1VAKORINTO 1

1Eni Pawulo, nyi hathidwego khu gugola ga Nungungulu gasi nyi khala mupostoli wa Jesu Kristo, gumogo ni ndriyathu Sostene, 2ha gu lovela Libandla la Nungungulu li guromo dhoropani ga Korinto, enu mu ranedwego gu khala sihathwa sa Nungungulu, mu agisidwego khu gutshanganiswa gumogo ni Kristo Jesu. Ha gu lovela gambe ni vatshavbo vale va phalalegidego ni litigo latshavbo va lombelelago khu lina la Pfhumu yathu Jesu Kristo, a gu Pfhumu yawe navo. Hi ngu mi losani. 3Wuhigo ni gurula gwa Nungungulu, Babe wathu ni gwa Pfhumu yathu Jesu Kristo gu na khale ni enu. 4Wutshigu ni mihani nya gubonga Nungungulu khu kotani gwanu, khu wuhigo a mi ningidego linani ga Kristo Jesu. 5Khu gutshanganiswa ni Kristo, enu mu fumisidwe khu siningwa satshavbo, ngudzungudzu khu siningwa nya guganele ni guti mahungu ya Nungungulu. 6Khu lisine, wu tiyisidwe gwanu wufakazi nya mahungu ya Kristo, 7khu kharato, gu mwalo giningwa nya wuhigo gi mi kenelelago, enu mu guromo vbakari nya gukhevisele guwuya ga Pfhumu yathu Jesu Kristo. 8Khuye gambe a na mi tiyiselago kala mahegiso, gasi muta manwa na muri mwalo gihoso litshiguni la Pfhumu yathu Jesu Kristo. 9Tumbegile Nungungulu a mi ranidego guta vbanya gumogo ni Mwanaye, Jesu Kristo, Pfhumu yathu. 10Vandriyangu, nyi ngu mi lombani khu lina la Pfhumu yathu Jesu Kristo gu kheni: Pwananani, mu ganela gilo gimwegyo; gu nga manegi guhambana vbakari gwanu; hengelani mapimo ni monyo moyo. 11Nya gu ganela kharati, vandruye, kholu nyi ngapwago ni va na Klowe pwani mwa gu vbanya khu gu ganedzisana vbakari gwanu. 12Pwani moyo ni moyo nya enu wari khuye: "Eni nyi wa Pawulo!" Mumbe khuye: "Eni nyi wa Apolo!". Mumbe khuye: "Eni nyi wa Kefasi!". Mumbe khuye: "Eni nyi wa Kristo!". 13Gasi uye Kristo kabanisedwe khu sipandre, gani? Uye Pawulo a di khokhothedwe vbagihambanotunu afela enu, gani? Mwendro sanu mu bhapatisidwe linani ga Pawulo, gani? 14Nyi ngu bonga Nungungulu kholu nyi nga mba bhapatisa muthu vbakari gwanu, vbavbandze ga Krispo ni Gayo basi. 15Kharato, mwalo a na gu khuye bhapatisidwe linani gwangu. 16Nyi bhapatiside nilo lipango la Sitefane, vbavbandze nya ava, kha nyi dundrugi gu kheni nyi bhapatiside mumbe muthu. 17Kholu Kristo kha nyi rumela gu gimbila nyi bhapatisa, aholu a nyi rumede gu gimbila nyi tivisa Ivhangeli, nasiri khu maregerelo nya wugengeli, gasi gumba vbungula tshivba nya gihambano gya Kristo. 18Khu lisine, mahungu nya gutivise gufa ga Kristo vbagihambanotunu ma gu wonwa kha nga wupumbu khu vale va belago khu ndzila yi yago gumbembani; gasi ethu hi guromo ndzilani nya guvbanyiswe, gu khethu tshivba ya Nungungulu. 19Kholu Milowo yari khiyo: "Nyi na fuvisa guti ga va nya guti,nyi na mwalalegisa wugengeli wa va nya gugengela" 20Vomo hayini va nya guti? Vomo hayini va nya sihevbulo? Vomo hayini vale va yitigo misihalo yatshavbo ya mafuni momu? Ina Nungungulu kha yeyedza gu khuye guti nya vathu va mafuni wupumbu gani? 21Kholu, vathu, khu guti gwawe, kha va dzi kodza gutugula Nungungulu mithumoni yi yeyedzago guti gwaye. Khu kharato, Nungungulu dzinide gu vbanyisa vale va khodwago khu mahungu nya wupumbu hi tivisago. 22Vajudha va gu lomba siliwugiso, Vagreki va gu vbweta guti. 23Gasi ethu ha gu tivisa Kristo a khokhothedwego vbagihambanotunu. Mahungu yaya ma gu khunguvanyisa Vajudha, ma wonwa kha nga wupumbu khu vale va si gu Vajudha. 24Aholu, vale Nungungulu a va ranidego, gani Vajudha gani va nya mayigo, va gu ma wona kha nga tshivba ni guti gwa Nungungulu. 25Lisine, kholu egi gi wonegago ga Nungungulu kha nga wupumbu, gi na ni guti guvbindra guti gwatshavbo nya vathu, ni igyo gi gu khwatshi gi mwalo tshivba gi na ni tshivba guvbindra tshivba nya vathu. 26Olu dundrugani gwadi, vandruye, gu khenu mudiri giemo muni gikhati Nungungulu a mi ranidego. Khu mapimelo nya wuthu, vadugwana va nya guti, ni sitetema, ni va nya gudugela dzindrangani nya wufumu. 27Aholu, Nungungulu hathide esi vathu va si wonago kha nga wupumbu, afela gu kona va nya guti; Nungungulu hathide esi vathu va si wonago siri mwalo tshivba afela gu tshisa vbavbatshi va nya dzitshivba. 28Nungungulu hathide vathu nya nyalidede afela gu tshisa vbavbatshi vakhongolo. 29Kharati, mwalo na moyo a na dzi kodzago gu dzi gugumugisa mbeli ga Nungungulu. 30Nungungulu a mi tshanganiside ni Jesu Kristo, a gu uye a khadego guti gwathu. Khu tshivba ya Kristo hi giridwe vathu nya gululame mahoni gwa Nungungulu, hi giridwe vathu va Nungungulu, hi dzegisidwe wugumbini nya gighoho. 31Khu magirelo yoyo, kha nga idzo yi ganelago Milowo nya gu Age khiyo: "Oyu a vbwetago gu dzi khusedza,a na dzi khusedze khu esi Pfhumu a girago."

will be added

X\