AROOMA 15

1Tiû bara tûrî na wîtîgio bûûganu tûtibatîîrue tûmeneeria bara batarî na wîtîgio bûûganu. Tûtibatîîrue tûrûthaga wabûra bunka bûtûkenagia tûrî tiû. 2Woora ûmwe wacietû abatîîrue ageragia gûkenia bara bangî na arûthaga mantû mara bakwona marî meega, mara makaabeekîra wîru. 3Wana Kîrîstû ataarûthaga mantû mara maamûkenagia arî we. Maandîko Maatheru maugîîte, "Ûkîrumangwa wana niû ndumanganagîrua naawe." 4Bunthe bûra bwandîkirwe wo karaaya Maandîkooni Maatheru bwandîkirwe bûtûrutana. Maandîko Maatheru i mo matweyaga wîrîgîîro kuumania na kûûmîîria na wîru bûra matwîkagîra. 5Na Ngai ûra atweyaga kûûmîîria na agatwîkîra wîru aroobûteethia bûgatûûraga bûkîgwatanagîra, bûkîthingataga ngerekano ya Kîrîstû Yiesû, 6kaingo bwîgua bûgwatithanîîtue amwe bûgîkumagia Ngai, Îthe wa Mwathani wetû Yiesû Kîrîstû. 7Kwoogu gwatanagîraani ta bûra Kîrîstû agwatanîrîte naabi, bwonanie ibûgûtîîya Ngai. 8Ga nkûbwîra, Kîrîstû aatuîkire mûruti ngûgî kîrî Ayaundi kwonania Ngai i mwîtîgua mawîraneeni mara eere biûyûûyû biao. 9Na kaîrî, i kaingo bara batarî Ayaundi bakumia Ngai n'ûntû bwa kwîguîgwa kîao, wata bûra kwandîkîîtwe, "Na n'ûntû bwa ûgu, ngagûkaatha mbere ya bara batarî Ayaundi, nkainaga ngîkumagia riîtwa rîaku." 10Na kaîrî Maandîko Maatheru maugîîte, "Biû bûtarî Ayaundi, kenaani amwe na antû ba Ngai!" 11Na kaîrî mauga, "Kumiani Mwathani, bwinthe biû bûtarî Ayaundi, antû bonthe ibamûkumie!" 12Na kîroria Isaaya n'we augîîte, "Ûmwe wa kuuma kîrî rûrîîyo rwa Njesii akaaya. Akaaya kwatha bara batarî Ayaundi, n'we bakeerîgîîra." 13Ngai ûra eeyanaga wîrîgîîro arootûma bûkenaga mûno na arootûma bwîgagua bûrî na ûkiri n'ûntû bwa kûmwîtîgia. Rîru i rîo ûkeegua bûrî na wîrîgîîro bwingî mûno kwa inya ya Kîrundu Ûmûtheru. 14Aruayia na aarayia, ndî na mma bûrî antû beega mûno, ibwiyî bûra bunthe bûbatîîrue bwîgua bûkîmenyaga, na ibûkûûmba kwîrutana. 15Îndî mbwandîkîrîte îgûrû rîa mantû mara nkwenda kûbûririkania ntakûmaka. Na ndûthîîte ûgu n'ûntû bwa bûra Ngai ampete ngûgî îno ya mwanya mûno 16ya kwîgua ndî mûruti ngûgî wa Yiesû Kîrîstû kîrî bara batarî Ayaundi. Ndutaga ngûgî ta ya mûthînjîri wa Ngai. Mbarutanaga ntheto îmbega ya Ngai, kaingo beegua barî ta kîgongwana kîthereetue i Kîrundu Ûmûtheru, kîra Ngai aûmba gwîtîgîîria. 17Kwoogu ndî na gîkeno ndeni ya Kîrîstû Yiesû n'ûntû bwa ngûgî îra ndutagîra Ngai. 18Ntirî na ûcamba bwa kuuga ûntû bûngî tatiga bûra Kîrîstû arûthîîte naani, aatûma bara batarî Ayaundi batua kwathîkîra Ngai. Kîrîstû arûthîîte ûgu na mîgambo yakwa, mantû mara ndûthîîte, 19na inya ya biama na ya magegania, na inya ya Kîrundu wa Ngai. Na kwoogu aambotithia ndatûmîîria ntheto yake îmbega kwanjîîria Njerusaremu mwanka Irerikumu. 20Mworooto wakwa rîonthe wîgagua ûrî gûtûmîîria ntheto îmbega gûntû kûra antû bateegua Kîrîstû akîgwetwa. Ndûthaga ûgu kaingo ntaakîîra mûcingiini wa muntû ûngî. 21Na wata bûra kwandîkîîtwe Maandîkooni Maatheru, "Bara batoona wa kûbamenyithia mantû maake bagaatua kwona, bara bateegua akîgwetwa bagaaciûkîrwa." 22Gîku i kîo kîragirîîtie mbona kaanya ga kûûya kwenu. 23Îndî îîndî ntirî na ngûgî ya kûruta naaga kaîrî iteere bibi. Na kwoogu inkwîrîgîîra nkaayîîra naagu kwenu mbwone nthiîte bwa Spania, n'ûntû ndî na mîanka îmingî wankîîgagua nkîenda kûbûriûngîra. Nyuma ya gûkeneera kwîgua tûrî amwe naabi wakagiita kagana ûna, rîru nwa bûmbumagarie nkathi bwa Spania. 25Îndî mbere, inkwamba nthi Njerusaremu mbirîre antû ba Ngai ba noogo kîewa. 26Eetîgîri ba Macendonia na ba Akaaya ibaarî na wendo bwa kwaa antû ba Ngai ba noogo bara nkîa kîewa gîa kûbateethia. 27Ibagûkeneera kûbateethia, na ûgu i bu babatîîrue barûtha. Na n'ûntû bara batarî Ayaundi wana bo barî na kîthaarimo gîa gîîkîrundu bûmwe na Ayaundi, ibabatîîrue kinya bo bateethania na into bira bathaarimîîtwe na bio. 28Rîra nkoona nkûthiria ngûgî înu, na ntige nkwona bakûgwata mbia irî cionthe ira bootheretwe, rîru i rîo nkaayîîra naagu kwenu nkîbwona nthiîte bwa Spania. 29Na ndî na mma rîra nkaaya nkabûreetera kîthaarimo kîûyûri, kîra ntheto îmbega ya Kîrîstû îreetaga. 30Aruayia na aarayia, n'ûntû bwa Mwathani wetû Yiesû Kîrîstû na n'ûntû bwa wendo bûra Kîrundu atweyaga, inkûbûkinyîîria bûngwatie kûromba na inya mûno. 31Ndombagîraani ntikaûre na bara bataathîkagîra Kîrîstû Njundea. Na rombagaani bara barî ba Ngai noogo beetîgîîrie kûthûkia kîewa kîra mbairîrîte, 32kaingo nkîîya, weegua i kwenda kwa Ngai, mbûya nkeneete twîgue tûrî na kagiita keega ga gwîkanîra wîru. 33Ngai ûra atweyaga ûkiri arookaraga naabi bwinthe. Aameni.

will be added

X\