1 Li, ɓwiʼ yɛ cìênì lɛ? Ɓwiʼ yɛ suʼ kɛ̀n mbyî lɛ̀ ǹcǐ ɓyɛbbi ɓǎ kwɛ̀nnzǐ nlim Mvɛ̀nnswæ̀b yækì màn nun? 2 Ayi, sɛ ɓa lɔʼ li. Kɛ swiʼ ɓyɛbbi, ɓwiʼ ti wɛ̌ ɓwiʼ ywiâ nùn, ɓyɛbbi cinni kan tì ǹkimmɔʼ nywi yɛʼ. Kɛ à si li, ɓwiʼ yɛ cì lɛ ɓwiʼ kà ɗuɔ̀n tì ɓe ǹlim? 3 Ɓyin limmi lwɛn lɛ kɛ njimnzi yɛ ɓɛ jimnze ɓwiʼ, ɓwiʼ ti ɓæti lɛ̀ Yesù Kristò, ɓwiʼ hwæn pæʼ. Ɓyin limmi tì lɛ kɛ njimnzi màzwùm, ɓwiʼ ti tì kuʼ ɓæti lɛ̀ nun kɛ ywi nyon nun. 4 Kɛ kwan si nun, ɓe lɛ̀ ɓwiʼ ywiâ wɛ̌ Yesù, ɓɛ gwum tì kuʼ ɓwiʼ wɛ̌ nun, ɓǎ Ce nyɛʼ M̀vɛ̀nnswæ̀b yimnzì tì kuʼ ɓwiʼ ywi nun wɛ̌ tà shɛ nun yìmnze Yesù Kristò lɛ̀ ǹkimmɔʼ yon yɛ lan ywum hwæn. Kɛ nyìmnzì yɛ nun yìmnzi ɓwiʼ li, à yili lɛ ɓwiʼ cinni paʼ tòn she nywæb. 5 Li, kɛ ɓwiʼ ɓi ɓæti lɛ̀ Yesù Kristò kɛ ywi nɛ ɓwiʼ ywiâ wɛ̌ nun, ɓwiʼ yɛ tì kuʼ ɓɛ ɓæti lɛ̀ nun kɛ nyìmnzǐ ywi yɛ M̀vɛ̀nnswæ̀b yɛ̌ ɓwiʼ yìmnzi wɛ̌ nun. 6 Ɓwiʼ limmènì seansean lɛ kwan sɛ Yesù ywie kɛ ŋgæʼ mɛ̀ ɓɔtɔʼ nun, paʼ tòn shɛʼ sɛ ɓwiʼ ɓe tòn mbyî, M̀vɛ̀nnswæ̀b ywummɔe kuʼ son lɛ̀ nun m̀ban. À cìe li lɛ̀ nun kwɛbsi paʼ tòn shɛʼ màzwùm ǹgyìnmbɔʼ, ɓwiʼ læ̀kì tì ɓɛ kɛ kwǔ ɓyɛbbi nji. 7 Ntwiʼ sɛ mwum nɛ ywiâ nywæ̀lâ ɓyɛbbi. 8 Kɛ ɓwiʼ ywiâ lɛ̀ Yesù Kristò m̀ban, ɓwiʼ limmènì lɛ ɓwiʼ yɛ tòènnì ǹzison lɛ̀ nun m̀ban. 9 Ɓwiʼ limmi ti kuʼ lɛ kɛ nyìmnì yɛ Yesù Kristò yìmne ywi, à lèân ywi, ywi wòli kan tì kim à ɓæn nun. 10 Kɛ ywi nɛ nun ywie nun, à kyììlâ lɛ̀ ɓyɛbbi ǹgyìnmbɔʼ. Jenɛ, kɛ nzison shon nun, tǒn Mvɛ̀nnswæ̀b sɛ nun tǎ tòn. 11 Swum fɔʼ sɛ lɛ̀ ɓyin kuʼ. Cɛênì ɓyin nɛʼ lɛ ɓwum ɓɛ ti yì ɗwon kɛ swiʼ ɓyɛbbi, ntwiʼ sɛ ɓyɛbbi cinni kan tì ǹkimmɔʼ nywi yin. Ɓyin limmì tì kuʼ lɛ tǒn Mvɛ̀nnswæ̀b sɛ ɓyin ta tòn jenɛ, ntwiʼ sɛ ɓyin ti ɓæti lɛ̀ Yesù Kristò. 12 Kɛ à si li, ɓa ɓyin yili tì lɛ ɓyɛbbi cinni ǹkimmɔʼ nywi yin, à cì lɛ ɓyin ɗwon mɛ̀ lɛʼ mɓyibbɔa nyɛ̌ ǹlim nyin ta ɗyi nlim. 13 Ɓa ɓyin yili tì lɛ ɓyɛbbi cinni mbyi kɛ mɛ nlim nyin nun, lɛ̀ nun kɛnnzì ɓyin kɛ mbyi ncǐ ɓyɛbbi nun. Fyòênnì ɓyin nɛʼ fɛ lɛ̀ M̀vɛ̀nnswæ̀b wɛ̌ ɓwum ɓye ywiâ, ɓɛ yimnì tì ywi. Ɓyin fɛ ɓyin nɛʼ gwùm lɛ̀ nun, ɓǎ nun kɛnnzì ɓyin kɛ mbyi ncǐ lwɛn nun. 14 Ɓyin ɓa tî kɛ kwǔ lwuà nji. Kwɛ̀nnzǐ nlim Mvɛ̀nnswæ̀b sɛ ta ɓyin kɛ̀nnzi jenɛ. Kɛ à si li, ɓa ɓyɛbbi nɛ ɗwon ɓyin mbyi. 15 Shindɔʼ mwum ndɔʼ wòli à lɛʼ lɛ: «She ɓwiʼ ɓa tî kɛ kwǔ lwuà nji, son, ɓwiʼ ti kwǔ kwɛ̀nnzǐ nlim Mvɛ̀nnswæ̀b nji si, ɓwiʼ woli ɓwiʼ kɛn mbyî lɛ̀ ǹcǐ ɓyɛbbi?» Ayi, ɓwiʼ wòli kan ɓwiʼ ci li. 16 Ɓɛ tà ka lɛʼ lɛ wu ɓɛ ɗuʼ nun, lɛ̀ wù ni son ŋgèà? Ɓɛshɛ ɓyɛbbi nɛ ɗyi wɛ̌ nyɛli nywù, wù ni kuʼ son nyon, wù tòân ǹgwòn lɛ̀ ywi. Son, ɓɛshɛ M̀vɛ̀nnswæ̀b nɛ ɗyi nyɛli nywù, wù ni kuʼ son nyon, à yɛ̌ wù fyɔ̀si ǹsanmi kɛ swiʼ shon. 17 Ɓyin ɓe kǎn mbyî mɛ̀ son ɓyɛbbi? Son jenɛ, ɓyin yilâ lɛ̀ ǹlim fɔʼ ywum yɛ ɓɛ lisae ɓyin. Li, ɓwiʼ yilènì M̀vɛ̀nnswæ̀b osɔ̀kɔ̀ʼ. 18 Ɓyin ɓa tî mɛ̀ son ɓyɛbbi, M̀vɛ̀nnswæ̀b nywæ̀sâ ɓyin. Ɓyin ti jenɛ mɛ̀ son ɓyon, lɛ̀ ɓyin ci swum sɛ ɗyi lwɛn kɛ mɛʼ yon. 19 Mùn tà ɓyin ywum màzwùm lìsea kɛ ywum ɓwæ̀lea nun, lɛ̀ ɓyin pwætì ywɔʼ, ntwiʼ sɛ mɛ̀ mwù nyin wò kifɛʼ lwɛn. Kwan sɛ ɓe mbyî, ɓyin ɓe ɓyin nɛʼ fɛ hwæn, mɛ̀ kwù lɛ̀ mwù nun wɛ̌ mɛ̀ son kɛ ncǐ ɓyɛbbi nun, ɓyin ɓe fɔ̀si ɓyɛbbi cǐ lwɛn. Li, m̀banmbɔʼ kuʼ, jenɛ fɛênì ɓyin nɛʼ hwæn, mɛ̀ kwù lɛ̀ mwù nun wɛ̌ mɛ̀ son Mvɛ̀nnswæ̀b, ɓǎ ɓyin ci swum sɛ ɗyi lwɛn kɛ mɛʼ yon, paʼ tòn shin ɓɛ tì kuʼ sanmi. 20 Kwan sɛ ɓe lɛ̀ ɓyin kɛ mɛ̀ son ɓyɛbbi, ywum ye ɗyi sanmea kɛ swiʼ Mvɛ̀nnswæ̀b ɓe kǎn ɓyin ǹlim lwukea. 21 Yǎ se nɛ ɓyin cinnâ kɛ ywum ɓyibbɔa yɛ ɓyin ɓe cì mbyî nun, ye kwɛ̀nnjin ta ɓyin ɓænni lɛ̀ yon jenɛ? Ywum màzwùm ta sukuʼ ɓwum ywi tɛ̀li nywi. 22 Son jenɛ, M̀vɛ̀nnswæ̀b nywæ̀sâ ɓyin, ɓyin ɓa tî mɛ̀ son ɓyɛbbi, ɓyin fyoân ɓɛ mɛ̀ son Mvɛ̀nnswæ̀b. Se nɛ ɓyin kwannzâ kɛ nlim, à ni lɛ ɓyin ti kɛ paʼ tòn she sanmi nun kɛ swiʼ Mvɛ̀nnswæ̀b. Kɛ nyè nɛ yi, ɓyin cinnâ tì ǹzison ɗwùmɗwùm. 23 A mwum ndɔʼ cì ɓyɛbbi, à yɛ̌ ywi. Ywi ni wɛ̌ ɗɛ̀bbi nyon. Son, swum lwɛn sɛ M̀vɛ̀nnswæ̀b fɛ ɓwum ɗinɗin, à si ǹzison ɗwùmɗwùm. À tà ɓwiʼ son fɛ ntwiʼ ɓwiʼ ɓi ɓæti lɛ̀ Nyɛli nyɛʼ Yesù Kristò.
