1VAKORINTO 11

1Landrisani mavbanyelo yangu kha nga eni nyi landrisago ya Kristo. 2Nyi ngu mi zundza, kholu mu ngu nyi alakanya ga silo satshavbo, ni gu sayisa milayo nyi nga mi tshiyelani. 3Aholu, nya gu vbweta gu kheni mu dzitini gu khenu Kristo khuye hungo a fumelago vathu vatshavbo, kha nga mwama a fumelago nyamayi, kha nga Nungungulu a fumelago Kristo. 4Mwama a gu gira nombelo mwendro gu ganela mahungu khu lina la Nungungulu na fenengede hungoni, a gu thela dzitshoni Kristo a gu hungo waye. 5Nyamayi a girago nombelo mwendro gu ganela mahungu khu lina la Nungungulu na funungude hungo, a gu thela dzitshoni mwama waye, khidzo saye ni gu vidwa ndzudzu. 6Nyamayi a mba hunga gikhongelo hungoni, a na gaye ndzudzu! Aholu a gu khala dzitshoni gu gaya mwendro gu vbaludwa, a na hunge gikhongelo! 7Gasi vama, kha gu vbwetegi va fenengela hungoni, kholu khavo giwonegiso ni wuzundzo wa Nungungulu, gasi nyamayi khuye wuzundzo wa mwama. 8Khandri mwama a nga duswa khu ga nyamayi, aholu nyamayi khuye a dusidwego khu ga mwama. 9Gambe khandri mwama a nga girwa khu kota nya nyamayi, aholu, nyamayi khuye a nga girwago khu kota nya mwama. 10Nari guralo, nyamayi fanede gu vega hungoni gilo gi yeyedzago gu pwani a gu fumedwa, khu kotani nya dzingilozi Nungungulu. 11Ambari ulo, ga Pfhumu, mwalo nyamayi nyambana mwama, kha nga gambe a gu mwalo mwama nyambana nyamayi. 12Kholu ha gu khethu nyamayi a di duswa khu ga mwama, hi na gambe khethu mwama a gu velegwa khu nyamayi. Satshavbo sa guta khu ga Nungungulu. 13Nga lamulani enu vamune: Ina mwa gu wona nari gwadi nyamayi guya gira nombelo ga Nungungulu nyamba fenengela gilo hungoni, gani? 14Tumbunuko wu ngu hi hevbudza gu khuwo dzitshoni mwama gu dandrisa ndzudzu. 15Aholu, nyamayi a gu dandrisa ndzudzu wumburi, kholu ningidwe ndzudzu nya gulaphe gasi wu khala gifenengelo gyaye. 16Aholu, oyu a ganedzago esi a na khale na gu dziti gu khuye ethu hi mwalo giolovedzo gyogyo, ni mabandla ya Nungungulu nayo ma mwalo nagyo. 17Ga esi nyi vbwetago gu mi embela olu, nyi mwalo gu mi zundza. Kholu mitshangano yanu kha yi mi phasi gukhala tshukwana, aholu ya gu mi vivbisani. 18Gilo nya guhegule, nya gupwa pwani mwa gu bani mu tshanganile gu manega guhambana vbakari gwanu. Eni nyi ngu khodwa gu kheni, gu ngu manega furi. 19Gwadi gu manega guhambanelana nya mavbanyelo mwendro makhalelo, gasi gu wonega avo va gu vakhodwa nya lisine vbakari gwanu. 20Aholu enu kha mu tshangani khu gighelo nya guta hengela gilaleloni ga Pfhumu, 21Kholu muthu ni muthu a gu tutumela gu hodza gilalelo gyaye a ngatago nagyo, gu manega gu vambe va khala ni ndzala, vambe va leva. 22Ina mu mwalo magaya nya gu hodze ni gu sela iyo, gani? Khu ginani mu kanyisa libandla la Nungungulu, muya thela dzitshoni vale va gu mwalo gilo? Mwa gu vbweta nyi mi embela kheni ginani? Mwa gu vbweta nyi mi zundza, gani? Ahihi, ga esi silo kha nyi mi zundzi ni vbadugwana! 23Khaguva eni nyi hakhide ga Pfhumu esi nyi mi tivisago: Pfhumu Jesu, ni wutshigu a nga ningedwago khuwo, a di dzega gibaba, 24a bonga Nungungulu, a gi pila a ganela khuye: "Egi khu givili gyangu gi nga ningedwa khu kotani yanu. Girani esi kha nga gialakanyo gyangu". 25Khu magirelo ya mamowo, guhegisani nya gilalelo a di dzega gikombe a ganela khuye: "Gikombe gegi khu gidzumeledzwano nya giphya gi nga tiyiswa khu novba wangu; gikhati gyatshavbo mu selago gikombe gegi, selani na mu gu nyi alakanya." 26Khu kharato, gikhati gyatshavbo mu hodzago gibaba gegi, mu sela gikombe gegi mwa gu tivisa gufa ga Pfhumu kala a gu wuya. 27Khavbo avbo, gani khu mani a hodzago gibaba ni gu sela gikombe gya Pfhumu nari mwalo fanelo, a ngu mana nandru nya gughohele Givili ni Novba wa Pfhumu. 28Muthu ni muthu a na dzi lole uye mune wurumba waye, na si gu hodzi gibaba ni gu sela gikombe gya Pfhumu. 29Kholu oyu a hodzago ni gu sela nyamba wona Givili gya Pfhumu, a gu hodza ni gu sela gumbemba gwaye. 30Khigyo gi giridego gumanega vbakari gwanu nya vangi va vbedego tshivba, va dwalago, ni vambe nya vangi va fudego. 31Gasi ha gu dzi lola ethu vamune hi dzi lamula, kha hi na lamudwa khu Nungungulu. 32Pfhumu a gu hi lamula a gu hi tsayisa gambe, gasi hi si mbembi gumogo ni litigo. 33Khu kharato, vandruye, mwa gu bani mu tshanganide, guta hodza gilalelo gya Pfhumu, muthu ni muthu a na lindrele vakwawe. 34Oyu a gu ni ndzala a na hodze gaya, gasi tshangano wanu wu si mi raneli likhulo la Nungungulu. Gasi khu esi simbe nyi nata mi laya na nyi vbohide iyo gwanu.

will be added

X\