AROOMA 7

1Biû, aruayia na aarayia, bara bwiyî watho, ibwiyî bûra nthiîte kûgweta i bwa mma. Watho bûtûmîkaga kwatha muntû rîra arî mwoyo rîonka. 2Kwa ngerekano, watho buugîîte mûka agwatithanîîtue na ûra amûgûrîîte rîra muntû ûyu arî mwoyo. Îndî mwene agakua, mûka nathaûragwa i watho bwa mantû ma kûgûrana. 3Îndî mûka akeenenkanîra kîrî muntû ûngî na mwene arî mwoyo, mûka ûyu atuîkaga i mûthûngîîri. Îndî mwene agakua, mûka ûyu nathaûragwa i watho. Rîru wana akagûrwa i muntû ûngî atiîgua arî mûthûngîîri. 4Na wata ûgu, aruayia na aarayia, bûrî baakuû kîrî watho n'ûntû îîndî bûrî gîcuncî kîa mwîrî wa Kîrîstû. Îîndî bûrî ba muntû ûngî, ûra aariûkire auma kîrî bara bakuû, kaingo bûtûmîkîra Ngai na kûrûthaga mantû meega. 5Rîra twarî ba mûtugo wa kîîmuntû, ta uu wa wîyia, mawîrirîîria maarutaga ngûgî ndeni yetû magatûma tûrûtha mantû mara mareetaga gîkuû. Na i watho bwatûmaga mawîrirîîria mamu magîa inya ya kûruta ngûgî. 6Îndî îîndî itûthaûrîîtwe twauma wathooni n'ûntû i taka tûrî baakuû na tûtirî agwate ba watho kaîrî. Kwoogu tûtûmîkagîra Ngai na njîra îngî ya gîîkîrundu, ti na njîra îra nkûrû ya kûthingataga watho bûra bwandîke. 7Twaûmba kuuga watho i wîyia? Arî buru! I watho bwatûmire mmenya wîyia i mbi. Ntikîmenya kana i wîyia kwîrirîîria gîntû kîa muntû ûra ûngî ûkeegua watho bûtiugîîte, "Ûtikeerirîîrie gîntû kîa muntû ûra ûngî." 8Yathana rîru i rîo rîere wîyia mwanya wa gûtûma mbîgua ndî na mawîrirîîria ma mîthemba yonthe ndeni yakwa. Ûkeegua ti watho, wîyia ûtiîgua bûrî na inya îgana ûgu. 9Niû kûrî rîo ndatûîre ntakûmenya bûra watho buugîîte. Îndî nkûmenya maathana, rîru i rîo ndamenyire wîyia bûrî inya, ndakua. 10Atî maathana mara magîntûûria mwoyo i mo maatûma nkua. 11Wîyia bwonire ibûtûmîre kaanya gaku ga kwîgua maathana marî oogo, bûmbenie. Bwatûmîîre maathana kûmbûraga. 12Kwoogu watho i bûûtheru. Na wana maathana i maatheru, i maagîrîte, na i meega. 13Twaûmba kuuga gîntû kîega ta gîku i kîo gîatûmire nkua? Arî buru! Wîyia i bu bwatûmîîre gîntû kîega kîmbûraga. Kwoogu itûkwona bûra wîyia bûkarakarangi. Maathana imakwonania wîyia bûrî ûrito bwa kûrûtha wîyia mûno nkûrûki ya kîthimi. 14Itwiyî watho buugîîte mantû ma gîîkîrundu, îndî ndî niû na bwakwa ntirî mantû ma gîîkîrundu. Mbendeetue ndatuîka nkombo ya wîyia. 15Ntimenyaga i kî n'ûntû ndûthaga mantû mara ndûthaga. Ntirûthaga bûra mbendaga kûrûtha, ndûthaga bûra nteendeete. 16Kwoogu ûkoona ndûthaga bûra nteendeete kûrûtha, i ta kwonania inkûgwatanîra na kuuga atî watho i bwega. 17Îndî ti niû ndûthaga mantû mama, i wîyia bûra bûkaraga ndeni yakwa. 18Imbiyî gûtirî ûntû bwega bûrî ndeni ya mûtugo wakwa wa kîîmuntû, ta uu wa wîyia. N'ûntû wana nkîendaga kûrûtha ûntû bwega ntiûmba kûburûtha. 19Ntirûthaga mantû meega mara mbendaga kûrûtha, ndûthaga mantû maathûûku mara nteendeete kûrûtha. 20Kwoogu ûkoona ndûthaga bûra nteendaga kûrûtha, ti niû ndûthaga bu. I wîyia bûra bûkaraga ndeni yakwa. 21Kwoogu mboneete gûtuîkaga atî, rîra mbendaga kûrûtha ûntû bwega, ûthûûku bûtindekaga. 22Mathûgaaniani maakwa mbîgagua nkîgwatanîra na watho bwa Ngai. 23Îndî ndathikîîria nkeegua kûrî na watho bûngî bûkûrûa na bûra bûrî mathûgaaniani maakwa. Na watho bûbu i bu bûnkîragia inya bûgaantuîkithia mûgwate wa wîyia bûra bûûyûri mwîrî wakwa unthe. 24Gîku na ti kînyamaara ndî na kîo! N'ûû agaantunyûkia mwîrî ûyû ûgiitîrîtwe îgamba werwa n'ûgaakua kûringana na bûra ûkari? 25I Ngai agaantunyûkia! Inkûmûcookeria nkaatho n'ûntû bwa kûmbonokia na bûra Mwathani wetû Yiesû Kîrîstû aarûthire. Kwoogu mathûgaaniani maakwa ntûmîkagîra watho bwa Ngai. Îndî mûtugo wakwa wa kîîmuntû, ta uu wa wîyia, ûtûmîkagîra watho bwa wîyia.

will be added

X\