AROOMA 2

1Kwoogu woû ûgiitagîra bara bangî îgamba ûtirî na rûûtha rwa kûrûtha ûgu. Rîra ûkûgiitîra bara bangî îgamba, na wana woû nûrûthaga mantû maathûûku, i ta woû wengwa ûkwîgiitîra îgamba. 2Twiyî Ngai agiitaga îgamba rîa bara barûthaga mantû ta mamu n'ûntû ikwagîrîte. 3Nûkwona taka Ngai atagîkûgiitîra îgamba oone ûrî mwîyia n'ûntû bwa kûgiitîra bara beeyagia îgamba na woû wîyagia meeyia ta maao? 4Ngai nakwoneetie bûra arî kîao kîgana. Atikweyaga îkaanûkia nthûti îmwe na ainyîkagîria mara ûrûthaga kwa îgiita rîraaya, îndî ûtionaga bûbu ta ûntû. Ka ûtaiyî Ngai i kîao akwîgagua n'ûntû neendaga wîrira? 5Îndî naawe ûûmîîtie kîongo warega kwîrira. Kwoogu nwa ka ûkwîbongeera ûrito bwa îkaanûkia rîra ûkeewa ntugû îra Ngai akoonania bûra mûthûûro wake ûgana na bûra agiitaga magamba bûra kwagîrîte. 6Ntugû înu Ngai akaa woora muntû kîewa gîake kûringana na bûra ûkeegua arûthîîte. 7Akaa kîewa kîa mwoyo wa tene na tene bara baûmagîîria bagakara bakîrûthaga mantû meega, bara beendaga kwona mwago wake, bara beendaga abatîîya, na beendaga gûtûûra batagîkua. 8Îndî bara beenganaga na mantû maao na barûthaga mantû maathûûku bantû a barûthaga bûra bûrî bwa mma, Ngai akaboonia bûra mûthûûro wake kîrî bo ûgana. 9Muntû wonthe ûra atatigaga kûrûtha mantû maathûûku akoonua thîîna na kînyamaara. Ayaundi i bo bakeegua barî ba mbere, rîru antû bara bangî batarî Ayaundi. 10Bara barûthaga mantû meega Ngai akaboonia mwago, akabatîîya na akabaa ûkiri. Na Ayaundi i bo bakaambia, rîru antû bara bangî batarî Ayaundi. 11Gûtirî we Ngai eendagîîra 12Bara batarî Ayaundi beeyia batarî na watho bakaathirua gûtarî na watho woogu. Na Ayaundi n'ûntû barî na watho bwa Musa i bu bakaagambithua na bu beeyia n'ûntû bwa kûbuuna. 13Muntû atituîka ûmwagîru n'ûntû bwa kwîgua watho. Îndî akûrûtha bûra watho buugaga naagîrithagua. 14Bara batarî Ayaundi batirî na watho, îndî rîra barûthaga bûra watho buugîîte kuumania na bûra baiyî i bu kwagîrîte, bo bongwa i bo watho, wana kinya ûkeegua batirî na watho bwa Musa. 15Rîra barûthaga ûgu, boonanagia watho bwandîkîîtwe nkorooni ciao. Na wana mathûgaania maao imoonanagia wabu ûgu i bu gûkari, n'ûntû mathûgaania maao kûrî rîra maboonagia ibabîtîîtie na kagiita kangî makaboonia barûthîîte bûra kwagîrîte. 16Na kûringana na ntheto îmbega îra ntûmagîîria, mantû mamu magaatuîkîka ntugû îra Ngai akaagiita îgamba rîa mathûgaania monthe ma witho ma antû bonthe, gûkûrûkîîra kîrî Kîrîstû Yiesû. 17Na woû naawe uugaga ûrî Mûyaundi na wîgwatagia watho, wîkumagia nwiyî Ngai 18na bûra eendaga kûrûthwa. Uugaga wîrutanîîte na watho kwathûrana wega na ûthûûku, 19na wîthûkagia i woû ûgwete ntûngi mûtî na i woû werû bwa bara barî mwinduuni. 20Wîthûkagia i woû wonagia bara bataku na i woû mwarimû wa bara gûtarî bu baiyî. Ûthûgaanagia ûrî na ûmenyo bunthe na nwiyî ûmma bunthe n'ûntû nwiyî watho. 21Woû ûrutanaga bara bangî rî, i mbi îgiragia wîrutana ûrî woû? Î woû uugaga wamba i meeyia rî, nwiyaga? 22Î woû uugaga ûthûngîîri i meeyia rî, nûthûngagîîra? Î woû ûmeneete ngai cia mîbuanaano rî, nwiyaga kûra ngai inu irombagîrwa? 23Î woû naawe wîkumagia nwiyî watho bwa Ngai rî, ûtiagagîra Ngai gîtîîyo rîra uunaga watho bwake? 24Wata bûra kwandîkîîtwe Maandîkooni Maatheru, "I biû bûgiragia riîtwa rîa Ngai rîtîîywa i bara batarî Ayaundi." 25Ûkeegua wathîkagîra watho, gûtaanwa gwaku kûrî na gîtûmi. Îndî ûkeegua uunaga watho i bûmwe na ûtagîtaanirwe. 26Ûkeegua muntû ûngî atarî Mûyaundi, ûra we atarî ûmûtaane naathîkagîra maathana mara marî wathooni rî, nûkwona taka Ngai atakîmûthûkia arî ta muntû ûmûtaane? 27Kwoogu muntû ûra aathîkagîra watho atarî ûmûtaane akabûgiitîra îgamba biû bara bataane na bûrî na maandîko ma watho îndî bûtimaathîkagîra. 28Ûtiûmba kuuga ûrî Mûyaundi wa mma n'ûntû bwa akî kwîgua aciari baaku n'Ayaundi, na atî, ûrî ûmûtaane. 29Mûyaundi wa mma n'ûra ataanîîtwe nkoro yake. Rûtaano rwa mma i rwa gîîkîrundu, ti rûra rungwa. Ûra ataanîîtwe nkoro akumagua i Ngai îndî t'antû.

will be added

X\