khusa lito a gu ganela vbakari nya tshangano nya vakhodwa. 36Gasi khenu mu nga phela khenu guhakha mahungu ya Nungungulu, mwendro khenu mwenga mu gu nawo gani? 37Muthu a dzi pwago gu khuye a na ni giningwa nya gutivise mahungu ya Nungungulu, mwendro gimbe giningwa a na pime gwadi esi nyi mi lovedego, kholu nayo wa Pfhumu. 38A gumba thela kota khu silo sesi, Nungungulu nuye kha na thela kota khu uye. 39Khu kharato, vandriyangu, dzi garadzeni khu gu mana giningwa nya gutivise mahungu ya Nungungulu, gambe mu nga himbedzelini muthu gu lombelela khu malimi nya guhambane. 40Aholu girani esi satshavbo khu githawo ni nayo.

will be added

X\