TITO 3

1Îririkanagia antû kwînyiagia kîrî anene na kîrî bonthe bara barî na watho bwa kwathana, babaathîkagîre, na bakarage magiita monthe baûmba kûrûtha mantû meega. 2Beere muntû atikaarie mantû maathûûku îgûrû rîa ûra ûngî. Ibatûûranie na ûkiri bakîîganagua kîao, na boonanagie kwînyithia kîrî woora muntû. 3Wana tiû kûrî rîra twarî baataku. Twaregaga kwathîka tweneereetue i mantû ma nthîgûrû îno na mawîrirîîria ma mîthemba yonthe matûgwete ûkombo. Twatûûraga tûrî antû ba ntheto na ba rûriitho. Antû batûmena naati tûkabamena woogu batwonia. 4Îndî rîra Ngai Mwonokia wetû aarîkiirie na gûtûgwûrîra kîao na wendo bwake, 5naatwonokiirie. Ataatwonokia n'ûntû bwa ûntû bwega bûra twarorûtha. I kîao aatwîgiirue atwonokia na njîra ya kûthambua îciarwa rîa maîrî, atûgarûra na njîra ya Kîrundu Ûmûtheru. 6Ngai naatwîndamîîrie Kîrundu Ûmûtheru wa kûgana gûkûrûkîîra kîrî Yiesû Kîrîstû Mwonokia wetû, 7kaingo kuumania na ûtugi bwa Ngai atwona tûrî baagîru kîrî we na atwa rûgai rwa mwoyo wa tene na tene ûra twîrîgîîrîîte. 8Na wabu kiugo gîku i gîa gwîtîgîka. Ndîenda ûkinyîîria antû mantû mamu, kaingo bara beetîgîîtie Ngai beegua barî na wendo bwa kwîruta kûrûtha mantû meega, n'ûntû i meega na marî baita kîrî muntû wonthe. 9Ûtigeetîgîîrie gûturania mbaara cia ûtaku, kûthingatanagîîra ndîîyo, kana ûthetania na antû bûgîkararanîria bûra watho buugîîte. Mamu i mantû ma ûtheri mûno na matirî baita. 10Ûkaaya kwona muntû akûgaania antû, mûkaanie rîa mbere na rîa maîrî. Akaaya kûrema bûtikeende kûgwatanîra n'we. 11Menya muntû ta ûyu gûtirî nkarari nakwîyia na naûrîîte. Ûgu akûrûtha ibûkwonania nabîtîîtie. 12Rîra ngaatûma Aritemas kana Tikikas baaya, geria bûra kûûmbîka ûûye taûni ya Nikoporis ûmbone n'ûntû mbangîîte nkare noogo mwanka îgiita rîa mpîo rîthire. 13Na kaîrî, tûma Cenas ûra mûgambi na Apooras na mpwî, na wone barî na bionthe bira bakwenda. 14Nwa mwanka antû beetû beerutane kwîruta kûrûthaga mantû meega kaingo baingia moobatu. Batibatîîrue bakaraga woogu mana. 15Thûkia nkeethi cia bonthe bara tûrî na bo. Na tûkeetherie acoore beetû ndeni ya wîtîgio. Ûtugi bwa Ngai wetû bûrookaraga naabi bwinthe.

will be added

X\