1VAKORINTO 10

1Vandriyangu, alakanyani gwadi esi si nga dugelela vakokwe vathu. Vatshavbo va diromo vbavbatshi nya lipfhi; vatshavbo va tshatugide yiphwa. 2Vatshavbo va bhapatisidwe lipfhini ni phwani, va hengela gumogo ni Mosi. 3Va hodzide vatshavbo gibaba gya gimwegyo va nga ningwago khu tshivba ya Nungungulu, 4va gu sela gambe mati nya wuhigo wa Nungungulu a nga ma dusa khu giwindrini nya liphuvbo gi nga bani gi gu va bangaladza, giwindri gyogyo khu Kristo. 5Ambari ulo, nya vangi kha va tsakisa Nungungulu, va fude giwulani. 6Silo sesi si khade giyeyedzo ga ethu hatshavbo, gasi hi si dogoreli silo nyamba sadi, kha nga avo va nga dogorelago. 7Mu nga khozelini sithombe nya vanungungulu nya malipha kha nga vambe vakokwe va nga si khozelago, kha nga gu lovidwego omu nya milowo nya gu Age gu pwani: "Vathu va di khala vbavbatshi va gu hodza ni gu sela, va khuga va hana." 8Hi nga dzi ningedzeli wubhayini, kha nga edzi va nga gira nya vangi vawe, va fa khu litshigu limwedo basi gipimo nya mazana mavili ni magumi mararu mazana vathu. 9Hi nga lingi Pfhumu kha nga edzi va nga girago vambe, va ngafa khu guhodzwa khu dzinyoga. 10Mu nga ganedzi, kha nga va nga gira vambe, va gu mbemba khu gufa. 11Satshavbo sesi si manegide gwawe gasi gu khala giwonegiso, gambe si lovidwe gasi si khale gitiviso ga ethu hi vbanyago ga matshigu yaya nya guhegise. 12Khavbo avbo, oyu a dzi pwago na tiyide, a na dzi wonele gumba thega. 13Sigaradzo mu si wonago khiso si pimedwego gu pwadwa khu muthu. Kholu Nungungulu tumbegide kha na nga dzumedzisa gu khuye mu mane silingo nya guvbindre tshivba yanu. Nungungulu a gu mi rumela gilingo, a na mi tulela gambe dzindzila nya gu gi pale. 14Khavbo avbo, dzipari dzangu, mu nga khozelini sithombe nya vanungungulu nya malipha. 15Nya gu ganela ga vathu nya guti. Pimani gwadi esi nyi mi embelago: 16Gasi gikombe nya gilalelo gya Pfhumu hi rungudzago khigyo Nungungulu, khandri wuhengeli nya novba wa Kristo, gani? Ahati gibaba hi pilago, khandri wuhengeli nya givili gya Kristo, gani? 17Olu gibaba a gu gimwegyo basi, ethu hatshavbo, ambari hiri vangi, hi givili gimwegyo basi, kholu hi ngu hengela guhodza igyo gibaba gya gimwegyo. 18Khedzani libandla la na Israeli. Vale va hodzago nyama nya miphaso, va ngu hengela ni Nungungulu a nga phasedwa mhamba yile. 19Ina nya guvbweta gu kheni ginani khu esi? Ina nyama nya guphasedwe vanungungulu nya malipha yi na ni giphaso, gani? Mwendro gu kheni vanungungulu nya malipha va phaswago gilo, gani? 20Ahihi, khandriso! Va nya mayigo, dzimhamba va ningelago dzinyumbani nya vanungungulu nya malipha, va gu phasela maphuvbo nya guvivbe, kha va phaseli Nungungulu. Eni kha nyi vbweti gu kheni mu hengela ni maphuvbo nya guvivbe. 21Enu kha mu dzi kodzi gu sela gikombe nya phaso wa Pfhumu, mu wuya khavbo muta sela gambe gikombe nya miphaso nya vanungungulu nya malipha. Kha mu dzi kodzi guhodza mbiyani nya Mhamba ya Pfhumu mu wuya khavbo mu hodza gambe mbiyani nya dzimhamba nya vanungungulu nya malipha. 22Mwendro ha gu vbweta gu khethu Pfhumu a goroga? Mwa gu alakanya gu khenu hi na ni tshivba guvbindra uye, gani? 23Silo satshavbo si ngu dzumedziswa, aholu khandri satshavbo si vbahago muthu; silo satshavbo si ngu dzumedziswa, aholu khandri satshavbo si phasago gukhodwa. 24Muthu a nga dwaneli basi esi si mu tsakisago wurumba waye, aholu muthu ni muthu a na dwanele esi si tsakisago muthu kwawe. 25Hodzani satshavbo si rengiswago bazarini nyamba kanakana mahingigedzoni gwanu, 26kholu litigo ni silo satshavbo sa tigoni sa gu lumba Pfhumu. 27Mwa gu ranwa guya hodza ndrangani ga muthu a si gu mukhodwa, hodzani, nyamba kanakana mahingigedzoni gwanu, satshavbo esi a mi ningago. 28Aholu wa gu embedwa khu muthu khuye: "Wona gu khuwe eyi nyama nya guphasedwe vanungungulu nya malipha," u nga hodzi khu kota nya guninge githawo mahingigedzo ya wule a nga gu tivisa. 29Esi nyi ganelago kha nyi kheni khu gupima gwanu, aholu khu gupima ga mumbe muthu. Khu ginani gutshulega gwangu gu pimedwa khu mahingigedzo ya mumbe muthu, gani? 30Nya gu bonga Nungungulu khu guhodza nyi hodzago, khu ginani va na nyi lembago khu kota nya esi nyi bongago khiso Nungungulu? 31Khu kharato, mwa gu hodza, gani mwa gu sela, ni gevbini gimbe gilo mu girago, satshavbo girelani gu rungudza Nungungulu. 32Mu nga khali gikhunguvanyiso ga Vajudha, ga va nya mayigo mwendro ndrani nya libandla la Nungungulu. 33Girani kha nga eni nyi dzi garadzago khu gu vbweta gutsakisa vathu vatshavbo, siloni gwatshavbo, nasiri gu dwanela esi si nyi nengedzisago wurumba wangu, aholu khu gu dwanela esi si phasago va nya gutala, vafela gu vbanyiswa.

will be added

X\